Saudi Gamer
مناقز، ونقصد فيها لعبة نتاقز -أو تقفز بالفصحى- فيها كثير، وفيها تسلّق كثير برضو.
هذا التصنيف معروف في عالم الألعاب، وعلى ان الألعاب في هذا الوقت توسّعت وصارت أشمل وأكبر من مجرّد مناقز، الا ان هذا النوع من الألعاب حافظ على شعبيته وأهميّته.
نزل هذي السنة كميّة كبيرة من ألعاب المناقز الرهيبة، من أشهرها اللعبة الكلاسيكية المعروفة Mario 3D World واللي تعتبر من أكثر الألعاب اللي طوّرت هذا النوع من الألعاب. Mario 3D World أبهرتنا بطريقة لعبها الخرافية والادمانية وتصميم مراحلها اللي ماله مثيل، وكأن ننتيندو عرفت الخلطة السحرية اللي تخلي اللاعبين يدمنون عليها. نفس الشي تماماً مع Rayman Legends واللي أضافت على خلطة ماريو الرسومات المبهرة والموسيقى التصويرية الرايقة.
من المفاجآت الكبيرة هذي السنة برضو كانت لعبة Guacamelee واللي تم تطويرها من مطوّر مستقل. تفاجأنا بمستوى اللعبة المبهر وطريقة رسمها الرهيبة. برضو من المفاجآت كانت لعبة Puppeteer الغريبة واللي قدمت لنا لعبة مناقز ممتازة، واخترناها من ضمن المرشحين للجائزة لهذي السنة!
لكن كل هالألعاب الرهيبة ما قدرت تتغلّب على السحر الموجود في لعبة Tearaway، اللعبة اللي نزلت على البلاي ستيشن فيتا وأبهرت كامل فريق العمل. Tearaway قدمت لعبة مناقز من الطراز الرهيب والطريف، استمتعنا كثير بعناصر المناقز الموجودة فيها، بالاضافة الى الابداعات الثانية الموجودة في اللعبة، كل هذي أسباب خلّتنا نختار هاللعبة كأفضل لعبة مناقز هذي السنة!
وش رأيك في لعبة Tearaway؟ ووش أفضل لعبة مناقز بالنسبة لك هذي السنة؟ شاركنا رأيك في التعليقات!
