نجاح جيل في خمس نقاط

انتهى جيل وبدأ جيل جديد والكل متحمس له، لأن هذا الجيل بالذات وصل الى مرحلة في التقنيات والتطور رائعة وتبشر بخير للاعبين مقارنة بالجيل السابق، لكن الي يحبطني واكيد راح يحبط كثير من اللاعبين في بداية هذا الجيل تحديداً هي أسباب متنوعة، لو تم حلها او تجنبها راح تسرع انتشار ونجاح كل جهاز في هذا الجيل بشكل أكبر وأوسع. راح اذكر اهم خمس أسباب بوجهة نظري وهي:

ألعاب أكثر

كعادة اي جهاز جديد توه ينزل، لابد وبكل آسف نشوف عدد ألعاب قليل جداً وتنعد بأصابع اليد وهذا الشي صار حالياً وصار مع الجيل السابق. بنظري المفروض ان يتم تجهيز ألعاب اطلاق كثيرة ومتنوعة مع نزول جهاز جديد، لان كل لاعب وقت شرائه لجهاز جديد راح يتلهف ويتحمس انه يشتري اكبر عدد ممكن من الألعاب المتوفرة (اذا كان مو مطفر طبعآ)، وبنفس الوقت حتى مايكون فيه ملل من قل الألعاب لكن هذا الشي صعب يصير ليش ..؟ لأسباب منها ان غالبآ الشركات المطورة مااتقنت تطوير الألعاب بشكل سليم، ولاحظ رغم قلة وجود الألعاب على الـ Playstation4 والـ Xbox One الا ان كل لعبة تقريبآ تحصل فيها مشاكل تقنية سوا هي لعبة حصرية او لا. سبب آخر ان الشركات المطورة ماتحب تلعب بطاقتها بشكل مبكر من باب الحماس والتجهيز للعبتها بشكل افضل، لذلك غالبا تكون الألعاب المطروحة وقت نزول جهاز جديد ضعيفة تقنيآ او فيها مشاكل، لكن مالك الا الصبر فهو مفتاح الفرج.

الغاء مسلسل التأجيلات

ومين مايكره التأجيلات؟ تخيل انك تتحمس للعبة قوية ومبهرة ومن المفترض انها تنزل في الشهر الفلاني وتكتشف بالأخير انها تأجلات لشهور قدام!. غالباً تأجيل اللعبة يكون لأسباب منها تطوير اللعبة بشكل أفضل، واختيار وقت ممكن يكون سبب ان اللعبة تحقق مبيعات مرتفعة (كموسم الأعياد). وبنظري التأجيل شي سيء ويحبط اللاعب مثلما صار مع لعبة Watchdogs و Infamous: Second Son، لذلك المفروض ان الشركة المطورة تكون ملتزمة بموعد محدد لصدور اللعبة، ولو حصل تأجيل يكون خلال فترة قصيرة مثلا شهر الى ثلاثة اشهر كحد أقصى، او على الأقل لاتعطي موعد والشركة ممكن تلغيه في أي وقت.

إعادة أصدار الألعاب الناجحة

هذي النقطة تحديدا تبشر بالخير ونحتاجها حنا اللاعبين بشكل كبير. إعادة اصدار الألعاب يعني اختيار ألعاب غالبا تكون ناجحة على جيل سابق ويعمل لها تحسين الجرافيكس (Graphics) واضافة (Trophies) لها، وتحسين التقنيات المستخدمة في اللعبة..الخ، حتى تظهر بشكل لائق ومقبول على هذا الجيل الجديد، وبنفس الوقت تكون اللعبة اضافة لسوق الألعاب، وترضي بعض اللاعبين الي يحب يجرب لعبة لها ذكرياتها لكن بتطور أفضل من قبل. هذا الشي عاصرناه على الـPlaystation3 لما شفنا نزول لعبة ICO و لعبة Shadow of colossus وغيره كثير. لذلك اعتقد انه نحتاج لإعادة تحسين بعض العناوين الموجودة على الـPlaystation3 والـXbox360 مثل لعبة Last of Us و GTA V ، والحمدلله بعض شركات التطوير بدأت تتخذ الخطوة مثلما شفنا مع لعبة Rayman Legends و Tomb Raider، حيث ان المطورين وعدونا ان هذه الألعاب بتظهر بمظهر افضل من نواحي عديدة ان شاءلله.

ألعاب مطوّرين مستقلّين (indie) أكثر

شفنا بالسنوات الماضية وعلى اجهزة متعددة ألعاب المطورين المستقلين او زي مايلقبونها بألعاب الـIndie . غالبا ماتكون العاب المطورين المستقلين فيها ابداع من جوانب كثيرة وفيها افكار جديدة، لكن مشكلة المطورين المستقلين انهم بالغالب مهمشين عند اجهزة الألعاب المنزلية (Consoles)من ناحية الدعم المعنوي والمادي، رغم ان العابهم تحقق مبيعات وشهرة هائلة (كمثال لعبة Minecraft). الجميل بالموضوع بعد إتفاقية سوني الأخيرة لدعم المطورين المستقلين بشكل افضل في متجر الألعاب الخاص فيها، اكيد راح يتغير وضعهم للأفضل وهذا الشي تحتاج الشركات الاخرى تركز عليه مثلما ركزت عليه سوني. بالأضافة لترويج لألعابهم على شبكاتها ومواقعها حتى يتحمسون ويصدرون لنا اكبر عدد من العابهم وتزيد شريحتهم بكل تأكيد!

استفد من تجاربك

ببساطة هذي المقولة أوجهها للشركة المصنعة للجهاز نفسها والشركات المطورة للألعاب، ان تستفيد من تجاربها السابقة وخبراتها الكافية علشان تتفادى أخطاءها ولاتكررها مره ثانية. المفترض اننا نشوف أخطاء اقل في هذا الجيل من جميع النواحي، على سبيل المثال جهاز سابق للشركة الفلانية ماكان فيه حصريات متنوعة من المفروض ان الجيل الجديد له يتم تفادي أخطاءه بتطوير حصريات متنوعة بكل بساطة، ومثال آخر لعبة نزلت وطفش اللاعبين من مشاكلها او عيوبها المفترض الجزء الي بعده يتلافون أخطاءها تمامآ. المشاكل والأخطاء لابد ان تكون موجودة وهذا شي جداً طبيعي لكن الشركات الذكية هي الي تحاول تتلافاها بأفضل طريقة وبأقل ضرر ممكن.

هذي الخمس النقاط الي اشوفها شخصيآ قد تكون أهم أسباب تطور وانتشار أجهزة الجيل الجديد بشكل أوسع ولشريحة أكبر وبأقل سلبيات ممكنة. اكيد ان كل لاعب له وجهة نظره او نقاطة الخاصة فيه. شاركنا برأيك في التعليقات وان شاءلله يكون مقالي مفيد وخفيف عليكم.