خالد حسين
ما يخفيكم شركات كثيرة توجهت توجه مختلف بسلاسلهم و جابوا العيد وهذي الشركات مثل Square Enix و Capcom و Konami وغيرهم الكثير. اصبحت سلاسلهم المشهورة مجرد ألعاب عابرة و اكشن مغامرات على الطريقة الأمريكية، ومتأكد كثير من الجمهور القديم بالذات زعل عليهم، واحالتها الى التقاعد مثل ما سوت كابكوم. الجديد انه مازال في مطورين مخلصين ومحبين لألعابهم الكلاسيكية.
رحيل و استقالة Koji Igarashi من كونامي قبل يومين، بعد ما تفائلنا خير بعودتة وانه ممكن يعيد رفع مستوى السلسلة الشهيرة Castevania زي ما تعودناها. وخصوصا بعد ما جابوا العيد MercurySteam مع توجة السلسلة الجديد مع اني شخصياً اقتنعت بالفكرة و التغيير، الا انهم ما اضبطوه و زعلوني صراحة برداءة مستوى الجزء الثاني من Lords of Shadow. اللي ما يعرف كوجي نفسة اللي طور و اشرف على السلسلة من Symphony of The Night لين Order of Ecclesia. و خاصةً سيمفوني اوف ذا نايت اللي يعتبرها النقاد أحد افخم اجزاء السلسلة بجميع المعايير.
طبعاً الأسباب غير معروفة بالضبط و الظاهر كونامي تبيه يطور مشروع جديد هو اساسا غير مقتنع فيه (اعتقادي و توقعاتي) لذالك الرجال بعد ما يأس من توجه كونامي نفسها، قرر يستقيل و يفتح لة استديو تطوير جديد يطور فيه اللي يبي واللي يحب واللي الناس تتوقعه منه. وحسب كلام كوجي “انا قررت اترك العمل في كونامي بنفسي علشان اخذ الحرية الكاملة لأصنع هذيك النوعية من الألعاب اللي انا ودي اني اسويها، نفس النوعية اللي اعتقد انه الجمهور المحب لألعاب الماضي بالضبط”.
صراحة شي مفرح ومحزن بنفس الوقت، مفرح اننا اخيرا بنشوف شي كلاسيكي مع لمسات التقنية الحديثة بالتطوير واعتقد و اجزم انه راح ينجح نجاح باهر، و شي محزن بأن شركات كثيرة بدأت تتخلى عن موظفينها وشفناهم في Kickstarter يشتغلون على مشاريعهم الحرة. بس بصراحة ما اعتقد انه راح يطور شي لصالح كاستلفانيا بسبب جميع الحقوق مازالت ملك لكونامي، بس الظاهر بيطور شي جدا شبيه زي ما سووا مع Mighty No.9. عطونا آراءكم و توقعاتكم للموضوع!
بارعة
احمد خالد