أحمد قربان
الجيل الجديد بالرغم من قلة العابه، الا ان كان فيه كمية طيبة من الالعاب نزلت في الفترة الماضية وللاسف الالعاب المنتظرة معظمها كانت سيئة واقل من المتوقع. راح نلقي نظرة على لعبتين نزلت في السوق و كانت سيئة و اذكر اسباب هذا السوء في وجهة نظري الشخصية.
اول لعبة كانت منتظرة وسيئة هي باتلفيد 4 (Battlefield 4)، اللعبة من شركة اي ايه (EA) وكانت منتظرة من قبل معظم اللاعبين، للاسف اللعبة خيبت امال الكثير من اللاعبين وانا اولهم، بداية نزولها اللعبة كانت غير قابلة للعب اصلا وبعد 5 شهور تقريبا لازلنا نعاني من مشاكل واخطاء تافهة و تقتل متعة اللعب. اللاق و السيرفرات السيئة اللي تطردك احيانا من اللعب، و الان فتحو السيرفرات للناس ليشتروها و يحطو القوانين بكيفهم وهذا شي رهيب ومنتظر لكن بعد كم يوم لاحظنا مشاكل و بعض الاعدادات ماتقدر تتحكم فيها و محدودة ومشاكل في انك تجعل السيرفر 64 لاعب. هذا غير الاخطاء اللي احيانا تصير من فترة لاخرى مثل البق (Bug). بعد كل هذه الاخطاء بدأت اكره اللعبة و اتجه لالعاب ثانية اخطائها اقل.
اللعبة الثانية انفيموس سكند سن (Infamous Second Sun)، اللعبة الحصرية على البلايستيشن 4 (PlayStation 4) اللي كانت منتظره من قبل كل اللاعبين و كانت الشغل الشاغل لشركة سوني، اللعبة نزلت و اشتروها الناس وباعت بسبب التسويق الرهيب اللي صار لها، اسلوب اللعب (Gameplay) ماعليه اختلاف انه رهيب وبطل ومؤثرات و تصوير مجنون، يخليك تحس بقيمة البلايستيشن فور، لكن للاسف ضعف المحتوى بشكل عام من ناحية قصة و من ناحية مهمات جانبية و من ناحية عمر اللعبة ككل. من اسرع الاشرطة اللي تقدر تجيب فيها تروفي بلاتينيوم لقصرها، اعتقد جبت البلاتينوم ومااتجاوزت ال17 ساعة. عكس لعبة اسيسنز كريد بلاك فلاق (Assassin’s Creed IV) اللي اتجاوزت ال40 ساعة وانا لسه عند ال50% من البلاتينوم. ضعف المحتوى في انفيموس اثر على تقييم اللعبة بشكل كبير جدا. لكن ماانكر انها كانت تجربه رهيبة مرة وممتعة وادمانية بالنسبة لي.
أسباب ضعف الالعاب من وجهة نظري الشخصية
سببين في وجهة نظري كانت كفيلة بنزول مستوى الالعاب اللي ذكرتها، السبب الاول هو الاستعجال او التلفيق نقدر نقول اللي صار في اللعبتين اللي ذكرتهم فوق، باتلفيلد نزلت مع اطلاق الجيل الجديد وبعده بفترة تايتن فول و اخر شي كانت انفيموس، الالعاب تحس انهم مستعجلين فيها و يبغو يسوقوا للجيل الجديد عن طريقها بغض النظر عن جودة اللعبة. هذا الشي خلاهم ينزلو العاب ناقصة و مو كاملة المحتوى. في نظري الشي هذا كان لازم يصير مع بداية الجيل ومن العاب مختلفة، يعني المشكلة ماكانت في اسماء الالعاب اللي نزلت لكن كانت في وقت نزول هذي الالعاب، اعتقد اي لعبة بتنزل في وقت هذي الالعاب راح يصير لها نفس الشي. يعني نقدر نقول انها تضحية لاجل الجيل الجديد و لازم تصير.
