Splinter Cell: Blacklist: انطباعنا عن اللعبة [E3 2013]

سام فيشر، رجل المهمّات السريّة المعروف. رجعت السلسلة أخيراً الى أسلوبها المعروف بعد ما تخلّت عنه في Conviction.

أي لاعب لعب الأجزاء القديمة للعبة بيعرف أغلب الأشياء. الهدف في نهاية المرحلة لازم تحاول توصله بدون ما تنكشف، سنايبر من هناك، كلب قريب منك لازم تنزل وتمشي بخفّة عشان ما يحس فيك، الى آخره من عناصر اللعب المتعارف عليها في سبلينتر سيل.

على اني من الناس اللي أعجبتهم Conviction، الا اني مؤيد لفكرة الرجوع لجذور اللعبة. صحيح الجزء اللي راح كان جيّد من نواحي كثيرة مثل التجربة السينمائية المثيرة ونظام الاحتماء الرائع، لكن لا زلت أشوف التخلّي عن أسلوب اللعبة الأساسي فكرة سيئة.

نظام الاحتماء Cover system لا زال ممتاز جداً. تحتمي في مكان معين ويطلع لك على الشاشة أماكن الاحتماء اللي تقدر تنتقل لها من خلال ضغطة زر وحدة.

نظام التحكم في Conviction كان من أسوأ الأشياء اللي شفتها في ذاك الجزء. تعيين أزرار التحكم “Button Mapping” كان سيء جداً. الأزرار اللي تستخدمها وأنت تلعب كانت حوسة بالنسبة لي. تم تعديل هالمشكلة في الديمو بشكل كبير ولكن لا زالت فيه مشاكل واضحة. لا زلت أحس ان فيه أزرار جاية في المكان الغلط.

وهذي مشكلة كبيرة تطيح فيها أكثر ألعاب التخفّي. تحس ان اللعبة مصممة للتخفّي ولا لها علاقة بالدرعمة والآكشن وراحوا قالوا للناس ان ترا لك الحريّة انك تختار بين التخفي أو الدرعمة. التسلّل والتخفي في هذا الجزء من سبلينتر سيل كان ممتاز، ولكن كل ما كشفوني الأعداء لاحظت اني تلقائياً أعيد اللعبة. مو عشاني أبغى أكمّل المهمة بدون ما أنكشف، ولكن عشاني ما ارتحت لنظام القتال والآكشن أبداً.

هذا كان بالنسبة لانطباعي عن الديمو القصير اللي جربناه في المعرض.

بتنزل اللعبة في أغسطس 2013 على XBox360, PS3, و PC.