صوّت للعبة

Rating: 3.8/5. From 9 votes.

Please wait...

وش سالفة اللعبة

لعبة عالم مفتوح، تقريباً كأنها جراند ثيفت أوتو لكن البطل يقدر يخترق أشياء كثيرة حوله بضغطة زر (كاميرات، حواجز في الطريق، أبواب..الخ) بحيث يستخدمها لصالحه.

معلومات اللعبة

الناشر: Ubisoft

المطور: Ubisoft Montreal

تاريخ الإصدار: 05/27/2014

النوع: عالم مفتوح

التصنيف العمري: PEGI 18+

عمر اللعبة: 20 ساعة (تقريبي)

الأجهزة الخاصة باللعبة: Xbox One, Xbox 360, Wii U, PS4 (جهاز التقييم), PS3, PC

تحتاج إنجليزي؟: نص ونص

الايجابيات

أسلوب التخفّي في المهمّات رائع وممتع، خاصة اذا استخدمت قدرات الاختراق عشان تستفيد منها في التخفّي أو تخطّط لطريقة معيّنة تتخلّص فيها من كل الاعداء بدون ما تتعب معهم، لأن القتال المباشر معهم صعب.
اللعبة مليانة أشياء تسويها بتخليك تقضي فيها أكثر من 50 ساعة اذا كنت من الناس اللي يحبون يخلصون كل شي فيها، هذا غير طور الأونلاين. طور القصّة لحاله بياخذ منك 15 ساعة تقريباً.
مؤثرات الاضاءة والموية (البحر تحديداً) في اللعبة جميلة جداً وملفتة للنظر.
أحد الألعاب الجانبية في اللعبة اللي تلعب فيها بعنكبوت آلي ضخم. هذي لحالها المفروض تصير لعبة مستقلة من كثر ماهي رهيبة!
وجود عدد كبير من التطويرات لشخصيتك والأدوات اللي ممكن تستفيد منها في اللعبة وتنوّع لك شوي في اللعب.
أطوار أونلاين مميّزة خاصة الطور اللي أنت تلعب في المدينة وخويّك يلعب ضدّك عن طريق التابلت حقه.

السلبيات

تكرار ملحوظ في المهام، خاصة في النصف الأول من طور القصة.
جرافيكس اقل من المتوقع بالنسبة للعبة جيل جديد (باستثناء الاضاءة والماء)، وتعابير الوجه بدائية.
الاختراق بدائي جداً ومكرّر. أغلب الاختراقات اللي تسويها تكون بضغطة زر بس. والاختراقات اللي تحتاج جهد أكبر بتنفذها عن طريق لعبة مصغّرة (mini game) بتمل منها بسرعة. كنت اتمنى أشوف تحدّي أكبر في الاختراقات عشان تصير اللعبة أمتع. مثلاً ما تقدر تخترق أي كاميرا، أو يخلون فيه أشياء لازم تلمسها عشان تخترقها مو تخترق كل شي من بعيد.
أنواع المهام الجانبية قليل جداً ومكرّر، وبعضها شاطح ويطفّش صراحة تحس حطوه عشان يزيدون المحتوى بس. خلصت اللعبة ولا حسيت اني ابي استكشف العالم بسبب تكرار المهام. غير كذا كل مهمّة جانبية تحتاج تحملها قبل ما تبدا فيها، وتحتاج تنتظر المرحله تحمّل بعد ما تقرر تتركها. مشوار.
اذا كنت في مطاردة سيارات (سواءً تطارد أحد أو أحد يطاردك)، فبتلاحظ أنه من الصعب جداً انك تضيّع أو توقّف أحد باستخدام سيارتك فقط. اللعبة نوعاً ما تجبرك تستخدم الحواجز أو العوائق اللي في الطريق عشان توقّف السيارات الثانية في المطاردة، لأن لو ما استخدمتها بتلاحظ ان السيارات اللي تطاردك قوية جداً وما توقف بسهولة.
قصة عاديّة تقدر تتوقع أحداث كثيرة فيها من بدري.
تعرّي ما كان له أي داعي في اللعبة، واعتقد هذا سبب منعها في السعودية. اذا جتك مهمّات تنتحل فيها هويّة شخص آخر فتأكد ان مافيه حولك أحد، لأن المشاهد تطلع في هذي المهمات.
طور اللعب الجماعي في الأونلاين (3 الى 8 لاعبين) ما اشتغل ولا مره معي. كل ما أبحث يقول لي متوسط وقت الانتظار دقيقتين لكن اجلس ساعه انتظر ما يلقى أحد، عكس الاطوار الثانية اللي في دقيقة أو دقيقتين أدخل مع واحد.

التقييم النهائي

ابو كلب
تمشي الحال
ممتعة
ممتازة
اسطورية

الزبدة

اذا تحب ألعاب العالم المفتوح فغالباً راح تستمتع في طور القصة على الأقل، بس لا تتوقّع تشوف مدينة حية ومليانة أشياء رهيبة زي اللي شفناها في "جراند ثيفت أوتو" أو حتى "أساسنز كريد" اللي هي من نفس الشركة. من اللي شفته في هاللعبة (خاصة في تكرار المهام) حسّيت انها مجرد نموذج أو أساس للأشياء اللي ناوين يسوونها في الأجزاء الجاية. ومع ان الشركة خبصت في أشياء مهمة في اللعبة، لكن ما زلت أشوف انها من الألعاب اللي لازم تجربها بما انها تقدّم فكرة جديدة (الاختراقات).