محمد الشريف
قبل كم يوم، انتشر خبر عن خروج أحد المطوّرين الأساسيين من استديو 343 المسئول عن تطوير ألعاب هيلو الجديدة (Halo). المطوّرة هذي اسمها Corrinne Yu، طلعت من مايكروسوفت وراحت لاستديو نوتي دوق (Naughty Dog) المعروف واللي تملكه سوني.
انتقال المطوّر من استديو الى استديو غالباً يكون خبر عادي، لكن انتقاله الى شركة منافسة فهذا شي يجذب الانتباه. لكن برضو يضل مطوّر واحد مهما كان حجمه، ولو ان المطوّرة هذي يقال انها عبقرية، وانها في يوم من الأيام كانت تشتغل في شركة ناسا الفضائية!
اليوم طلع خبر ثاني، وهو مغادرة أحد الكتّاب الرئيسيين للعبة فول آوت (Fallout). وين راح الشيخ؟ انضم لاستديو جوريلا جيمز (Guerrilla Games) الاستديو المعروف والمملوك لسوني، واللي يسوّي لنا سلسلة كيلزون.
من هالخبرين نقدر نقول ان سوني تتبع خطّة بديهية، وهي تقوية وتعزيز المطوّرين الداخليين لسوني. هذا قرار في مكانه وأتفق معه، سوني لازم تركز كل التركيز على ألعابها اللي من تطويرها، لأن هالمطورين هم اللي حققوا أمل سوني الضايع مع البلاي ستيشن 3 وخلّوه ينجح. تخيلوا البلاي ستيشن 3 بدون حصرياته، هل فيه أحد بيفكر يشتريه؟ ما أتوقع.
وش ناوية تسوّي سوني مع الاستقطاب اللي صاير مع المطورين؟ هل بتكبّر استديواتها بحيث يسوون لها أكثر من لعبة في نفس الوقت؟ أو انهم يضمونهم مع الفرق الموجودة بحيث يضمنون لهم ألعاب أكثر جودة؟ كل هذي أسئلة ما أتوقع نقدر نجاوبها بشكل مؤكد الحين، ومالنا الا نتوقع ونشوف.
فيه شي واحد يستاهل الذكر، وهو ان جوريلا جيمز أعلنت قبل فترة انها تشتغل على لعبة جديدة كلياً. بما ان الكاتب اللي وظفوه هذا جاي من Fallout، فطبيعي ان خبرته بتكون كبيرة في ألعاب العالم المفتوح. هل ممكن تكون لعبة جوريلا جيمز الجديدة هذي لعبة عالم مفتوح؟ شي وارد، خصوصاً وان ألعاب العالم المفتوح صارت موضة الجيل الحالي والجاي.
وش تتوقع بيصير مع ألعاب سوني الحصرية اللي من تطوير استديواتها؟ شاركنا برأيك في التعليقات!
Saudi Gamer
أحمد عصام
