خالد عبدالله
جهاز الوي يو أحد الأجهزة الي أصدرت سنة 2012 قبل إصدار البلايسيتشن فور و الإكسبوكس ون، ويعتبر أحد أجهزة الجيل الثامن. يمكن أكثر أغلب الناس عندنا مجرد ما يسمع إسم الوي أو الوي يو على طول يجي في باله جهاز بمواصفات تعبانة و مافيه الا كم لعبة نصها ألعاب لسوبر ماريو، لكن لو نجي نشوف الشركة المصنعة نينتندو الي هي تعتبر أحد الشركات الي غيرت تاريخ الجيمنق تماماً بعد إنتشاله من كارثة أتاري لما أصدرت لعبة E.T.
الزبدة…
في المقالة ماراح أناقش مواصفات الجهاز واقارنها مع الأجهزة الآخرى لسببين:
- الجهاز أصدر قبل أجهزة الجيل الحالي (PS4 & Xbox One).
- اذا الجهاز يشغل ألعابه بكل أريحية و بدون مشاكل فما بتفرق معك المواصفات!
أحب أنوه إني ماني شخص متعصب لنينتندو و أكره بقية الشركات، بالعكس أمتلك جهاز بلايستيشن 4 و أغلب أجهزتنا الحاسوبية من مايكروسوفت، لكن الأسباب هذي بعد ما جربت جهاز الوي يو لفترة لا بأس بها.
1. الأرخص سعراً بينهم!
أول سبب راح يخليك تشتري الجهاز هو سعره الرخيص مقارنة بجهاز الإكسبوكس ون او البلايسيتشن فور. طبعاً كثير راح يقولون انه يباع عندنا بالسعودية ودول الخليج بسعر أغلى ويتجاوز سعر باقي الأجهزة، لكن تقدر تشتري الجهاز من امازون وراح يكلفك مع الشحن 314$ (1179 ريال).
2. إلعب ألعاب الجيل القديم بكل أريحية!
هذا أحد الأسباب القوية جداً في شراء الوي يو، وغير موجود على الأجهزة الآخرى (مايكروسوفت أعلنت عن الميزة قبل كم أسبوع). فقط الي تحتاجه:
- يد تحكم لجهاز الوي القديم وتوصلها مع الوي يو.
- بعدها تحط شريط من ألعاب الوي القديم وراح تشتغل معاك بدون أي تعقيد.
غير كذا تقدر تحمل الألعاب من eShop (المتجر الالكتروني) الي موجود بالجهاز فيه ألعاب من أجهزة قديمة مثل العائلة و القيم كيوب و اسعارها رخيصة!
3. حصريات الزمن الجميل!
يمكن ما يكون ذاك السبب القوي الي يخليك تشتري الجهاز، لكن تخيل جهاز مع حصريات ثابتة وماراح يسحبونها عليك وتقعد تتمنى الشركة تنزلها مرة ثانية. أتوقع شي جميل جداً خصوصاً لو كانت ألعاب عشت معها من أيام الطفولة مثل: سوبر ماريو و The Legend Of Zelda وغيرهم.
4. أفضل جهاز لتعدد اللاعبين المحلي!
ميزة رهيبة ماراح تحس فيها الا لما تجربها بنفسك، تخيل انك تلعب بنمط تعدد اللاعبين المحلي (Local Multiplayer) وكل واحد فيكم بيد تحكم مختلفة! و شركة نينتندو متميزة دائماً في هذا الشي، طبعاً نمط تعدد اللاعبين (الأونلاين) لا يحسب من ضمن هذا النمط. وغير كذا الي يمسك جهاز الوي يو راح تكون شاشته معاه مايحتاج يطالع في التلفزيون!
5. ماراح تحتاج التلفزيون كثير!
هذا الشي أتوقع يعاني منه الكثير خصوصاً لو فيه تلفزيون واحد بالبيت، ويجيك أخوك ولا أبوك يبغى يشغل التلفزيون، لكن لو معك جهاز الوي يو ماراح تفرق معك! لأنك بتكمل تلعب بالشاشة الموجودة بالجهاز (مو كل الألعاب تدعم هالشي) شخصياً شبكت الوي يو على شاشة الكمبيوتر وصرت احول للكمبيوتر وجهاز الوي يو شغال والعب فيه بدون مشاكل.
في النهاية
أخيراً، هذي من خلال تجربتي للجهاز، اشتريته طبعاً من امازون بسبب ارتفاع السعر هنا. اذا عندكم أشياء ثانية خلتكم تشترون الجهاز شاركوني فيها بالتعليقات!
احمد خالد
بارعة