أحمد قربان
شركة ابل (Apple) المعروفة نزّلت تصنيف جديد للالعاب اللي في المتجر تبعهم. هذا التصنيف ممكن يغير مجرى الالعاب في المستقبل في حال دعموه اللاعبين و طلبوا ان كل الالعاب تكون تحت هذا التصنيف. شركة ابل طبقت هذا التصنيف بحكم قوتها في ريادتها في مجال تسويق الالعاب لاجهزتها.
اسم التصنيف الجديد هو “ادفع مرة والعب” (Pay Once and Play) واللي معناه واضح من اسمه وهو عبارة عن العاب تشتريها بمبلغ معين وماتحتاج تدفع اي فلوس بعد شرائها، يعني مافي اي محتويات اضافية تشتريها داخل اللعبة.
هذا النوع من الالعاب يعتبر غريب وجديد بالنسبة لنا كلاعبين، خصوصا في الفترة الاخيرة صرنا نشوف معظم الالعاب فيها محتويات اضافية تشتريها داخل اللعبة سواء كانت للتطوير او لتقليل وقت الانتظار او لاسباب كثير غيرها، و كل الالعاب اللي نعرفها كانت اما مجانية وفيها محتويات بفلوس او تنزلها بفلوس وغالبا راح يكون فيها محتويات ايضا تشتريها بفلوس.
مثال للنوع الجديد – ادفع مرة والعب- من الالعاب هو لعبة باسشن (Bastion) على اجهزة الاي او اس (iOS)، اللعبة قيمتها 5 دولار فقط واللي يعتبر رخيص نوعا ما، اللعبة تصويرها ممتاز و كل ماراح تلعب راح تلفل وتفتح اسلحة جديدة و دروع جديدة، لكن الفكرة ان كل ماتلعب راح تصعب اللعبة والوحوش يصيروا اقوى، بالتالي راح تحتاج دروع واسحلة اقوى وعلى عكس باقي العاب الاجهزة المحمولة ماراح تقدر تشتري دروع تقويك من المتجر، كل المطلوب منك انك تلعب اللعبة اكثر و تقاتل اعداء اكثر، الشي الغريب والعجيب انك اذا مت ماراح يقولك انتظر نص ساعة او ادفع عشان تلعب الان، اللعبة راح ترجعك لبداية المرحلة و تقولك حاول مرة ثانية، حاجة ثانية غريبة وهي ان اللعبة ماراح تطلبك تنشر اللعبة لاصدقائك في مواقع التواصل الاجتماعي مقابل ارواح اكثر او فلوس، يعني ماراح تكون احد الغثيثين اللي يرسلوا تنبيهات على الفيس بوك كل يوم لالعابهم السقيمة.
هذا المبدأ الجديد من الممكن انه يهز سوق الالعاب المحمولة بشكل كبير، راح يهز السوق بحيث ان الاشياء اللي تشتريها بفلوس في بعض الالعاب راح تلقاها مجاناً في هذا النوع الجديد. العاب مثل كلاش اوف كلانز (Clash of Clans) وكاندي كرش (Candy Crush) راح يصير لها منافس شرس جدا و صعب نتخيل المنافسة اللي راح تصير وردة الفعل من هذي الالعاب لهذا الخبر. في البداية راح يكون غريب الموضوع بالنسبة للاعبين، لكن بمجرد مايجربوه راح يطالبوا بيه باقي الالعاب انها تطبقه، و كذة كلنا حنستفيد كلاعبين. ممكن الاسعار ترتفع شوي بسبب هذا الشي لكن برضه تدفع مرة وحدة افضل من انك تجلس تدفع لسنتين.
طبعا هذا كله كلام بالهوا ومافي شي اكيد، لكن لازم نرفع القبعة لابل على فكرتهم الرهيبة صراحة.
عشان تعرف مدى قوة ابل في سوق الالعاب للاجهزة المحمولة تقدر تقرا خبر كتبناه عن ارباح المتجر الخاص بهم.
اش رايكم بالفكرة و هل راح تطالبوا به في باقي الالعاب لو نزل؟
أحمد عصام