السبب الثاني هو ارتفاع التوقعات (زي مايقولوا Hype) بشكل جبار لهذي الالعاب، شفنا اعلانات في كل مكان عنها و كلام من مسؤولين و مواقع ولاعبين و تواصل اجتماعي عن تطور هذي الالعاب و عن قوتها. هذا الشي جعل اللاعبين ينتظروا شي مجنون، شي ماقد شافوه في حياتهم، لكن للاسف لما جربنا الالعاب كانت صدمة بالنسبة لنا وعلى الرغم من انها ممكن تكون جيدة نسبيا لكن كانت اقل من التوقعات بفرق كبير جدا، التوقعات كانت في الفضاء و اللي جربناه كان تحت الارض!. هذا الشي احبط اللاعبين و خلاهم يقولو انها العاب سيئة. المشكلة هذي يتحملها اطراف كثير في وجهة نظري لكن الجزء الاكبر يعود على الشركة الناشرة اللي وزعت اعلانات في كل مكان على لعبة ماتستاهل كل هذي الضجة.
نظرة تفاؤل
بعد ماشفنا الاسباب راح نشوف الحلول، لو نشوف الالعاب اللي نازلة في الفترة القادمة اللي تم الاعلان عنها راح نلقى 4 اسماء منتظرة. واتش دوقز (Watch Dogs)، ديستني (Destiny)، ذي اوردر 1886 (The Order 1886) و درايف كلوب (DriveClub)، عندك ديستني و ذي اوردر من بداية اعلانهم عن اللعبة ماحددو موعد نزولها، ديستني قبل فترة اعلنت عن موعد الاصدار و ذي اوردر الى الان مااعلنو اصدارها، هذا الشي يخليني اتفائل انهم شغالين بمساحة كبيرة و معطين نفسهم وقت كافي لتطوير لعبة رهيبة فعلا، ان شاء الله تكون شي جبار هذي اللعبتين.
اما بالنسبة لواتش دوقز و درايف كلوب، اللعبتين اعلنو عن اصدارها الاولي مع بداية الجيل الجديد، لكنهم لاحظو ان العابهم غير جاهزة وقرروا يأجلو موعد نزول هذي الالعاب. درايف كلوب قبل فترة قريبة اعلنوا عن موعد اصدارها، انا شخصيا مااحب العاب السيارات اللي تكون في مضمار، لكني متحمس لهذي اللعبة، من الجيل القديم مالعبت لعبة سيارات شفت غليلي و قدرت اقول انها افضل لعبة سيارات لعبتها في حياتي، عندي احساس ان درايف كلوب راح تكون افضل لعبة سيارات العبها خصوصا انها مهتمة باللعب الجماعي بشكل كبير وحسب الاعلانات راح يكون فيها حرية اكبر وتنوع في اسلوب اللعب.
واتش دوقز شخصيا اللعبة اللي منتظرها بفارغ الصبر و ابغاها تنزل دحين وانا جالس اكتب المقالة هذي 🙂 ، بكل امانة شركة يوبيسوفت (Ubisoft) شغلها صار رهيب مرة، اخر سنتين اتطورو بشكل كبير جدا والعابهم صارت مميزة، جرأة تحتسب لهم ولدرايف كلوب انهم اجلو اللعبتين، صحيح ان التاجيل ينرفز و يحبط اللاعبين، لكن اجل كم شهر و لا انك تنزل لعبة ناقصة العبها اسبوعين و ارميها. انا شخصيا مؤمن بنجاح واتش دوقز و مؤمن ان اللعبة راح تكون افضل تجربة للجيل الجديد في الفترة الحالية. وبالنسبة للي يقول ان اللعبة راح يكون فيها تكرار، مطور اللعبة بنفسه صرح وقال اجلناها عشان نقلل التكرار في اللعب!. الشي الوحيد اللي متخوف منه ان تكون التوقعات اعلى من محتوى واتش دوقز لكني مؤمن ان اللعبة راح تفوق توقعاتنا او على الاقل ماراح تكون اقل من اللي ننتظره.
الزبدة هي اننا ان شاء الله قادمين على فترة العاب ذهبية خلال الاشهر القادمة، ومثل ماذكرت لكم ان سبب ضعف الالعاب الحالية هو ارتفاع التوقعات و الاستعجال على اصدارها، و ان شاء الله الالعاب القادمة راح تكون كاملة المحتوى وقليلة الاخطاء.
اش رايكم تتفقو معي على اسباب ضعف الالعاب؟ عندكم اسباب ثانية؟ عندكم وجهة نظر مختلفة؟ تعتقدو ان الالعاب القادمة راح تكون رهيبة ولا ماراح تقدم شي جديد؟ شاركونا
أيمن اليغشي
احمد خالد
