يزيد السويري
إذا كنت مشترك في خدمة EA Access على جهاز الإكسبوكس ون يمديك الآن تحمل نسخة تجريبية من لعبة Battlefield Hardline اللي تعطيك عشر ساعات لعب.
حجم اللعبة الكامل حول 45 قيقا وما تقدر تلعب من طور القصة الإ البداية وأول مهمة بس بينما طور الأونلاين مفتوح لك بشكل كامل تلعب فيه زي ما تبي لين تخلص العشر ساعات اللي تبدأ بمجرد ما تشغل اللعبة.
بعد ما تخلص عليك المدة ونويت تشتري اللعبة من متجر الإكسبوكس بيجيك خصم 10% من قيمة اللعبة.
خدمة EA Access متوفرة بشكل حصري على جهاز الإكسبوكس ون بعد رفض سوني لهذه الخدمة من شركة EA. الخدمة تشبه في فكرتها إشتراك البليستيشن بلص على البليستيشن وخدمة الإشتراك الذهبي على الإكسبوكس من ناحية أنها تعطيك ألعاب مجانية زي باتل فيلد 4 وفيفا 14 ونيد فور سبيد رايفلز وغيرها من ألعاب الشركة المعروفة وتسوي لك خصومات على ألعاب الشركة وتخليك تجرب الالعاب الجديدة من الشركة قبل الناس زي خبر اليوم مثلا يمدي أصحاب الخدمة أنهم يلعبون Battlefield Hardline من الآن مع أن إطلاق اللعبة الرسمي باقي عليه أسبوع تقريبا.
وش رأيكم شباب بخدمة EA Access هل تشوفونها تستاهل أو لا؟ شاركونا أرائكم في التعليقات.
احمد خالد
Saudi Gamer
