أحمد قربان
احد الجهات الاجنبية الغير ربحية، واسمها Better Business bureau ، مختصة في تقييم الأعمال التجارية في أمريكا وكندا، قيمت خدمة فالف (Valve) بأسوأ تقييم ممكن، اعطتهم F من ناحية الخدمة. بعد ماشاف مدير التطوير في شركة فالف هذا التقييم تكلم للاعبين ووضح لهم ان الشركة راح تهتم اكثر بارضاء العميل وتحسين خدمة العملاء.
ايريك جونسون (Erick Johnson) مدير التطوير في فالف وضح ان (Better Business Bureau (BBB – الموقع اللي اعطاهم تقييم F- يعتبر مصدر ضعيف مقارنة بالمصادر الثانية.
قال ايريك ان مدى أهميّة هذي الجهة قليلة جداً: “جهة BBB فائدتها بالنسبة لنا اقل بكثير من موقع Reddit (موقع انترنت مشهور). مايقدموا لنا بيانات مفيدة مثل باقي المستخدمين اللي يتواصلوا معانا سواء عبر المواقع الثانية المختصة بالالعاب، عبر الايميل او عبر تويتر” -للمعلومية موقع BBB معطي شركة EA و اكتيفيجن (Activision) تقييم A+.
من جهة ثانية اعترف ايريك بضعف خدمة العملاء عند فالف واعطى المستخدمين وعد بأنهم راح يحسنوا هذا الجانب خلال هذا العام.
قال ايريك: “الشيء المهم حاليا هو اننا نشعر ان خدمة العملاء عندنا اقل من المستوى المرغوب، نعتقد ان المستخدمين على حق لما يقولوا ان خدمة العملاء عندنا سيئة، لما الناس يتهمونا بأن خدمتنا سيئة ماراح ننكر هذا الشيء ونقول لا وشوفوا كيف نشتغل ونهايط، بالعكس راح نفكر ونقول ممكن الناس على حق، لانهم في هذي المواضيع غالبا يكونوا على حق. راح نسمع لمشاكل اللاعبين وراح نركز عليها بشكل كبير خلال هذي السنة، عندنا شغل كبير لازم نسويه من هذي الناحية ولازم نحسنه”
كمل ايريك وقال: “لازم نعرف اكثر طريقة فعالة في خدمة العملاء، حاليا احنا شغالين على بعض الاشياء التقنية اللي تسبب في ظهور المشاكل للاعبين. مين هم الناس اللي راح تظهر لهم هذي المشاكل وكيف راح نحلها لهم كلها اشياء ما اشتغلنا عليها بشكل كبير الى الان، نعتقد ان هذا الموضوع يحتاج اننا نركز عليه بشكل كبير في الوقت الحالي” و وضح ايريك ايضا انهم راح يبنوا طريقة لتواصل اللاعب مباشرة مع احد عملاء ستيم (Steam) لمساعدته.
افضل شيء في الشركات الاجنبية انها تعترف بخطأها و تقولك اش راح تسوي مع هذا الخطأ، احترم ايريك و كل المدراء اللي مثله واتمنى لهم الافضل في المستقبل. اذا مهتم اكثر عن منتجات فالف كتبنا عن ضعف امكانية تطوريهم للعبة Half-Life لجهاز الواقع الافتراضي الخاص بهم.
وش رأيكم بالخبر؟
احمد خالد
بارعة
