مايكروسوفت تبي تبيع لك محتويات اللعبة، اللي أنت مشتريها أصلاً!

شريت اكس بوكس ون؟ ألف مبروك عليك. هل لاحظت ان أكثر الألعاب الموجودة عليه تدعم خاصيّة بيع المحتويات داخل اللعبة (microtransactions)؟ مثل رايز (Ryse)، وكيلر إنستيكنكت (Killer Instinct)، وفورزا الجديدة (Forza).

موقع كوتاكو (Kotaku) سأل مايكروسوفت عن هذا الموضوع اللي بدأ يقلق اللاعبين حول العالم. رد مايكروسوفت كان:” حنا لا زلنا نتعلم”. المشكلة الأعمق في هذا الموضوع ان المحتويات طريقة بيعها غريب: محتويات كيلر انستينكت تقريباً كلها تنباع عليك بفلوس، والسيارات الرهيبة في فورزا تنباع بسعر غالي عليها، برضو رايز فيها محتويات تنباع بطريقة ما تتبع نفس طريقة الألعاب الثانية المذكورة!

تقول مايكروسوفت انها تتابع طريقة بيع المحتويات داخل هذي الألعاب وانها بعد فترة تبي تطلع بطريقة واضحة تتبعها وتطبقها، والغريب برضو في الموضوع ان المتحدث باسم مايكروسوفت سبينسر (Spencer) ما أعطى جواب واضح لمن قالوا له ان أسعار المحتويات هذي غالي مرة.

برضو يقول سبينسر:” والله ياخي ودّي أتعلم من الأشياء اللي جالسين نسويها، عشان كذا اذا سوينا لعبة، لازم نتأكد من اننا نسويها وبعدها نحلل ردة فعل اللاعبين. من هنا نقدر نكوّن تجربة أفضل للاعبين”.

تجربة أفضل؟ غريبة. أيضاً من أهم الأشياء اللي قالها سبينسر:” ترا شي سهل للمطوّر انه يقول ‘والله ما أخلّي اللاعب يشتري الفوز في اللعبة بفلوس’ لكنه في الحقيقة نصّاب. أنا دائماً ضد هالحركات، لكن الحق ان اللاعبين ما يبحثون عن هذا الشي. اللاعبين يبحثون عن خيارات أكثر في لعبهم”.

اقتباس سبينسر لكلام بعض المطوّرين ماخذه من الانتقادات الواسعة اللي اللاعبين يتّهمون فيها بعض المطوّرين، وانهم يعطون الخيار للاعبين بأنهم يدفعون فلوس عشان يتقدمون في اللعبة اما عن طريق أسلحة قويّة أو دروع أو غيره، وبكذا صار اللاعب يشتري التقدّم في اللعب بفلوس! وهذي مشكلة كبيرة طبعاً.

موضوع بيع المحتويات داخل اللعبة هذا موضوع مزعج بالنسبة لي، حتى لو كانت لعبة جوّال مجانية! ما عندي مشكلة أدفع مبلغ معيّن للعبة جوّال ويفكّني من سالفة اني أشتري أشياء داخل اللعبة، حتى لو جاني وقال ترا اللعبة مجانية! لا يانصّاب، اللعبة لو حسبنا الأشياء اللي داخلها طلعت غالية مرّة.

هذي مشكلة تعوّدنا عليها تقريباً، وخصوصاً في سوق الجوالات. لكن المصيبة انها تدخل عالم الأجهزة المنزلية (consoles)، الأجهزة اللي تشتريه ألعبها بستّين دولار، وبعدها يجيك بكل صراحة ويقولك ادفع لنا زيادة!

على الجانب الثاني، لو تنظر لها من وجهة نظر مطوّر ألعاب، راح تلاحظ ان عالم صناعة الألعاب فعلاً يعاني من التكاليف الباهظة لتطوير الألعاب، وان المطوّر صار يلجأ لأي وسيلة عشان يحاول يغطّي تكاليف التطوير. من الوسائل هذي الأونلاين باس والمايكروترانز آكشنز.

برضو من الأشياء المهمة في هذا الموضوع، ان لو مايكروسوفت نجحت في هذا المجال، فما عندي شك ان سوني راح تمشي في نفس طريقها، وبيعارض اللاعبين هذا الموضوع لفترة ويسوون صجة عليه، لكن مع الوقت راح يسكتون ويتعودون على الموضوع ويصير موضوع عادي، مثل موضوع الأونلاي باس بالتمام.

أعتقد ان هذي مشكلة كبيرة، ومثل ما ذكرت، ألعاب الجوال ممكن نتسامح معها شوي بما انها لعبة جوّال تكاليفها أقل بكثير من ألعاب الأجهزة المنزلية، وبرضو بما انها غالباً تكون ببلاش. لكن أما اني أشتري اللعبة بستّين دولار، بعدها تقولي ادفع لنا فلوس زيادة، هذا موضوع أقف ضده جملةً وتفصيلا.

وش رايك انت في ظهور هذا الموضوع؟ هل انت راضي بموضوع ان اللعبة تعطيك خيار انك تدفع فلوس زيادة عشان تصير اللعبة أسهل عليك بطريقة أو بأخرى؟ شاركنا رأيك في التعليقات!