أحمد الراشد
ننتندو شكلها متبّعة نظام “لا يوقّف” 😛 . اعلنت الشركة اليوم عن كم شغلة للوي يو في اجتماعها مع مستثمرين الشركة. أوّلها:
استخدام تقنية الـNFC
للي ما يعرف الأن اف سي (NFC)، هي تقنية معروف بوجودها في اجهزة الاندرويد والويندوز المحمولة (جوالات واجهزة لوحية). من خلالها تقدر تنقل معلومات (صور، ملفات،…الخ) من جهاز لآخر بمجرّد انك تحطهم جنب بعض (او فوق بعض). ففي الجيم باد (يدّة الوي يو اللي فيها شاشة لمس)، تلقى مربع رمادي صغير في الزاوية كثير ناس ما يعرفون وش قصته؛ هذا المربع هو مكان قطعة الـNFC.
لعبة وحدة بس استخدمت هذي التقنية وهي Pokémon Rumble U. مسوين اضافات للعبة على شكل مجسمات صغيرة (Figurines) بحيث انك تحط هالمجسم على المربع ويطلع لك جوّا اللعبة. الآن ننتندو اعلنت في اجتماعها مع المستثمرين بأنها بتكشف عن استخدامات اكثر لهذي التقنية في معرض E3. لكن اللي انكشف في الاجتماع هو امكانية استخدام مجسم واحد في العاب متعددة، ومثالهم كان بمجسم ماريو (طبعاً). من المعلومات اللي ممكن تنتقل عبر هذي التقنية هي تسجيلات الالعاب (Game Saves). بيكون اسم هذي الميزة NFP (او Nintendo Figurine Platform)، طبعاً هذا الاسم ممكن يتغيّر. هذي التقنية بيضيفونها للـ3DS عن طريق اكسسوار خارجي يتصل بالجهاز عن طريق الـIR.
هذي التقنية مو اوّل مرة تدخل عالم العاب الفيديو. لعبة Skylanders و Disney Infinity استخدموا نفس هذي التقنية.
كنت مستغرب ان ننتندو ما استخدمت هذي التقنية من البداية. لكن اظن ان الصورة اتضحت؛ مخلينها عشان يستخدمونها للحالات الصعبة للشركة (مثل الحين). طبعاً هذا رأي شخصي لا اكثر ولا اقل.
تطبيق تلفزيون ماريو كارت (Mario Kart TV)
تكلّمت قبل فترة عن ميزة Mario Kart TV اللي بتكون في لعبة Mario Kart 8. لكن اعلنت ننتندو اليوم ان بينزل تتطبيق خاص لهذي الميزة على الاجهزة الذكية والكمبيوتر. بإمكانك من خلاله انك تتفرّج على فيديوات مسجّلة (Replays)، تطّلع على التصنيفات (Ranking)، وتتفرّج على فيديوات ننتندو الرسمية. التطبيق بيكون تطبيق متصفّح (Web Based)، يعني تستخدمه عن طريق المتصفح.
تحديث جديد للـWii U
وأخيراً اعلنت الشركة عن تحديث يسرّع تشغيل الجهاز والعابه. بإمكنك انّك تشغل العاب مباشرة من دون ما تدخل في الصفحة الرئيسية، يعني الجهاز بيخلّيك تلعب اللعبة من دون ما يحمّل نظام التشغيل بالكامل. التحديث بينزل في شهر يونيو (يعني الشهر الجاي).
أخيراً بدت ننتندو تتحرّك شوي. مع اعلان جزء جديد لبوكيمون امس، اصدار ماريو كارت 8 نهاية هذا الشهر، واعلانات سماش بروذرز الجديدة، ننتندو بدت تصحصح. لكن هذا ما يكفي ابداً. لازم يدبّلون جهدهم ويتركون هالقرارات السخيفة اللي يتخذونها مثل عدم الاهتمام بمطوّرين الطرف الثالث واهمال الاونلاين.
وش رأيكم يا ارهب جيمرز؟ تتوقع ان ننتندو صحصحت والا هذا بس تسليك؟ اكتبوا تعليقاتكم في الاسفل!
احمد خالد
بارعة
