تومب رايدر وانتشارتد: من الأفضل؟ تحليل ومقارنة بين اللعبتين

في آخر جلساتي مع الجيمرز، دائماً نفتح موضوع تومب رايدر الأخيرة ونبدي اعجابنا فيها، وكيف اننا ما توقعنا منها شي وفاجأتنا واعتبرها شخصياً من أفضل ألعاب السنة. لكن الغريب ان في آخر نقاشاتي مع الجيمرز ألاحظ ان كثير منهم بدأ يفضلها على أنتشارتد. لذلك حبيت أبدأ موضوع نقاشي عن روعة تومب رايدر الأخيرة وصحة مقارنتها بلعبة مثل أنتشارتد، اللعبة اللي يعتبرها الكثير من أفضل ألعاب الجيل.

نبدأ النقاش أولاً بالكلام عن تومب رايدر، من زمان وأنا أبغى أوضح أشياء كثيرة أبهرتني في اللعبة. نبدأها وحدة وحدة ونناقشها:

كيف تتفوق تومب رايدر على انتشارتد

تصميم المراحل

مراحل مفتوحة على بعضها متوسطة الحجم، لا هي كبيرة تضيعك مثل ألعاب العالم المفتوح ولا هي خطيّة تطفشك، تشوف الطريق قدامك واضح ومكشوف ولكن فيه على اليمين واليسار أشياء تاخذها تستفيد منها -ذخيرة، مستندات صوتية، فلوس- هذا من غير ذكر روعة البيئات وسحرها من انهار وشلالات وأشجار وأشياء تفتح النفس.

اللعبة بشكل عمومي من الناحية المرئية شي يسحر العين، وعلى اني لعبتها على البلاي ستيشن 3 الا اني استمتعت كثير باللعبة. خصوصاً التنقل ما بين البيئات، مرات تلقى نفسك تلعب في كهوف مقفلة مظلمة كئيبة ولكن بعدها تلقى نفسك طلعت في شاطئ مشمس تشوف ساحل البحر والأشجار من حولك.. تتمنى ان الأماكن هذي حقيقية.

الأسلحة والتطويرات

نظام القتال بشكل عام لعب دور هائل في اللعبة. في بداية اللعبة يمكن تلاحظ ان نظام القتال عادي، لكن مع تقدمك في اللعبة وتطويرك للأسلحة وحركات لارا بتلاحظ ان نظام القتال عنصر ممتاز جداً في اللعبة. كثير من المرات ألقى نفسي أخلط ما بين الأسهم والضرب، أو اني أخلي العدو يقرب مني واطعنه في ساقه بعدها أنهيه بضربة بالفاس على راسه. شخصياً أعتبر تومب رايدر أفضل لعبة طبقت الأسهم بشكل صحيح وممتع.

طريقة اللعب

وهذي عموماً من أهم العناصر في أي لعبة، وغالباً ما تكون هي العنصر الحاسم في أي لعبة. تومب رايدر قدمت لنا طريقة لعب معروفة “بلاتفورم أو مناقر” لكنها طبقتها بشكل ممتاز. استمتعت كثير وانا أتسلق في البيئات اللي أحسنوا تصميمها، واستمتعت بحل الألغاز في التومبز -ولو ان أغلبها سهلة- واستمتعت أكثر شي بالتسلل ورا الأعداء وانهاءهم بضربة وحدة. هذي من الالعاب اللي من جد عرفت تجمع ما بين طريقة القتال المكشوف والتسلل، اللاعب مخير بشكل كامل بين الخيارين وكلها مضبوطة الى أبعد الحدود.

