محمد الشريف
موضوع اليوم متميّز عن اللعبة المتميّزة Grand Theft Auto V. الجزء الأخير اللي كسّر الدنيا.
في تصريح لرئيس محرري موسوعة جينيس للأرقام القياسية، قال: “تستاهل جراند ثيفت أوتو انها تكون رمز للثقافة البريطانية الحديثة بكل جدارة، وحنا مبسوطين اننا سجلنا هاللعبة في موسوعتنا القياسية”.
ما أتابع كثير الأرقام القياسية، ولكن تصريح مثل هذا من شخص بهذا المكان في موسوعة من أهم الموسوعات في العالم بلا شك يستاهل النقاش والأخذ والعطا.
أما بالنسبة للأرقام القياسية اللي سجلتها جراند ثيفت أوتو 5، فهي كالتالي:
- أكثر لعبة مغامرات باعت خلال 24 ساعة.
- أكثر لعبة باعت خلال 24 ساعة. (أكثر لعبة بشكل عام، مو بس لعبة مغامرات)
- أسرع منتج ترفيهي يربح مليار دولار.
- أسرع لعبة فيديو تربح مليار دولار.
- أكثر لعبة جابت أرباح خلال 24 ساعة.
- أعلى ايرادات لمنتج ترفيهي خلال 24 ساعة.
- أكثر دعاية تم مشاهدتها للعبة مغامرات. (تم منع الفيديو في المملكة العربية السعودية)
طبعاً، هذي الأرقام القياسية أشياء مسجلة على الورق بشكل رسمي. وفيه معلومات ثانية تستاهل الذكر مثل انها أسرع لعبة باعت على شبكة البلاي ستيشن على مر تاريخ الشبكة، وان مبيعاتها تجاوزت مبيعات جراند ثيفت أوتو 4 الاجمالية خلال أربع ثلاث أسابيع فقط! بالاضافة الى كونها رابع لعبة في موقعنا تحصل على تقييم أسطورية.
شخصياً، أعتقد اللعبة تستاهل المدح اللي جاها، ولو ان البعض يبالغ في مدحها. لكن هذا شي يحصل دائماً مع الأشياء الاستثنائية.
الخلطة اللي حطوها لنا روكستار في لعبتهم خلطة عجيبة، وهي خلطة احتوت على كل شي يحتاجه اللاعب في لعبة. نادر جداً تشوف لعبة تحتوي على هذا العدد الهائل من العناصر وتنجزه كله لهذا الشكل الرائع. كثير من الألعاب حاولت تجمع عناصر كثيرة، وفشلت فيها كلها.
اللي أتمنى أشوفه في السنوات الجاية هو ان شركات ألعاب الفيديو تتعلم ان اللعبة لازم تاخذ وقتها في التطوير، مو شرط ان تنزّل لي لعبة في كل سنة عشان تكسب منها أرباح قد ما تقدر، ولكن خل المطوّرين ياخذون راحتهم في التطوير وراح يعطونك نتيجة ممتازة في الأخير.
الأمثلة على هذا بسيطة، مثل Call of Duty وAssassin’s Creed. في كل سنة نسمع ان اللعبتين هذي تبيع بالملايين على ان اللاعبين ما يلاحظون ان فيه اختلافات كثيرة بين الأجزاء الجديدة والقديمة. أما بالنسبة لجراند ثيفت أوتو فهو العكس تماماً، شخصياً كرهت جراند ثيفت أوتو 4 لسبب رئيسي في اللعبة وهو التحكم البطيء، ولكني تفاجأت بالتحسينات الكثيرة اللي سووها في الجزء الخامس، وهذا له علاقة بفترة التطوير الطويلة واللي أخذ المطوّر فيها راحته.
غير كذا، أتوقع ان جراند ثيفت أوتو 5 رفعت بعض المعايير في عالم ألعاب الفيديو بشكل عام وراح تغيّر بعض الأشياء، هذي بعض الأمثلة البسيطة اللي أتوقعها بتصير:
- أول ما تسوي Load game، كثير من الألعاب راح تبدأ لك بمقطع سريع للشخصية اللي تلعب فيها وهو يسوّي شي، مثل مشهد يكون فيه البطل نايم ويقوم وبعدها يعطونك التحكم. مثل ما نشوف في جراند ثيفت أوتو 5 لكن بطريقة ثانية.
- بينزل طور القصة أولاً، وبيخلونه فترة معيّنة الين ما يلعبونه الناس، بعدين ينزلون طور الأونلاين.
- تطبيق خاصية المشتريات داخل اللعبة، او الـmicrotransactions.
فيه برضو نقطة تستاهل الذكر وهي تكاليف اللعبة، يهيّأ لي ان كثير من المطوّرين راح يتأثر بشكل سلبي ويربط نجاح جراند ثيفت أوتو 5 بالتكلفة الباهظة حقتها، ولكن المطوّرين المستقلين دائماً وأبداً واقفين لهذا الشي بالمرصاد، مثل لعبة Minecraft.
اذا كنت تعتقد ان جراند ثيفت أوتو بتغير شي في عالم الألعاب، ايش هي الأشياء اللي بتتغير؟ وايش رأيك بالأرقام القياسية اللي سجلتها اللعبة؟ شاركنا برأيك في التعليقات!
احمد خالد
أيمن اليغشي
