أحمد قربان
ستديو كودماسترز (Codemasters) المطور لسلسلة لعبة ديرت (Dirt) اعلن عن تطويره لجزء جديد من السلسلة، اللعبة راح تكون محاكاة لسباقات الراليات. راح تصدر فقط على جهاز البي سي و اليوم تم اطلاق امكانية الدخول المسبق (Early Access) الى اللعبة. اسم اللعبة ديرت رالي (Dirt Rally) وموجودة حاليا على شبكة ستيم بقيمة 25 دولار مايعادل 94 ريال.
عرض للعبة:
اللعبة تم تطوريها من نفس فريق سلسلة ديرت، راح تحتوي على 17 سيارة و 36 مرحلة من 3 مواقع مختلفة وهي Wales، Monte Carlo و Acropolis، على كلام المطورين انها اكثر لعبة طوروها من ناحية الواقعية وتحاكي السباقات بشكل دقيق.
ايضا اللعبة راح تعاقبك اذا مااخذت المنعطفات بشكل ممتاز، لما السيارة يصير لها ضرر راح يستمر الضرر الى السباق التالي، وتقدر تصلحها بين السباقات، لكن راح يكون عندك وقت محدود لتصليح السيارة و عدد محدود من المهندسين اللي يصلحوها لك، راح تقدر توظف مهندسين اكثر عن طريق التلفيل في اللعبة.
الاستديو وضح ايضا ان اللعبة ماراح تحتوي على اي مشتريات داخلية، كل التحديثات اللي راح تنزل على اللعبة مجانية. راح يتم اضافة سيارات جديدة الى اللعبة في نهاية شهر مايو القادم وراح يتم اضافة سباقات في المانيا في نهاية شهر جون.
بالنسبة لنسخة الاجهزة المنزلية الى الان مافي خبر اكيد حول نزول اللعبة عليها او لا.
قال باول كوليمان (Paul Coleman) مخرج اللعبة: “بالنسبة لي هذا الجزء هو الجزء الرابع من سلسلة ديرت، لكن حاليا احنا في محادثات مع المسؤولين حول اطلاق اللعبة على الاجهزة المنزلية وعندنا اشكالية في اطلاق اسم ديرت عليها لان هذا الشيء راح يجعل الناس يتوقعوا محتوى معين وممكن مايكون موجود في اللعبة”
كمل باول: “اتمنى اننا نوصل لاتفاق و نبني الجزء الرابع على اللعبة اللي اطلقناها حاليا،اتمنى ان اللعبة اللي اطلقناها حاليا تعجب الناس و نستمر في تحسينها للوصول الى طموح وتوقعات اللاعبين”
قال ايضا باول: “الى الان هذا الشيء يعتمد على الوضع الحالي للعبة، مهم جدا ان الناس يجربوا اللعبة الحالية و يعطونا ارائهم واقتراحاتهم حول اللعبة. اذا الناس مااعجبتهم اللعبة راح نضطر اننا نسوي شيء جديد ونبدا عليه من الان، ممكن اذا مااعجبتهم اللعبة راح نرجع لاسلوب اللعبة القديم. لكني لاحظت ان بعض اللاعبين صاروا يلعبون اجهزة منزلية و بي سي في نفس الوقت ولاحظت انهم متحمسين للعبة سباقات اعمق و تجربتها جديدة بحيث انها تستاهل انهم يدفعوا عليها”
الجدير بالذكر ان ستديو كودماسترز قللوا عدد الموظفين خلال الشهور الماضية، اول لعبة راح يطلقها الاستديو على اجهزة الجيل الجديد هي لعبة F1 2015 وراح تصدر في شهر جون القادم.
اش رايكم بالخبر؟
Saudi Gamer
