محمد الشريف
كشفت مايكروسوفت اليوم عن قائمة الأصدقاء في جهازها القادم Xbox One، عرضت فيها بعض الميزات اللي تستاهل النقاش، خصوصاً بعد ما عرفنا الكثير من قوائم البلاي ستيشن 4.
الكشف كان عن طريق فيديو كامل وواضح يشرح لك كل المميزات الجديدة، عكس الصور اللي طلعت من بلاي ستيشن 4، واللي ما شفنا منها الا فيديوات متسربة أو صور ما توضح الا بعض الأشياء عن القوائم.
اللي ما شاف الفيديو، يقدر يتفرج عليه بالكامل هنا:
وهذي أهم الأشياء اللي قالها في الفيديو:
- أول ما تدخل تطبيق الأصدقاء (Friends List)، راح تلقى قدامك الفيديوات اللي رفعتها، الناس اللي تتابعهم، السمعة (reputation).
- بامكانك تحط الأصدقاء المقربين واللي تهتم لهم في قائمة خاصة باسم المفضلة Favorites، عشان توصل لهم بشكل سريع.
- بامكانك تسوي متابعة للاعبين! ما يحتاج ترسل للاعبين دعوة صداقة (friend request)، كل اللي تحتاج تسويه انك تسوي متابعة، مثل تويتر بالتمام.
- بامكانك تضيف ألف صديق في قائمتك. طبعاً قائمة الأصدقاء هي نفسها حقة Xbox 360، لكن الفرق هنا ان اذا اثنينكم اضافوا بعضهم تصيرون أصدقاء.
فيه بعض الأشياء ذكرها مثل نوع جديد من الأتشيفمنتس، وهو آتشيفمنت تسويها في وقت محدد. شخصياً ما أشوف انها اضافة كبيرة.
على الطرف الثاني، هذا فيديو تحليلي جيّد لأغلب القوائم في البلاي ستيشن 4، من ضمنها نظرة سريعة على قائمة الأصدقاء:
لا شك ان فيه قفزة نوعيّة في قوائم البلاي ستيشن، خصوصاً انها في بلاي ستيشن 3 كانت غير عملية وقبيحة وغيره. لكن هل تفوقت على اكس بوكس ون؟
شخصياً، ما أتوقع انها بتتفوق حتى بعد القفزة الكبيرة هذي. مايكروسوفت عندهم باع طويل عريض في هذا المجال، عكس سوني الطموحة واللي تحاول تثبت للناس انها تحسنت من ناحية النظام والقوائم وغيرها.
واجهة اكس بوكس ون يبدو لي انها أجمل وأسرع والتعامل معها أسهل، خصوصاً انها مدموجة مع Windows 8، النظام اللي بدأنا نتعامل معه في جوالات ويندوز والكمبيوترات اللي تدعم آخر نسخة من النظام. أما البلاي ستيشن 4 فهي برضو جميلة ولها طابعها الأزرق اللي يميزها، ولكن هل بيكون التعامل معها سهل؟ هل بيكون النظام سريع ومتجاوب مع المستخدم؟ السؤالين هذي مهمة جداً. وما نقدر نحكم عليها الا اذا جربنا الجهازين.
لكن أنت حسب ما شفت من الفيديوات، وش رايك بالنظامين الى الآن؟ أي واحد منهم تفضل؟ شاركنا برأيك في التعليقات!
أحمد عصام
