أحمد قربان
في الفترة الاخير صرنا نسمع عن ارتفاع تكلفة تطوير الالعاب بشكل كبير وان ممكن لعبة قوية تكلف ملايين عشان تطورها، هل هذا الكلام فعلا صحيح ولا كلام صحف؟
جاوب هذا السؤال ستاروس زيلنيك (Staruss Zelnick) المدير التنفيذي للشركة الناشرة تيك تو (Take Two) واللي تملك حقوق ستديو روك ستار للالعاب (Rockstar Games) وهو الاستديو المطور لعبة جراند ثيف اوتو 5 (Grand Theft Auto 5).
قال ستاروس: “تجارة الالعاب هي تجارة غالية الثمن. ونسبة المخاطرة جداً عالية في تجارة الالعاب” وضح ستاروس ان نسبة المخاطرة في تجارة الالعاب قريب ال80% وبالمقارنة مع تجارة الافلام فتجارة الافلام النسبة فيها قريب 30%.
كمل ستاروس: “نسبة المخاطرة عالية في الالعاب وهذا الشي يدل ان تكلفة تطوير الالعاب جدا مرتفعة، عندك تكلفة التطوير، التسويق، وفي العاب الرياضة عندك تكلفة امتلاك رخصة الفرق، كل هذي الاشياء تزود نسبة المخاطرة. ومن وجهة نظرنا ان هذي النسبة العالية راح تعطي الالعاب الناجحة فرصة اكبر للابتعاد عن المنافسين، في الحقيقة هذا الشي راح يخلق عوائق بالنسبة للالعاب الجديدة اللي ناوية تدخل السوق. اذا مطور جديد يبغا يطور لعبة قوية لازم يكون عنده مئات المهندسين اللي جودة شغلهم مرة عالية، وفنانين، هذا غير انه يحتاج كمية كبيرة جدا من الاموال عشان يسوق للمنتج”.
كلام سليم من ستاروس و فعلاً تطوير الالعاب احسه صار هم بالنسبة للمطورين. هذا شي ابدًا مو بمصلحتنا و في نظري اكبر مثال لهذا الشي هو لعبة فيفا 15 (FIFA 15)، السلسلة ماصار لها منافس بسبب امتلاكها لحقوق الفرق و بالتالي اللعبة مستواها صار بينزل احيانا و حتى لو مانزل ماراح تتطور بالشكل الرهيب الين يجي منافس قوي ويشعل المنافسة مرة ثانية و يخلي فيفا تنتبي على نفسها اكثر و تحاول تقدم شي جديد ومختلف.
طبعا ستاروس من حقه يقول كذه بما ان لعبة جراند ثيفت اوتو 5 محققة ارباح خيالية كتبنا عنها بالتفصيل قبل كم يوم وهذا الشي رجع لهم كل الفلوس اللي دفعوها واكثر ورفع عنهم المخاطر.
اش رايكم بكلام ستاروس؟
أيمن اليغشي
احمد خالد
بارعة