احد اهم الأسباب اللي خلتني هالموضوع هم الناس اللي يدرعمون في التقييمات اللي نكتبها ويعارضونها بدون ما يقرون وش كتبنا أساساً، فاذا كنت واحد منهم، اتمنى تضبّط لك كاسة شاهي و تحاول “تقرا” هالموضوع لانه مهم:
1. التقييم عبارة عن رأي فقط
مهما كانت احترافية الموقع، التقييم يظل يعبّر عن رأي الكاتب فقط، وهالشي معناته انه تجاربه السابقه وذوقه بيكون لهم دور كبير في صياغة التقييم. اللي لعب 50 لعبة تصويب ممكن يشوف ان “بلاك أوبس 2” مكررة، بس اللي لعب 5 العاب تصويب ممكن يشوفها انها شيء رائع خرافي غير مسبوق.
فانظر للتقييم على انه رأي ثاني بس. اذا ما اعجبك فماهي نهاية الدنيا، عادي كل واحد ممكن يكون له رأي مختلف عن لعبة معيّنة ومستحيل يكون فيه تقييم يرضي الجميع مهما كانت احترافيته.
2. رأي الكاتب = رأي الموقع
على طاري الآراء، رأي كاتب التقييم يمثّل رأي الموقع حتى لو ما كان يمثّل رأي باقي اعضاء الفريق، وهالشي بتلقاه تقريباً في كل المواقع مو موقعنا بس. البعض كان يقترح علينا انه التقييم يكون مكتوب بواسطة أكثر من شخص، لكن هالشي بيكون مجرّد مضيعة وقت بالنسبة لنا لعدة أسباب:
- ما ينفع كل الفريق ينشغل بلعبة وحدة ويترك باقي الالعاب والأعمال الثانية في الموقع. ترا شغلنا ماهو مجرد نجلس نلعب العاب ونسولف عنها.
- فيه العاب ما يقدر يقيّمها البعض لانه اما نظامها ما يستهويه، أو انه ما عنده خلفية كافية عن سلسلة هاللعبة.
- طالما اننا نثق في قدرة الكاتب على تحليل اللعبة وكتابة رأيه عنها بشكل احترافي وواضح فهو كافي لتمثيل الموقع، بعض النظر نتفق معه او نختلف.
3. قراءة التقييم شيء مهم
خويّك ممكن يقول لك ان المطعم الفلاني فاشل وما ينفع تروح له. بس اذا خليته يشرح لك ليش، ممكن تكتشف انه قال فاشل لانه غالي، مو لان اكله مب زين، وانت انسان كاش وما عندك مشكلة مع السعر طالما ان الاكل يستاهل.
عشان كذا قراءة التقييم مهمّة. أعرف ليش الكاتب وصل لنتيجته النهائية مع اللعبة، ممكن تكتشف ان اغلب الأشياء اللي يعتبرها عيوب هي أشياء عادية بالنسبة لك. لا تقرا الحكم النهائي على اللعبة وتدرعم.
4. احكم على اللعبة بعد ما تنهيها
ممكن يكون فيديو اللعبة حمّسك، او انك استمتعت مره بالجزء السابق من هاللعبة، او “طقطقت” عليها شوي عند خويك، او لعبت الديمو شوي، لكن لا يعني ان عندك تصوّر كامل عنها.
العاب كثير ما تبيّن عيوبها او مزاياها الا بعد ما تخلصها. تبدا تكتشف مثلاً ان احداث اللعبه مكررة بشكل ممل، او نهاية القصة مالها هدف، أو اي سبب ثاني ما يبيّن معك في البداية.
الشخص اللي انهى اللعبة وقيّمها عنده تصوّر أفضل منك عن اللعبة (بغض النظر كلامه صح ولا لا)، والأفضل توفّر نقاشك معه الى ما تنهي اللعبة بنفسك.
5. “التقييم” و”الانطباع الأولي” شيئين مختلفين
البعض يجيني في تويتر بعد ما يسمع أحد حلقات البودكاست ويقول لي “ياخي لا تستعجل بالحكم على اللعبة وانت ما خلصتها، لانك آخر مره ما اعجبتك اللعبة الفلانية بس يوم خلصتها مدحتها”.
اي رأي نقوله عن لعبه ما خلصناها يصنّف تحت تصنيف “انطباع أولي”. يعني مجرّد انطباع عن اللعبة، ماهو حكم نهائي. زي اذا جلست تسولف مع واحد اول مره في حياتك، وكونت انطباع عنه انه انسان بثر وكلامه كثير، بس اذا عطيته فرصه تكتشف انه انسان رهيب بس يوم قابلك كان في مود “استبثاري” شوي.
