أحمد الراشد
بعد طول انتظار، وبعد كثرة المكالمات مع شركة الاتصالات، جتني خدمة الالياف البصرية للانترنت في بداية السنة. تشققت من الفرحة! ما صدقت ان هذي الخدمة وصلتني. اشتركت بباقة 200 mbps (تحميل) و 40 mbps (رفع) وبدون تفكير. جربت اجهزة كثيرة: جوالات، اجهزة لوحية، كمبيوترات (سطح مكتب و لابتوب) وأجهزة كثيرة غيرها. سرعة التحميل والرفع كانت اكثر من ممتازة.
تذكير: 8mbps = 1MBps (يعني اذا كانت سرعة اتصالك 100 mbps، فسرعة التحميل تكون 100 ÷ 8 = 12.5MB في الثانية)
جربت احمل من مواقع كثيرة. سرعة التحميل من سيرفرات Apple و Microsoft كانت توصل الى 10MB في الثانية، وأكثر موقع استغل هذي السرعة هو موقع Steam اللي وصلت سرعة التحميل من سيرفراته 22.5MB في الثانية.
لكن بالرغم من كل هذا، اجهزة الالعاب ما كانت تستغل السرعة مثل الأجهزة الثانية. كانت سرعة تحميل أجهزة البلايستيشن 3، البلايستيشن 4، والوي يو، ما بين 6 الى 13 mbps (يعني 1-2 MB في الثانية تقريباً).
مع الاكس بوكس 360، كنت الاحظ انه اسرع، مع انه ما يورّيك كم سرعة اتصاله. الاكس بوكس ون هو الجهاز الأكثر استغلالاً لقوة الاتصال بسرعة تحميل ما بين 30-50 mbps (يعني 3-6 MB في الثانية تقريباً).
سرعات ممتازة، لكن ما استغلت السرعة العالية 200 mbps.
حاولت احوس بإعدادات الراوتر (Router) والمودم (Modem) لكن ما تحسن الا شوي. فقلت يمكن سيرفرات هذي الشركات بعيدة عننا. جلست فترة طويلة مقتنع بأن سبب بطئ الاتصال (نسبياً) هو بُعد السيرفرات…الى اليوم!
لفتت انتباهي تغريدة من صاحبنا راكان الخنيني يربط فيها موضوع موجود في موقع البوابة الرقمية (بحط لكم الروابط في نهاية المقالة). الموضوع، وبكل اختصار، يحل المشكلة اللي واجهتني مع اجهزة الالعاب. وحلها جداً سهل: تغيير عنوان الـDNS في الجهاز المستخدَم!
غيّرت اعدادات الـDNS الى:
Primary: 83.136.56.52
Secondary: 83.136.56.53
وغيري استخدم الـDNS حق Google:
Primary: 8.8.8.8
Secondary: 8.8.4.4
الـDNS حق Google ما ضبط معي لكن ضبط مع غيري. والنتيجة؟ تغيّر جذري في سرعة الاتصال!
ارتفعت سرعة التحميل في اجهزة البلايستيشن وجهاز الوي يو الى 35 mbps! شي جبّار ولكن…
لمّا جربتها مع الاكس بوكس ون، الجهاز طار الى 170 mbps!
اعتقد ان المشكلة هي من الـDNS السعودي، لأن الـDNS اللي رفع سرعة اتصال الاجهزة هي من دول ثانية.
انصحكم تجربون هذي الطريقة سواء كانت سرعة اتصالكم بطيئة او سريعة، لأنها تستغل اكبر سرعة ممكنة في الاتصال وبالتالي تغيّر التجربة بشكل جذري.
اشكر كل من: Soso1994 اللي وضع الحل في البوابة الرقمية و راكان الخنيني اللي الفت انتباهنا للموضوع.
حساب راكان الخنيني في تويتر
أحمد عصام
