محمد الشريف
جيل اكس بوكس 360 وبلاي ستيشن 3 من أكثر الأجيال اللي تغيّرت فيها صناعة الألعاب.
في الجيل اللي راح، وأقصد جيل بلاي ستيشن 3 واكس بوكس 360، طاحت ألعاب وطلعت ألعاب. من كان يتوقّع ان PES بتطيح وبتتفوق عليها FIFA؟ صناعة الألعاب في اليابان بكبرها طاحت وطلع المطوّر الغربي. الألعاب اليابانية الجميلة اختفت من الوجود، وصرنا نشوف بدالها ألعاب تقلد ألعاب التصويب الغربي بشكل غريب.
في الجيل اللي راح، ألعاب التصويب صارت هي الصرعة وهي المنتشرة في السوق، كول أوف دوتي وباتلفيلد هم اللعبتين اللي تبيع في السوق، بعد ما كانت ألعاب التصويب تنتشر على البي سي فقط، وتنجح نجاح لا بأس فيه على الأجهزة المنزلية.
كبر سوق الألعاب في الجيل اللي راح وصار مجال ممتاز للتجارة وربح الفلوس، وارتفعت تكلفة صناعة الألعاب نظراً للتقنيات الموجودة، وما عاده من السهل انك تسوي لعبة ضخمة باستديو صغير. ما عاد فيه شي اسمه تسوّي لعبة مثل Silent Hill باستديو أعضاءه الأساسيين 17 شخص فقط.
اختفت ألعاب الرعب في الجيل اللي راح، ولا عاد صرنا نشوف ألعاب رعب مثل Silent Hill أو Fatal Frame وغيرها من ألعاب الرعب، وصرنا نشوف ألعاب رعب فيها جرعات آكشنية كبيرة، مثل Dead Space وResident Evil اللي غيّرت توجهها ووأضافت كثير من عناصر الآكشن.
الآر بي جي الياباني طاح مستواه، من كان يتخيل ان فاينال فانتسي بينحدر مستواها الى هذا المستوى، وصارت تنزل السوق ولا يدري عنها الا القليل؟
اختفت الألعاب “الفنية” أمثال ICO وShadow of the Colossus للأبد، واللعبة الثالثة من المطوّر غارقة في لعنة التطوير، وانتهى الجيل ولا نزلت The last Gurdian الى الآن.
الأونلاين صار أقوى عنصر، بحيث شفنا ألعاب تضيف أطوار تنافسية أو تعاونية حتى لو ما كان مناسب لها، لانها مضطرة انها تسوي كذا. ألعاب مثل Call of Duty احتوت على طور قصة ممتاز في بعض أجزاءها، لكن السوق يطلب أونلاين فقط، وشفنا اللعبة تبيع عشرات الملايين بسبب الأونلاين وليس بسبب القصة الممتازة. شفنا آثار هذا الشي في بداية الجيل هذا، بحيث قرر مطوّر اللعبة في لعبته الجديد Titanfall انه يتخلى عن طور القصة بالكامل، ويطلع لعبة ما فيها غير “أونلاين”.
كبر سوق الألعاب وتغيّر وصار عدد اللاعبين أكثر بكثير، لكن هل هذا شي جيّد بالضرورة؟
كثير من الأشياء تغيّرت في الجيل اللي راح، وكثير من اللاعبين تغيّروا. اعتزلوا كثير ألعاب الفيديو وصاروا يقولون لي “بالله اذا نزل جزء جديد للعبة الفلانية عطني خبر” بعد ما كانوا يعلموني جديد ألعاب الفيديو!
كثير من “المعتزلين” اللي تركوا الألعاب وتحول وقت ترفيههم من الفيديو جيمز الى أفلام أو مسلسلات أو غيره، لانهم يعتقدون ان الألعاب خربت للأبد، وكل اللي في السوق عبارة عن ألعاب تصويب بأسلوب هوليوود، وانتهى الابداع اللي كنا نشوفه من زمان.
وش رأيك أنت في الموضوع، هل تشوف ان الجيل اللي راح جيل فاشل، أو تشوفه تغيّر للأفضل؟ ناقشنا رأيك!
احمد خالد
