في اجتماع فريق العمل، وبعد توزيع أغلب الجوائز والفائزين فيها، راجع الفريق أبرز الألعاب اللي نزلت هذي السنة. الألعاب الرهيبه كثيرة، ولكن وش تسوي اذا نزل “محتوى” ما تقدر تصنفه كلعبة، ولا تقدر تصنفه كاضافة، ولا تقدر حتى تصنفه كعرض أو مشهد.
حاولنا نعطي هالتجربة جائزة “أكثر لعبة خوّفتنا” لكننا ما قدرنا لانها ما تنطبق عليها القوانين، هذي ماهي لعبة، لذلك ما نقدر نعطيها. حاولنا نعطيها جائزة “أكثر لعبة فاجأتنا” لكنها برضه ماهي لعبة.
اتفق الفريق على ان “التجربة” المميّزة هذي لازم يكافئونها بطريقة معيّنة، ويعطونها جائزة عشان يشوفون المتابعين اننا حبيناها وتفاجأتنا فيها.
أخيرًا، التفت جميل على الفريق وقال: “وش رأيكم نعطيها ‘جائزة اللي ما عرفنا وش نعطيها’؟” قالها وضحك، وضحك معه فريق العمل. بعض أعضاء الفريق كانوا يحسبونه يمزح، لكنه رجع من جديد وقال ان التجربة هذي لازم نكافئها. اتفق الفريق أخيرًا على تكوين جائزة استثنائية لهذي السنة فقط، وتكون هالجائزة للتجربة الرهيبه.
التجربة هذي هي تجربة لعبة P.T، أو Silent Hills. قصتها باختصار ان تم الاعلان عنها في معرض جيمزكوم 2014 كلعبة مطوّر مستقل، ولكن تفاجأ عالم اللاعبين بأنها شي مختلف تماماً، وأكبر من كذا بكثير.
هب مجتمع يوتيوب وطبوا في التجربة الرهيبه، والمتابعين انبسطوا على الفيديوات الرهيبه اللي طلعت منها.
لذلك، قررنا نكافئ هذي التجربة الرائعة اللي عشناها مع P.T بجائزة استثنائية سويناها فقط السنة هذي عشانها، ولا نقدر ننتظر الين ما نشوف اللعبة بشكلها الكامل!
وش كانت قصتك مع P.T Silent Hills؟
