انتشرت قبل كم يوم لعبة جوال على iOS وأندرويد، فلابي بيرد (Flappy Bird). أخذت اللعبة هذي المراكز الأولى في الآب ستور وجوجل بلاي، أشهر متجرين الكترونية للجوالات في العالم.
ساره يونق (Sarah Young)، فتاة أجنبيّة ما ندري ان كانها حلوه أو لا، لكنها بكل تأكيد متخصصة في التسويق، مجال الجوالات. سوّت ساره دراسة رائعة حاولت توصل لأسباب الانتشار الفيروسي (viral hit) اللي صار للعبة فلابي بيرد. أعطت 9 أسباب تعلّل فيها انتشار اللعبة بعد ما يلعبها اللاعب لمدّة عشر دقائق فقط:
- اثارة فضول الناس: لعبة ما قد سمعت فيها، فجأة تلقاها ماخذه المركز الأول في المتجر؟ لازم أشوف وش سالفة اللعبة!
- اللعبة تحببك فيها: ستايل وأسلوب اللعبة الكلاسيكي، خصوصاً البطّة الجميلة والمرسومة بتقنية 8 bit المعروفة.
- اثارة حنين الناس للماضي: اللعبة ماخذه شي كبير من اللعبة الكلاسيكية المعروفة ماريو (Mario).
- اثارة نزعة الانتقام: كثير من الناس بيزعل على اللعبة بسبب نسخها الصريح للعبة ماريو المعروفة.
- اثارة الحيرة: بحيث من أول تجربة لك تموت وتستغرب وتقول في نفسي: “كيف مت وانا مالي خمس ثواني ألعب؟”
- اثارة القلق: وانت في وسط اللعب ووصلت رقم قياسي، توصل لقمّة النرفزة والحماس والقلق، كل هذا عشان ما تخسر!
- اثارة الغضب: أظنك سبّيت كثير وانت تلعب اللعبة، صح؟ لا تستحي، اعترف 🙂
- الشعور بالإحباط: كثير من المرّات تحس انك فاشل باللعبة.
- اثارة نزعة الانكار والرفض: ما قد شفت بعض الناس يسبّون اللعبة ويقولون: “ياخي وش هاللعبة البايخه اللي ماني قادر أفوز فيها؟”
أعتقد ان معظم النقاط اللي ذكرتها صحيحة. شخصياً ما ألعب ألعاب الجوّال كثير، لكني أعطيت تجربة سريعة لفلابي بيرد وفعلاً قدرت أتفهّم سبب الانتشار النادر للعبة. مو شرط ان دفع عشرات الملايين على الألعاب معناته ان اللعبة تنجح، ممكن تسوّي شي بسيط مثل هذي اللعبة وتحاول تضرب الاوتار الحسّاسة للناس، الأوتار اللي تثير عواطفهم عشان توصل للنجاح، وبأقل تكلفة ممكنة.
وش رايك بلعبة فلابي بيرد؟ وكم أعلى رقم وصلته في اللعبة؟
