احمد جابر
اعلنت امازون (Amazon) اليوم عن جهازها المنزلي فاير تي في (Fire TV) بسعر 99 دولار (حوالي 370 ريال) وراح يدعم الفيديو والالعاب الالكترونية.
بالنسبة لمواصفاته فالجهاز يجي بعرض 7 انش على شكل صندوق بمعالج 1.7 جيجا هرتز، رباعي النواة من شركة كوالكم، 2 جيجا بايت رام، و8 جيجابايت تخزين داخلي، معالج رسوميات ادرينو 320 (Adreno 320) ويدعم عرض فيديو بدقة (1080p) ويدعم واي فاي (WiFi) من نوع 802.11a/b/g/n.
تقول امازون انها ماتحاول تنافس اجهزة الكونسل الحالية، والجهاز موجه للناس اللي ماعندها كونسل او انها معتادة تلعب العاب الجوال، وراح يدعم كنترول خاص فيه وراح يكون سعره 39.99 دولار (حوالي 150 ريال) مع (1000) عملة امازونية (عملة افتراضية خاصة بأمازون) تقدر تشتري فيها الالعاب، وراح يدعم جهاز تحكم وتطبيق جولات خاص فيه.
الالعاب اللي بتكون متوفرة للجهاز هي: ماينكرافت (Minecraft: Pocket Edition) ولعبة اسفلت 8 (Asphalt 8: Airborne) وكم لعبة ثانية. استديو امازون للألعاب (Amazon Games) يشتغل على لعبة اسمها (Sev Zero) وهي خليط بين لعبة دفاع ولعبة منظور اول، وهذي السنة امازون استحوذت على استديو (Double Helix) اللي طور لعبة (Killer Instinct) على الاكس بوكس ون.
على كلام مايك فرازيني مدير استديو امازون للألعاب ان متوسط اسعار العاب الجهاز بيكون (1.85 دولار) حوالي 7 ريالات، والاسعار راح تبدأ من (0.99 دولار) حوالي 4 ريالات، وراح تتواجد الألعاب المجانية (Free to Play)، ويقول ان مطورين وناشرين كثيرين راح يطورون العاب للجهاز مثل: (2k) و (Disney) و (EA) و (Sega) و (Telltale Games) و (Ubisoft)، وعلى كلام امازون ان الآف من الألعاب راح تكون متوفرة للجهاز بنهاية الشهر الجاي.
و من المواصفات الاضافية ان جهاز التحكم راح يحتوي على ميزة البحث الصوتي، وفيه الميزات اللي منيب مستفيدين منها، مثل خدمات الافلام والتخزين السحابي للصور وخدمات امازون المختلفة. و راح يدعم التطبيقات مثل تويتش (Twitch) وكمان خدمات عرض الافلام والمسلسلات مثل نتفلكس (Netflix) وغيرها.
راح يدعم مدخل (HDMI) ومدخل الصوت اللي راح يدعم الدولبي ديجتال بلس (Dolby Digital Plus) مع دعم للصوت المحيطي (7.1) ومدخل ايثرنت و USB. الجهاز راح يعمل بنظام موهيتو (Mojito)، وهو نظام اندرويد الخاص بأمازون. على كلام امازون انه هذا الشيء راح يخليه سهل للمطورين.
رأيي الخاص اعتبر هذا الجهاز غير موجه لنا من ناحية الخدمات اللي يقدمها، لأنها غير متوفرة في منطقتنا واشوفه جهاز ترفيه منزلي اكثر من كونه جهاز العاب. من ناحية الألعاب ممكن يكون اقوى من الأويا (Ouya) لأنه من شركة كبيرة اللي هي امازون، لكن يضل جهاز اندرويد فما أتوقع اشوف العاب ضخمة عليه.
وش رأيك انت؟ هل تتوقع تكون العابه قوية؟ وهل ناوي تشتريه؟
احمد خالد
بارعة
