صوّت للعبة

Rating: 5.0/5. From 1 vote.

Please wait...

تقييم Dishonored: The Knife of Dunwall

الايجابيات

بطل القصة يتكلّم! اذا لعبت قصة Dishonored الأصلية بتتذكّر كيف ان البطل كان ما يتكلم أبداً، وهو أحد الأشياء اللي ما كانت تعجبني شخصياً لأني احس لاني ألعب بواحد ماله شخصية.
ثلاث مراحل كبيرة نسبياً ومليانه أشياء تدوّر عنها، مع وجود أكثر من طريقه لانهاء المهمّات.
قدرة جديده تمكّنك من انك تستدعي احد “الحشّاشين” اللي في عصابتك عشان يشاركك في القتال، أو تخليه يحاربهم لحاله ويبعدهم عنك لفترة قصيرة.
تعديلات حلوه على القدرات الموجودة سابقاً. قدرة التنقّل بسرعه (Blink) صارت توقّف الوقت اذا استخدمتها وانت واقف (ما تتحرك) أو و انت في الهوا، وهالشي خلاها تصير أمتع بكثير. وقدرة النظر الخارق (Void Gaze) تم تعديلها بحيث تكشف لك أماكن الاشياء اللي تجمّعها في المرحلة، لأن اداة “القلب” اللي كانت تسوي هالشي في اللعبة الأصلية ما عاد هي موجودة. أريح!
أدوات جديدة تستخدمها في الاغتيال مثل الالغام الكهربائية وقنبلة دخان تعمي الاعداء اللي في محيطها. اضافوا لي متعة أكبر وخيارات أكثر كل ما احتجت أخطط لاغتيال شخصين أو أكثر. وسلاح الأسهم تم تعديله بحيث تنطلق الأسهم من جهاز في يد البطل، مو من سلاح مخصّص لهالشي، صارت أرهب!

السلبيات

القصة مو بس خايسه، لا وماهي كاملة بعد. صدق انه هالشي يطمنّي انه راح أشوف اضافات زياده، بس ياخي عطني نهاية زي الناس! نهاية اللعبة تحسها نهاية مرحلة عادية، حتى ما توقّعت اني خلصت الاضافة أصلاً الا يوم طلعت الأسامي.
مشاكل تقنية مزعجة كانت تأثر على اللعبة أحياناً، زي انك توقّف ورا واحد وتحاول تخنقه بس تكتشف أنه الزر ما يستجيب. و ظهور بعض الاعداء بشكل مفاجيء في اماكن انت متأكد انك صفّيت كل اللي فيها.
اضافة قصيرة راح تاخذ منك حوالي 3-4 ساعات اذا ناوي تتخفّى وتمخمخ على الاعداء، و ساعتين الى 3 ساعات (يمكن اقل حتى) اذا ناوي “تدرعم” وتخلّص كل مرحلة بسرعه بدون تخفّي.
فقدت Tallboy (العدو اللي راكب آله تعطيه رجول أطول)، لأنه كان يضيف متعة وتنويع للعب، بما انك ما تقدر تغتاله زي ما تغتال باقي الجنود. كل الجنود في هالاضافة تقدر تغتالهم بنفس الطريقة.
“الحشاش” اللي تستدعيه زلابه ما يعرف يتخفّى. كنت أحسب اني اقدر استدعيه خلف العدو بحيث هو يغتال واحد وانا اغتال واحد ثاني بدون ما احد يدري، بس لازم يسوي ازعاج الله يهديه! هالشي خلاني ما استخدمه ابداً بما اني ابي انهي اللعبة بالتخفّي.

التقييم النهائي

ابو كلب
تمشي الحال
ممتعة
ممتازة
اسطورية

الزبدة

اذا اعجبتك Dishonored، فالاضافة هذي بتعطيك جرعة اضافية حلوة فيها شوية تجديد وتنويع في اسلوب اللعب. سعر الاضافة 10$ (38 ريال تقريباً)، اضمن لك بتحلّل قيمتها اذا تحب التخفّي وتجربة أكثر من طريقة لانهاء المهمّة. وعلى الرغم من عيوبها، الا انها كانت ممتعة جداً بالنسبة لي.