التمثيل

وأقصد بالتمثيل تمثيل لارا وهي تلعب. شخصياً أعتبر لارا أفضل شخصية من ناحية التمثيل. لاحظ شكلها لارا وهي تتسلق، لاحظ شكلها اذا دخلت منطقة ضيقة في كهف وحطّت يدها على الجدار بشكل حذر، لاحظ تصرفاتها اذا وصلت عند رياح وراحت تغطي وجهها بشكل واقعي، لاحظت لارا اذا وصلت عند حجر كبير واندست وراه بشكل تلقائي؟ صعب جداً نلقى لعبة فيها تمثيل مضبوط الى هالدرجة.

لاحظ في هذا المقطع، لاحظ تمثيل لارا وهي تمشي على جذع الشجرة، لاحظها اذا قربت من الشلال وحسّت برذاذ الموية الباردة، لاحظ تمثيلها وهي تتسلق عند الشلال، وغيرها من الأشياء اللي ممكن تكون بسيطة للبعض لكنها تهمني كثير.

هذا بالنسبة للجوانب اللي تميزت فيها، وأما بالنسبة للأشياء اللي أحبطتني في اللعبة واللي تمنيت ان كريستال دايناميكس يتفادونها هي النقاط اللي بأذكرها الحين:

جوانب الضعف في تومب رايدر

طور تعدد اللاعبين السيء

مافيه لاعب سألته عن أونلاين تومب رايدر الا وقالي انه سيء. أصابني احباط هائل من اللي شفته. تمنيت ان اللعبة ما احتوت على الاونلاين من الأساس. البعض يمكن يقول: طيب طالما ان طور القصة أعطاك تجربة كاملة ليش تشتكي من الأونلاين وهو مجرد اضافة؟ ردي على هذا هو ان المطور لازم قبل لا يحط أي شي في لعبته، يتأكد انها وصلت الى حد مقنع من الجودة. أما ان المطور يلفق ويجرب ويحط أشياء أي كلام فهذي عادةً أعتبرها نقطة سلبية، ولو ان البعض يعتبرها شي ماهو أساسي في اللعبة.

الاضافات المحبطة

للأسف أعلنت الشركة قبل فترة ان كل الاضافات بتكون لطور تعدد اللاعبين فقط! طيب والقصة الممتازة اللي اعطيتوها لنا ما راح تضيفون عليها ولا حتى “تومبز” وأماكن جديدة؟

الشخصيات الضعيفة

من بدأت اللعبة وانا ماني مهتم بأي شخصية أشوفها قدامي الين ما أنهيت اللعبة غير لارا. شخصيات ضعيفة جداً تنساها بسرعة.

أما بالنسبة للمقارنة بينها وبين أنتشارتد، فأنا شخصياً أعتقد ان المقارنة محسومة لصالح أنتشارتد. وهذي الأسباب:

كيف تتفوق انتشارتد على تومب رايدر

الشخصيات أفضل بسنين ضوئية من شخصيات تومب رايدر

دريك، سولي، إيلينا، كلوي. كل هالشخصيات لا زلت أذكرها بالاسم وأذكر مواقفها وأحداثها. كل هذا بسبب الاعتناء الكبير بالشخصيات في سلسلة أنتشارتد، وهذا شي أعتبره من الأسباب الرئيسية لنجاح أنشارتد. أما بالنسبة لتومب رايدر، فما أذكر حتى أسماء الشخصيات ما عدا لارا، وواحد ثاني شايب له كم موقف جيد في اللعبة.

الموسيقى أفضل من تومب رايدر

شغل الساوندتراك هذا لأي لاعب، وانتظر ردة فعله.

ولا زلت أذكر الساوندتراك هذا واللقطة المبهرة اللي صارت فيه.

الجرافيكس أفضل

على ان تومب رايدر أبدعوا بنواحي كثيرة جداً سواءاً في الجرافيكس أو من النواحي المرئية بشكل عام، الا أن أنتشارتد لها اليد العليا. ولا أظن فيه كثير بيعارضون على قوة جرافيكس أنتشارتد.

