أفضل لعبة في 2012 (أفضل ألعاب 2012)

Far Cry 3 (فار كراي 3)

نزلت على: PC, Xbox 360, PS3

لعبة السنة! وصلنا أخيراً للقب المنتظر، الوسام الأعلى لأي موقع ألعاب في العالم.

ألعاب كثيرة ممتازة نزلت هذي السنة، وألعاب كثيرة ترشحت لهذي الجائزة، وألعاب كثيرة تجادلنا فيها وطال النقاش بيننا. وبعد النقاشات والجدال الطويل والاختيارات الكثيرة، لعبة وحدة طاحت عليها أغلب أصابع الاختيار لفريق العمل. فار كراي 3! اللعبة اللي نزلت في وقت متأخر في السنة، وكانت أفضل ختام لسنة استمتعنا بالألعاب اللي فيها.

فار كراي ٣، اللعبة اللي جمعت خصائص كثيرة من أنواع كثيرة، أخذت عنصر التصويب من المنظور الأول، وعنصر العالم المفتوح، وعنصر تطوير الشخصية وتفكيك قدرات جديدة، وعناصر التخفّي، وغيرها من العناصر اللي صعب تجمعها في لعبة وحدة، وكلها جمعتها وأبدعت فيها كلها! في فار كراي 3، بامكانك تلعب بالطريقة اللي تبغاها، اذا تبغى تطلع سلاحك وتقاتل الأعداء على طريقة كول أوف دوتي، أو تتخفى بين الأشجار وتتسلل ورا الأعداء وتتخلص منهم مثل ما نسوي في ألعاب التخفّي. بدال ما توصل للهدف اللي تبغاه عن طريق خط واحد مسيّر فيه، تقدر تخترع لك طرق كثيرة للوصول للهدف وانجاز المهمة بطريقتك. بدال ما تلزم نفسك بالمهمات الرئيسية والقصة، تقدر بكل بساطة تروح تستمتع بالمهمات الجانبية الي غالباً تلهيك عن المهمات الرئيسية.

وعلى عكس الكثير من الألعاب اللي تلقى كل شي جاهز معك من البداية، فار كراي 3 تعطي اللاعب شي بسيط في البداية، والباقي تفكّه انت من قدرات خرافية تزيد من متعتك للعبة أو حتى أشياء تستفيد منها مثل تطوير الشخصية بحيث تصير تقدر تشيل عدد أكبر من الذخيرة والأسلحة والفلوس وغيرها. ومن أهم مميزات اللعبة، الجرافيكس الخطير اللي تستمتع بشوفته وأنت تلعب (بالذات على اجهزة الـPC)، مناظر عشبية وبحيرات وشلالات ساحرة. ومن الأشياء الممتعة في فار كراي، الحياة اللي فيها مضبوطة الى أبعد حد، وانت تمشي في اللعبة تلقى نمر يلاحق فريسته، أو جنود ماسكين رهاين، أو جيب منقلب وحوله جنود اللي كانوا فيه متورطين، وغيره الكثير والكثير من الحيوية اللي تشوفها في اللعبة واللي تزيد من انبهارك باللعبة. هذا كله، ضيف عليه طور تعاوني وطور تنافسي لا بأس فيها وتطوّل من عمر اللعبة. بناءاً على كل هذي الميزات، وبعد الكثير من النقاشات، طاح اختيار أفضل لعبة في السنة على فار كراي 3!

وش كانت أفضل لعبة في السنة بالنسبة لك؟ شاركنا برأيك في التعليقات!

فيديو اللعبة: