مقالات

خمس أسلحة بعالم الألعاب ما تقدر تتخيّل البطل بدونها

5weaponsarticlecoverphoto

ساعات ياخذنا الحماس مع الجزء الجديد من سلسلة معينه، ونختمها ونحللها ومبسوطين على الاخر، لكن فيه شغلات بسيطه في نفس القيم تروح علينا، منها سلاح البطل الرئيسي اللي بكل جزء يكون موجود واغلب الشغل يكون عليه بالكامل، وش اللي يميز سلاح البطل ويخليه يرجع بكل جزء؟ هل هي عادة من فريق التطوير أو ان السلاح له صلة بالبطل؟ ووش تاريخ السلاح المعين بالسلسلة؟ مقال اليوم خفيف وراح يكون عن اسلحة لسلاسل معينة بعالم الالعاب تعودنا عليها وصارت جزء رئيسي من السلسله وبطلها.

السلاسل راح تكون بالترتيب حسب عمر السلسله بعالم الالعاب:

Master Sword – The Legend of Zelda

linkmastersword

لينك بطل سلسلة زيلدا (Zelda) يعتبر من اقدم المحاربين بعالم الالعاب، حارب ضد الشر في السلسلة على أكثر من 10 اجهزة بعالم الالعاب سواء اجهزة منزلية او محمولة، سلاحه الاساسي في اكثر من 7 اجزاء هو الماستر سورد (master sword)، محبين السلسلة تعودوا ان الماستر سورد يكون بكل جزء وتلقائيا أول ما تفكر ببطل اللعبة لازم تتخيل معه الماستر سورد، لكن وش المميز بهالسلاح؟ هذا السيف بكل جزء له قصة معينة خاصة فيه، لكن بذكر قصة بداية السيف مع جزء (A Link To The Past)، بعد ما الساحر (Agahnim) سيطر على قلعة (Hyrule) كان لينك لازم يحصل على الماستر سورد عشان يقدر يهزم الساحر، الاساطير كانت تقول ان السيف يرقد في غابه في شمال عالم هايرول، ودائماً في كل مرو لينك يحصل الماستر سورد عزيمته وشجاعته تزداد، والسيف يعتبر جدا قوي وله القدرة الكافية لإيقاف الشر، هذي باختصار واحدة من قصص الماستر سورد.

Camera Obscura – Fatal Frame

fatalframecamerapic

اذا جيت تفكر بألعاب الرعب الحقيقية لازم تجي في بالك سلسلة فيتل فريم (Fatal Frame) او “الاطار القاتل”، سلسلة تعتبر من أرعب الالعاب في مجالها، لكن اللي يميزها طريقة اللعب وهي بأستخدام الكاميرا عشان تصيد الاشباح، فكرة غريبة صح؟ لكن ليش بكل جزء بالسلسلة لازم تكون الكاميرا موجودة؟ لو نرجع للجزء الاول من السلسلة راح نكتشف ان أخو البطلة ميكو فقد لمدة أسبوع كامل، فأضطرت انها تروح تستكشف قصر هيمورو في أمل انها تحصل أخوها المفقود، بعد ما دخلت القصر حصلت كاميرا تصوير في الارض، الكاميرا هذي هدية من أمها لأخوها المفقود مافيو، بعدها اكتشفت ان من خلال الكاميرا القديمة هذي تقدر تشوف الاشباح وتصورهم عشان يبتعدون عنك، هنا نعرف مدى اهمية الكاميرا القديمة للسلسلة وليش ترجع لنا بكل جزء.

Blades of Chaos – God Of War

godofwarweaponspic

المحارب الغاضب في كل جزء بالسلسلة، كريتوس .. لكن من اللي يلومه؟ في كل جزء من السلسلة سواء على الاجهزة المنزلية أو المحمولة نلاحظ ان بطل اللعبة كريتوس وفي كل مغامراته يسعى للأنتقام، سلاحه الاول والاخير هو السيفين المربوطة بكل يد بسلاسل حديد، البلايد اوف كييوس (Blades of Chaos) صنعت في اظلم وأعمق منطقه تحت الارض، واللي صنعها أريس بنفسه وهو عدوك بالجزء الاول، الحديد الخاص بالسيف مصنوع لغرض انه ما ينفك مهما حاولت من قوته، و السيوف هذي هي اللي ساعدت كريتوس للانتقام في كل مغامراته، رغم ان اجزاء السلسلة تعطيك اسلحه غير البلايد اوف شاوس، لكن تلقائيا تلاقي نفسك ترجع للبلايد اوف شاوس من قوته وسهولة التحكم فيه.

Portal Gun – Portal

portalgunpic

رغم ان هالسلسله ما نزل منها الا جزئين بس، لكن من فينا يقدر ينكر رهابة البورتال (portal Gun) هالسلاح اضاف متعة جديدة في عالم الالعاب، باختصار يفتح لك مدخلين بأماكن مختلفة عشان تتنقل وتحل الالغاز في هالأماكن، فكرته غريبه ومميزهـ.، في خلال جزئين من السلسله هذا البورتال جن هو سلاحك الوحيد، تصميم السلاح والمراحل تعطيك متعة ثانية، غير استخدام السلاح لميزات ثانية منها انك تفتح بورتل معين عند منطقة فيها غرض تحتاجه، مثال: اذا احتجت السائل اللي يساعدك على القفز العالي تفتح بورتل عنده والبورتال الثاني عند المنطقة اللي تحتاج انك تقفز منها، وأفكار ثانية كثيره تقدر تستفيد منها من خلال هالسلاح الرهيب، بذكائك كلاعب مع سلاح البورتل راح تقدر تحل كل الالغاز اللي تواجهك في الجزئين عشان تحرر نفسك من المصنع اللي أنت فيه، هذي نبذة بسيطه عن سلاح بورتل جن في لعبة بورتل اللي دخل عالم الألعاب من اوسع ابوابه بفكرته المميزة.

Hidden Blade – Assassin’s Creed

assassinscreedhiddenbladepic

سلسلة القتلة المتخفين، السلسلة اللي سيطرت بالكامل على الجيل الماضي، بالرغم من ان هالسلسلة مر عليها 5 أبطال مختلفين، و فيه شيء يربطهم ببعض، وهو المديّة (سيف قصير أو سكّين) الهايدن بليد اللي هو زي السيف بس جدا صغير ويخبونه بذراع اليد عشان ما يبين، يعتبر من الاسلحة اللي ميزت سلسلة اساسن كريد وخاصه بالتخفي، تلقائيا بأي جزء للسلسلة لازم يكون هالسلاح موجود، يعتبر زي العاده للأساسينز “الحشاشين” عشان تميزهم عن باقي الناس ويسهل لهم عملية الاغتيال، في بداية الجزء الاول كان بس هايدن بلايد واحد موجود لبطل الجزء الاول (الطاير) وكان محله بالذراع اليسرى، لكن من الجزء الثاني وطالع صار بكل ذراع فيها هايدن بليد، ومع تطور الوقت تم التعديل عليها واضافوا عليها بعض الأشياء، مثل انك تطعن شخصية معينة بالسم من خلال الهايدن بليد.

الخلاصة

هذي نظرة خفيفة على اسلحة بعالم الالعاب دائما ترجع لنا بكل جزء وبعضها يرجع لنا حتى مع أختلاف بطل السلسلة، فيه بعض السلاسل ما تتميز بأي سلاح خاص يميز البطل مثل سلسلة انشارتد (Uncharted) او كول اوف ديوتي (Call of Duty) او جراند ثيفت اوتو (Grand Theft Auto)، طبعا فيه سلاسل كثيرة تميزت بالسلاح الرئيسي لها غير المذكوره فوق، ياليت تذكرها لنا وتعطينا رأيك بالموضوع ككل في التعليقات.

الوسوم
اظهر المزيد

محمد الدوسري

هاردكور جيمر من ايام الـ16Bit .. أغلب انواع الالعاب تعجبني .. وألعب بجميع الاجهزهـ المنزليه والمحموله والـPC بدون اي تفضيل .. سلاسل كثير تعجبني ولكن جميعهم بخلف سلسلة The Legend of Zelda .
إغلاق