الحوارات والتمثيل الصوتي مضرب مثل، عكس تومب رايدر

أعتقد التمثيل الصوتي عموماً في تومب رايدر اما انه عادي أو انه أقل من عادي. أما بالنسبة لأنتشارتد فالتمثيل الصوتي من أروع ما يكون. أما بالنسبة للحوارات، فما أظن فيه حوارات أفضل من حوارات أنتشارتد خصوصاً الفكاهية منها.

اللقطات الحماسية/السريعة أفضل من تومب رايدر

أظن الكل يذكر اللقطات الـ Set-pieces وروعتها في الجزء الثاني والثالث من أنتشارتد، لدرجة ان أغلب الألعاب اللي نزلت بعدها قامت تحاول توصل لمستوى أنتشارتد من هذي الناحية، بعضها يحاول بشكل يائس وبعضها حاول بشكل رائع مثل تومب رايدر تماماً، ولكن تبقى الأفضلية لأنتشارتد.

تومب رايدر في المستقبل.. وين الاتجاه الصحيح؟

من كثر اعجابي بتومب رايدر الأخيرة، جاتني لحظات أقول في نفسي هل باقي لهم شي من الابداع يسوونه في الاجزاء الجاية؟ أحسهم وصلوا الى أبعد مستوى يقدرون عليه وبيطيحون في مشكلة طاحت فيها سلسلة أنتشارتد، وهي ان بعد نزول أنتشارتد 2 بمستواها الخرافي رفعت المعايير الى حد غير معقول، وللأسف الجزء الثالث على انه أسطوري الا ان الكثير قال “ياخي ماحسيت بنفس الذهول اللي جاني في أنتشارتد 2!”

لكن بعد التفكير، أعتقد ان تومب رايدر في أجزاءها القادمة لو تركز على الأشياء اللي بأذكرها بتحافظ على نجاحها:

تومب رايدر القادمة.. عالم مفتوح بالكامل

لاحظنا في الجزء هذا ان كثير من المراحل حجمها كبير ومناسب للعبة، ولكن أعتقد ان لو صار الجزء الجاي مفتوح بشكل كامل بحيث يكون فيه مهمات جانبية كثيرة بالاضافة الى المهمات الرئيسية راح يكون افضل للسلسلة. اضف الى ذلك ان مع اضافة العالم المفتوح راح يضطرون يحطون آليات للتنقل، مثل السيارات أو القطارات أو غيرها من وسائل النقل السريع. بالاضافة الى وضع أشياء جانبية مثل تجميع المستندات وغيرها، أتوقع لو يقتدون بالأسطورة Red Dead Redemption في كثير من عناصر العالم المفتوح راح تنجح نجاح كبير.

تغيير أكثر في البيئات

كثيرين من اللي سألتهم عن البيئات كانوا يتذمرون من كون اللعبة في جزيرة وحدة فقط. بعض اللاعبين كان يتمنى ان فيه أجزاء من اللعبة تكون خارج الجزيرة. وعلى اني أحس اني اكتفيت من اختلاف البيئات في اللعبة، الا ان آراء اللاعبين تغلب على رأيي.

حط أونلاين زي العالم ولا لا تضيع وقتك ووقت اللاعبين

رجاءاً ياكريستال دايناميكس، الأونلاين في الجزء القادم لازم يكون على الأقل “مقبول” وقابل للعب. أما سالفة الهبوط الفضيحة في الـframe rate “بطء شديد أثناء اللعب” وتصميم الخرايط البائس وخلو اللعبة من أي شي جديد فهذا شي غير مقبول بتاتاً للعبة أعتبرها من أفضل ألعاب السنة.

الى هنا أعتقد ان كتبت اللي في خاطري. لكن يبقى الرأي الأهم وهو آراءكم انتم، وش رايكم في النقاط اللي ذكرتها وهل لكم تعليقات عليها؟ وهل تعتبر تومب رايدر وصلت الى مستوى أنتشارتد؟ ياليت توضح لنا الأسباب!