Saudi Gamer
نحبكم يالمطوّرين المستقلين، نحبكم ونحترم عملكم، خصوصاً في كل مرة تثبتون للاعبين ان الميزانيات الضخمة والدعايات اللي في كل مكان ما تعني بالضرورة ان هذي لعبة ممتازة أو اسطورية!
وعشاننا نحبكم، قررنا نختار أكثر خمس ألعاب نشوف انها الأفضل في هذي السنة. أبهرتنا لعبة اللقاء أو Reunion على الجوالات واللي من تطوير عبدالله كونش – المطور السعودي الطموح جداً، واللي ما حسبنا للعبته أي حساب قبل. برضو عندك Lone Survivor اللي -نفس الشي- قررت تشطح عن الألعاب المعهودة وتقدم رسالة مختلفة للاعب من خلال القنبلة اللي يرميها على اللاعب في نهاية اللعبة.
جربتوا Hotline Miami؟ ما ندري هل جربتها ولالا، ولكن بكل تأكيد أدمنّا على طريقة لعبها الخرافية، والعجيب اننا كنا نستمتع فيها بقدر المرات الكثيرة اللي متنا فيها! وأخيراً لعبة Papers, Please! اللي وصل فينا الادمان اننا سوينا عليها فيديوات كثيرة على قناتنا في يوتيوب، والكثير من المشاهدين انبسطوا عليها.
ولكن كل ألعاب الاندي الرهيبة على جنب، ولعبة Resogun الخرافية على جنب ثانية. تفاجأنا كثير باللعبة اللي اشتغل عليها مطوّر فنلندي مستقل له خبرته العريضة -من أيام التسعينات- في طريقة اللعب. معظم ألعاب المطوّر هذا تلعب على وتر واحد فقط: طريقة اللعب، وهذا الشي اللي فقدناه كثير هاليومين.
وعلى ان البلاي ستيشن 4 بطوله وعرضه نزل للسوق، والكل كان حاط عينه على KillZone: Shadow Fall وKnack، الا ان Resogun سرقت الأضواء بطريقة لعبها، ورسومات ومؤثراتها اللي تحسسك انك تلعب جيل جديد حقيقي، والموسيقى التصويرية المناسبة للعبة، بالاضافة الى طور تعاوني يزيد من جرعة الادمان!
عشان كل هالأسباب اللي ذكرناها، اخترنا لعبة Resogun كأفضل لعبة مطوّر مستقل هذي السنة!
وش رأيك في لعبة Resogun؟ ووش أفضل لعبة مطوّر مستقل بالنسبة لك هذي السنة؟ شاركنا رأيك في التعليقات!
