أحمد قربان
لعبة درايف كلوب (Drive Club) الحصرية على اجهزة البلايستيشن 4 مازالت بتعوض اللاعبين بانها تعطيهم اضافات و ميزات مجانية وجديدة، اللعبة راح ينزل لها تحديث كبير و جديد خلال هذا الشهر. مشكلة اللعبة للان هي ان اللاعبين منتظرين موعد اصدار النسخة المجانية لمشتركي البلايستيشن بلس. غير هذي المشكلة اللعبة مدعومة بشكل جدا ممتاز ومميز و اللاعبين اللي اشتروا اللعبة راح يحصلوا على اضافات فوق المتوقعة.
ستديو ايفولوشن (Evolution Studios) المطور للعبة درايف كلوب اعلن عن تحديث جديد رقم 1.11 واللي راح يكون مجاني خلال الاسبوع القادم، التحديث راح يضيف طور جديد كليا على اطوار الاونلاين وراح يكون اسمه تيم تايم تريل (Team Time Trial) اللي يعني تنافس الفريق مع الزمن. كمان راح يتم اضافة مضمار جديد باليابان. ايضا راح يتم تعديل متطلبات المشاركة في المسابقات، وايضا شي راح يتم اضافة الوان جديدة تقدر تصبغ السيارة بيها.
التحديث ايضا راح يعدل بعض الاخطاء البسيطة اللي باللعبة، و راح يسمح لك انك تنزل اضافتين جديدة راح تنزل بالمتجر يوم 24 من هذا الشهر، السيارة اللي اسمها VUHL 05 راح يتم اضافتها بشكل مجاني للعبة، و حزمتي مسابقة ميدنايت (Midnight) و دوانفورس (Downforce) راح يتم اضافتهم كجزء من السيزون باس -سيزون باس يسمح لك تنزل جميع اضافات اللعبة المستقبلية بقيمة اولية تدفعها دفعه واحدة- تبع اللعبة. كل هذي الاضافات راح تضيف لنا احداث جديدة، كؤوس (Trophies) جديدة، و شعارات جديدة للسيارات.
المطور نشر على صفحته في موقع الفيس بوك الاجتماعي ان راح يتم اضافة امكانية مشاهدة اعادة للسباق بعد كل سباق وهذا الشيء يعتبر من اكبر الطلبات اللي طالبوا اللاعبين باضافتها. ايضا راح يتم مرتبات جديدة (Ranks) و راح يتم تعديل السيرفرات و اماكن الانتظار في اللعبة.
اخبار قوية من اللعبة اللي تم قتلها من قبل الاعلام، لكن من جهة ثانية قائدنا محمد الشريف كتب قبل كذة ان اللعبة تستاهل تعطيها فرصة وانا اتفق معاه. حالياً قاعد اتسائل اذا كل هذي الاشياء كانت موجودة من اول يوم لاصدار اللعبة كيف بيكون وضع اللعبة الان؟ اترك لكم الجواب
Saudi Gamer
