مرور اربع سنوات على تأسيس سعودي جيمر!

اليوم يوافق مرور أربع سنوات على تأسيس موقعنا سعودي جيمر.

برأيي هذي كانت أفضل (وأميز سنة) للموقع، لأن صارت فيها أشياء كثيرة نسويها لأول مرة:

• في شهر مارس تركت وظيفتي للتفرغ لسعودي جيمر وتطويره بشكل أفضل. صح الوظيفه تريحك مادياً، لكني مؤمن جداً باللي جالسين نسويه وابي اعطيه كامل وقتي، حتى لو اضطريت اضحي ببعض الاشياء.
• شهر مارس كان أيضاً الشهر اللي قررنا فيه (ولأول مره) نتوسّع ونضيف الفيديو لنشاطاتنا الرئيسية. خبصنا تخبيص جامد في البداية في قناتنا على اليوتيوب الى ما قدرنا نوصل لتوجه يناسبنا ويناسب جمهورنا في الفيديوهات.
• أول ما اعتمدنا الفيديو كنشاط رئيسي كان عندنا ما بين 2000 الى 3000 مشترك على قناتنا في اليوتيوب. خلال 9 شهور حصلنا على 43،000 مشترك اضافي، وهو عدد كبير ماشاءالله بالنسبة لقناة متخصّصة.
• صرنا في وقت قياسي “بارتنر” (شريك) في شبكة Machinima على اليوتيوب (اضخم شبكة متخصصة في الالعاب الالكترونية عالمياً)، وهالشي اتاح لنا مزايا اضافية ما كانت متوفرة سابقاً، بالاضافة الى دخل مادي.
• في شهر مايو قررنا نبدأ نكتب “تقييمات سريعة” في الموقع على سبيل التجربة. كنا نبي التقييم يساعد الشخص انه يقرر اللعبه تستاهل ولا لا في أسرع وقت ممكن بدون ما يضيع وقته في قراءة تفاصيل يمكن ما يحتاجها.
• في شهر يونيو سافرت الى لوس آنجليس في امريكا لتغطية اضخم حدث للالعاب E3. مع اني رحت السنه اللي فاتت، الا ان هالمره تميزت بشيئين: حضور جميل معي في التغطية، وانتاجنا لمسلسل كامل (مسلسل “الطريق الى E3”) يوضّح مصاعب تغطية معارض زي كذا.
• في يوليو سوينا برنامج رمضاني مكوّن من ثلاث حلقات اسمه “اطلق الجيمر الذي بداخلك”، استضفنا في مشاهير من مجالات مختلفه واسكتشفنا حبهم الكبير للالعاب، وهم بدر صالح، ومالك نجر، وصالح الزيد.
• في اغسطس أيضاً صار فيه سابقه بالنسبة لتغطية المعارض، وهو بدال ما اروح لتغطية معرض Gamescom في المانيا لحالي كالعاده، كان معي كامل فريق العمل! (عدا احمد الاحمري اللي منعته ظروفه)
• في اكتوبر كتب محمد مقال هدفه كان انه فقط يعبّر عن احباطه بريزدنت ايفل 6، لكن لاقى المقال اقبال كبير، ومع الوقت قررنا نعتمد المقالات كنشاط رئيسي لنا في الموقع.
• في اكتوبر أيضاً قررنا نبدأ نبث بعض تجاربنا للالعاب بشكل مباشر، وهالشي كان ممتع جداً لنا ولجمهورنا بنفس الوقت، وخلانا برضه نعتمد البث كنشاط اساسي في قناتنا للبث المباشر. وعلى نهاية السنة ترقّت قناتنا الى تصنيف “شريك” (partner) واعطانا الموقع مزايا اضافية تميزنا عن القنوات العادية.
• وما ننسى طبعاً برنامج البودكاست الاسبوعي اللي مر بتطويرات كثيرة بناءاً على اقتراحاتكم وملاحظاتكم.

هذي كانت مجموعه من أبرز الاشياء اللي سويناها هالسنة وساعدت في تطوّر الموقع بشكل كبير، وهالشي ما كان ممكن يصير لولا توفيق الله ثم دعم المتابعين المستمر لنا بالنقد والملاحظات او حتى التشجيع. فمهما بذلنا جهود ومهما سوينا تضل انت الأساس كمتابع، وانت اللي تساهم في تحديد استمراريتنا في تقديم الافضل من عدمه.

وش ناوين هالسنة؟

البعض ممكن يعتقد انه لازم “نكبر” أكثر من ناحية عدد الاشياء اللي نسويها، لكن للامانه افضّل اننا نكون مميّزين باشياء معدوده ونركّز عليها عشان تطلع بافضل صوره، على اننا نكون مشتّتين انفسنا بين اشياء كثيرة نسويها ولا نتميز بشي منها.

اعمالنا الجاية ان شاءالله بتكون مركّزة على عدة اشياء من اهمها:

• نطوّر المحتوى اللي نكتبه وننتجه لك كمتابع، ونستمر على تقديم الاشياء بشكل مميّز وغير تقليدي.
• نساهم في اننا نخلي الناس ياخذون مجال الالعاب الالكترونية بجدّية أكبر، ونصحّح الصورة السلبية الموجودة عنها في المجتمع.
• نكبّر سعودي جيمر كـ”بزنس” بحيث يكون عندنا القدرة المالية اللي تساعدنا على تنفيذ أفكار رهيبه للموقع ونشاطاته، بدون ما يأثر هالشي على مصداقيتنا، علماً باننا نحقق ارباح من السنه الماضيه ولله الحمد.

وبهالمناسبة، نبي نتواصل قريباً ان شاءالله (خلال هالاسبوعين) مع أبرز متابعين الموقع القدامى (بالاضافه لبعض المتابعين الجدد) ونرتب لنا جمعه بسيطه نسولف فيها معهم ونعرف آرائهم ووجهات نظرهم عن اللي نسويه، ونسولف سواليف توسع الصدر. 🙂