نفس الشي مع الالعاب، اذا قلنا شي عن لعبه فهو انطباع أولي وممكن يختلف تماماً عن “تقييمنا” للعبة بعد ما ننهيها.
6. ما ينفع تقارن تقييم لعبتين
سؤال نشوفه بشكل مستمر: “ليش اللعبة الفلانية مقيمينها ‘ممتازة’ واللعبة الفلانيه مقيمينها ‘تمشي الحال’؟”
ما ينفع تقارن تقييمات الالعاب ببعض. ما تقدر تقارن تقييم لعبة سيارات بتقييم لعبة مغامرات لان كل لعبة تتقيّم بشكل مختلف وبناءاً على أسس مختلفة. حتى لو هم لعبتين في نفس التصنيف، كل لعبة بيكون لها عيوب ومزايا وظروف مختلفة تماماً عن اللعبة الثانية، فالمقارنه ماهي مجدية أبداً ولا تفيد أحد.
7. التقييم يكون للنسخة الأولية للعبة
اذا جينا نقيّم لعبة فحنا نحكم على التجربة اللي اختارت الشركة انها تنزلها في السوق بعيوبها ومزاياها. اذا الشركة نزلت “باتش” بعدين يرقّع المشاكل اللي فيها فما يعني اننا لازم نحدّث التقييم، لاننا قيمنا المنتج الأساسي. مو مشكلتنا ان المطوّر ما نزل ديمو يشوف فيه آراء الناس او انه استعجل في اصدار اللعبة.
بالاضافة الى ان تحديث التقييم معناتها انه لازم نتحقق بانفسنا ان المشكلة فعلاً انحلت، وهالشي عادة ياخذ وقت نفضّل نقضيه في تقييم لعبة جديدة.
8. اللعبة تتقيّم حسب اعداداتها وصعوبتها الافتراضية
يعني نقيّم اللعب على مستوى الصعوبة الافتراضي (غالباً normal) بدون تعديل الاعدادات، لانه هذي هي التجربة الأساسية اللي المطوّر اختار انه يوفرها للاعبين، وهي اللي بيلعب فيها اغلب اللاعبين.
اذا اللعبة سهله بزيادة على مستوى الصعوبة الافتراضي فهذي تعتبر مشكلة في اللعبة، و لا يعني ان حلها اني احوّل الى مستوى أصعب، لان السهوله المفروض القاها في المستوى السهل من اللعبة.
أيضاً اذا فيه شي مخرب على اللعبة لكن اقدر اطفّيه من الاعدادات، او اذا التحكم سيء لكن اقدر اصلحه بعد ما احوس في اعدادات التحكّم، فهذا الشي ما يحسب لان اغلب الناس ما راح ينتبهون او يسوون هالشي أصلاً.
9. التقييم هو اجراء منطقي ومحايد، ماهو عاطفي
نعم ممكن اعشق لعبة The Walking Dead مثلاً، لكن مو معناتها اني اجلس امدحها في التقييم واتغاضى عن عيوبها عشان الناس تشتريها وتدعم لعبتي المفضلة، لان في النهايه التقييم المفروض يكون محايد قدر الامكان وما يتأثر بشعور الشخص ناحية اللعبة.
للأسف بعض اللي يعلقون على التقييمات تحس نظامه “لا تذكر عيوب لعبتي المفضلة ولا ترا بخرّب”، ويبيك تخليها كانها افضل لعبه نزلت من ايام الاتاري.
10. الموزّعين مرّات يتسبّبون في تأخير التقييمات
موزّعين الالعاب (الشركات المسؤوله عن تسويق وبيع الالعاب عندنا) احياناً يتأخرون علينا في نسخ الالعاب الخاصة بالتقييم. المواقع الغربيه تجيها نسخ التقييم حقت الالعاب قبل ما تنزل اللعبة باسبوعين او أكثر، فتلقاهم يجهزون التقييم وينزلونه في يوم نزول اللعبة في الاسواق. عندنا للأسف في اغلب الحالات توصلنا اللعبة إما قبل كم يوم من اطلاقها (وهذا قليل يصير) او انه توصلنا بعد ما تنزل اللعبه للسوق، او حتى نضطر نشتريها بانفسنا بعد ما تنزل السوق. وهالشي للأسف يدفع بعض المواقع او المنتديات الى انها “تترجم” التقييمات الأجنبية على اساس تنزل تقييماتها بسرعه، بس حنا نشوف هالشي عمل غير اخلاقي ونرفض اننا نسويه.
—
فهذي كانت 10 اشياء اتمنى انها تكون فادتك واعطتك معلومه اضافيه عن التقييمات 🙂
