أحمد قربان
جون ويسنويسكي (Jon Weisnewski) المسؤول عن تصميم العالم المفتوح في لعبة ديستني (Destiny) يقول ان في التحديث القادم راح تتحدث بعض الاسلحة وتتحول من اسلحة مالها داعي لاسلحة ماتتعوض. التحديث راح يكون رقمة 1.1.1 وراح ينزل خلال هذا الشهر.
من اطلاق اللعبة في شهر سبتمبر الماضي، المطور بنجي (Bungie) شغالين في تسجيل الملاحظات و الاستماع للاعبين و تجميع البيانات و عمل اختبارات تجريبية داخل اللعبة، كل هذي الاشياء محصلتها راح يكون في التحديث القادم.
جون ذكر اهم التغييرات اللي راح تصير في الاسلحة بشكل عام:
- الرشاشات (Auto rifles) واللي مصممة للدرعمة والمسافات القصيرة، راح يصير لها تخفيض في قوتها بنسبة 2.5% بالاضافة ان راح يخفضوا مجال قوة الطلقة – يعني يقللوا المسافة اللي توصل فيها الرصاصة للاعداء، لو كان العدو بعيد راح تضعف قوة الطلقة-.
- بلس رايفل (Pulse rifles) -الرشاشات الي تطلق طلقتين وتوقف-، هذي النوعية من الاسلحة هي اقل نوع يتم استخدامه في لعبة ديستني، المهم ان قوة السلاح في الثانية من هذا النوع من الاسلحة راح تزيد بنسبة 8.7%.
- الهاند كانون (Hand Cannon) اللي هي تشبه اسلحة الماقنوم، مصممة للمسافات المتوسطة، راح يقل مجال قوة الطلقة و راح تضعف الدقة الاولية للسلاح.
- فيوجن رايفل (Fusion Rifles) وهي الاسلحة اللي تشحن قبل الطلقة، مصممة للمسافات المتوسطة، راح تزيد طول الطلقة وبالتالي راح تزيد قوة السلاح و في نفس الوقت راح تقل الذخيرة الاولية للسلاح.
بالنسبة للاسلحة الباقية مثل طالقة الصواريخ (بازوكة) و السنايبرز و الاسكوت رايفل (scout rifles) فهذي الاسلحة ماراح تتأثر بالتحديث القادم. ووضح جون وقال “التغييرات الي راح تصير لاسلحة ديستني راح تغير نظرة اللاعبين للاسلحة اللي ماقد جربوها وراح يبدأو يقارنوا هذي الاسلحة اللي اتغيرت بأقوى الاسلحة باللعبة. في احتمالية انك تكتشف اسباب جديدة تخليك تبدأ تستخدم الاسلحة اللي اتغيرت و تكون جزء من استراتيجيتك في اللعبة.”
جون جاوب عن سؤال راح يخطر في بال الكثير من اللاعبين اللي راح يحبطوا من هذا التحديث، السؤال هو: ليه بنجي يخربوا علينا الاسلجة الرهيبة اللي نحبها بدال مايسيبوها زي ماهي و يطورو الاسلحة الضعيفة؟
جون قال: “احنا مركزين بشكل دقيق عن اوقات القتل في جميع اطوار اللعبة ضد جميع انواع الاعداء، اذا طورنا الاسلحة فقط بدون ما نضعف الاسلحة الباقية بالتالي وقت القتل للاعداء راح يصير اسرع مع كل تحديث نسويه. من المهم ان يكون فيه وقت معين للقتل عشان تحس بقوة اسلحتك. لكن في نفس الوقت هذا الشي راح يزيد الدراما عند القتال و راح يخلق فرص لقلب الطاولة على خصمك اذا كنت تحت هجوم.”
موجودة مقالة رهيبة بالموقع عن ديستني اذا مااعجبتك ممكن تغير لك رأيك.
تحديث حلو وراح يغير شوي في اللعبة ويقلل الملل بدأ يشعر به بعض اللاعبين، وفي نفس الوقت يخلينا نجرب اسلحة ماقد جربناها وممكن نكتشف ان في اسلحة خورافية مانعرفها. اش رايكم تشوفوا انها خطوة موفقة ولا لا؟
بارعة
احمد خالد
أيمن اليغشي
