أحمد قربان
قال جيف قاتيس (Jeff Gattis) رئيس التسويق في شركة فالف (Valve) ان جهاز فايف (Vive) القادم بالتعاون بين HTC و فالف والمنافس لاجهزة الواقع الافتراضي راح يقدم افضل تجربة واقع افتراضي ممكنة في العالم، هذا يعني ان سعر الجهاز راح يكون مرتفع عن الباقين.
قال جيف: “احنا نبغا نقدم افضل تجربة واقع افتراضي في العالم، هذا الكلام ليس تسويق للجهاز اكثر من اننا نبغا نوضح وضع جهاز فايف بالسوق. الجهاز هذا راح يعطيك تجربة ممتازة، بالرغم من ارتفاع سعره قليلا الا اننا نشوف ان هذا الشيء الصح من وجهة نظرتنا الاستراتيجية.”
وتكلم جيف عن السعر وقال: “السعر دائما راح يقل مع نمو السوق المنافس، بما اننا عارفين ان بعض الشركات بتشتغل على اجهزة شبيهة و هذا يعني ان اسعارنا لازم تكون قريبة منهم بالبداية ومانقدر نتحكم بالسعر براحتنا، لكن اذا نبغا نوصل لاكبر عدد من المستهلكين، راح نتنمى ان سوق هذي الاجهزة بالكامل يقللوا اسعار اجهزتهم ليصبح الجهاز في متناول الجميع”
بشكل عام وضح جيف ان شركة HTC تتفهم اهمية نزول سعر الجهاز مع الوقت كأحد طرق نشر الجهاز للمستهلكين بشكل اكبر.
وكمل جيف كلامه واتكلم عن توجه جهاز فايف تبعهم و وضح افضل الطرق اللي ممكن يتم استغلال الجهاز بها، قال جيف: “الطريقة الواضحة للجميع هي استخدام الجهاز للالعاب، لان المنافسين مهتمين بالالعاب وهذا الشيء يجبرنا اننا نشتغل على الجهاز من ناحية الالعاب، لكن احنا نظرنا للجهاز بصورة اكبر، سبق و أعلنا شراكتنا مع HBO، Lionsgate، و Google، احنا نبغا نستغل الجهاز من الناحية الترفيهية، التعليمية، و نبغا نستغله من ناحية تدريب الناس على تجارب جديدة ممكن يطبقوها في الحياة الحقيقية”
كلام قوي من جيف واتوقع ان جهاز فايف والمورفيوس تبع سوني راح يكونوا اغلى جهازين من ناحية الاسعار، انا اتفق معاه في نقطة الاسعار وانها راح تقل بعد فترة، لكن ما اقدر اضمن طريقة استخدامهم للجهاز وتقديم محتوى تعليمي وترفيهي وغيره من الاشياء الرهيبة هذي لان هذا الشيء جدا صعب تطبيقه و غير كذة حتى لو طبقته تحتاج تطبقه بطريقة ترفيهية فعلا وما تكون شي تسليك فقط.
من ناحية الشركات المنافسة كتبنا عن تصريح الاوكلوس بأنهم ممكن يأجلوا جهازهم لتقديمه بأفضل صورة، و ايضا كتبنا عن رئيس البلايستيشن وهو يقول كلام مشابه لكلام جيف عن سعر جهاز المورفيوس تبع سوني.
اش رايكم بكلام جيف وهل تتفقوا معاه بالكامل؟
احمد خالد
بارعة
