صوّت للعبة

Rating: 4.2/5. From 24 votes.

Please wait...

صورة تقييم Metal Gear Rising

الايجابيات

فكرة اللعب بشخصية رايدن ممتعة بحد ذاتها. شخصياً اعجبتني شخصيته في Metal Gear Solid 4، وتمنيت ينزلون لعبه يكون هو بطلها. وبصراحه انتظر لعبه زي هذي من الجزء الاول من ميتل جير بعد ما شفت شخصية Grey Fox (اللي بالمناسبة تقدر تحمّل لبسه وتلعب فيه).
فكرة التقطيع الدقيق باستخدام السيف رهيبه وممتعة. ويزيدها متعه مسألة انك تحتاج تقطع الاعداء من مكان معيّن في النص عشان تجمّع اشياء منهم. وبعض الاعضاء تكون عندهم يد يسرى مميزة تقدر تقطعها بعد عشان تجمعها وتفك اشياء في اللعبة.
اسلوب صد الضربات في اللعبه زادها متعة بالنسبة لي. عكس الالعاب اللي عادة تطلب منك تعلق على زر معين عشان تصد، في هذي اللعبه عشان تصد ضربة عدوك، لازم تضربها بعكس اتجاهها وفي نفس الوقت. وتصير عملية الصد امتع اذا كان عدوّك معه سيف مثلك، يقلب الموضوع مبارزه حماسيه وممتعة بينك وبينه.
القتال مع الزعماء في اللعبة ممتع وحماسي جداً (باستثناء واحد يمكن).
مهام الواقع الافتراضي (VR Missions) ممتعة، وتحتاج تدورها في مراحل طور القصه عشان تفك كل مهمة. فيه 20 مهمة واقع افتراضي.

السلبيات

اجمالاً، المنتج بدائي وماهو بالجودة اللي تعودناها من سلسلة ميتل جير. قصة سطحية جداً. حوارات باسلوب بدائي واحياناً مضحك. مشاهد سينمائية طوييييله مثل ما قال لنا كوجيما في مقابلة سابقه. موسيقى Rock رخيصه. حتى المؤثرات الصوتيه ما ضبطتها الشركة المطوّرة صح بحيث تكون نفس المؤثرات الصوتيه اللي نسمعها عادة في العاب ميتل جير.
زاوية التصوير اللي تشوف منها لاعبك غير عملية نهائياً. يا حبايبي يا شركات الالعاب: ببساطة، اذا كان البطل يبي يقاتل عشرين عدو في نفس الوقت من جميع الجهات، ارفعوا الكاميرا فوق شوي! ياما جتني ضربات من اعداء ما كنت ادري انهم بيضربوني لانهم كانوا في مكان عكس زاوية الرؤية حقتي.
نظام قتال بدائي لسبب بسيط: الاعداء ما يجبرونك على التنويع في حركاتك عشان تتجاوزهم. فمع اني فكّيت حركات واسلحة كثيرة خلال لعبي، الا انني ما احتجت استخدم اكثر من 4 ضربات طوال اللعبة ومع جميع الاعداء!
قائمة تغيير الادوات والاسلحة الجانبية غير عملية نهائياً. والغريب انك ما تقدر تفتح القائمة وانت تركض بسرعه! مادري ليش لازم تخلي لاعبك يهدّي او يوقّف اول. هذي لعبه سريعة المفروض تغيير الادوات والاسلحة ما يكون بهالبطء.
طور القصة طوله 5 ساعات فقط (اذا ما حسبت العروض).

التقييم النهائي

ابو كلب
تمشي الحال
ممتعة
ممتازة
اسطورية

الزبدة

اذا انت عاشق لسلسلة Metal Gear وتتوقع انك بتلقى نفس نظام اللعب هنا، فانسى الموضوع. اذا كنت متفهّم انه جزء جانبي واسلوبه مختلف، ولكن في نفس الوقت تتوقع انها بالجودة المتوقعه من العاب سلسلة Metal Gear، برضه انسى الموضوع. اما اذا كنت مثلي تعشق شخصيات الننجا اللي ظهرت في سلسلة Metal Gear وتبي تجرب تلعب بواحد منها، فهذي لعبه "لازم" تلعبها. ومع النقص الموجود في العاب الاكشن من هذا النوع، اتوقع اذا كانت تستهويك العاب زي Devil May Cry و God of War فبتعجبك هذي.