تحديثات ضخمة نزلت لأجهزة أجهزة بلاي ستيشن، وش الأشياء الجديدة فيها بالضبط؟

شرحنا قبل أسبوعين كل التفاصيل اللي أعلنت عنها سوني بخصوص التحديث الجاي لبلاي ستيشن 4. اليوم نزل (أو على وشك ينزل لك) التحديث واكتشفنا ان فيه أشياء كثيرة جديدة. غير كذا، نزلت تحديثات لبلاي ستيشن فيتا ولتطبيق بلاي ستيشن الرسمي على نظام iOS وأندرويد.

بالنسبة للأشياء الجديدة اللي عرفناها، فهذي هي بالترتيب:

تحديث 1.7 لنظام بلاي ستيشن 4

خيارات جديدة ليد التحكّم

•  صار بامكانك تتحكم باضاءة النور اللي في يد التحكم. البعض كان يشتكي من النور حق اليد ويقول انه ينعكس على التلفزيون وانه شي مزعج له.
• تم تحديث منصة اللمس (touchpad) لليد، وصار الحين بامكانك تستخدمها في الكيبورد وانت تكتب.

خيارات جديدة لنظام الأصدقاء (Friends)

• صار بامكانك الآن تشوف الأصدقاء المشتركين (mutual friends) اللي بينك وبين شخص ثاني، مثل فيسبوك وغيرها من الشبكات الاجتماعية.
• بامكانك تقبل اضافات الصداقة (friend request) من قائمة الأصدقاء مباشرة.

طريقة فرز جديدللتروفيز

• بامكانك الآن تفرز التروفيز حسب ندرتها (rarity).

طريقة جديدة للدفع في متجر بلاي ستيشن

• بامكانك الآن تدفع عن طريق الخدمة المشهورة PayPal في بلاي ستيشن 4.

أوامر جديدة لكاميرا بلاي ستيشن

• أوامر صوتية جديدة للكاميرا، بحيث يمديك الآن تشغّل التطبيقات من خلال الأوامر الصوتية.

تحديث بلاي ستيشن فيتا 3.15

تطوير تطبيق PS4 Link اللي يربط الفيتا بالبلاي ستيشن، بحيث صارت عملية الربط الحين أسهل من أول. طريقة الربط بتكون تلقائية، بحيث الفيتا يصير يتعرّف على البلاي ستيشن 4 تلقائياً مسجل دخول بنفس المستخدم على كل الجهازين.

تحديث لتطبيق بلاي ستيشن على أنظمة iOS وأندرويد

• بامكانك الآن تستلم تنبيهات.
• بامكانك تستلم اضافات الأصدقاء من خلال رسائل SMS أو الايميل.
• بامكانك تغيّر صورة بروفايلك من خلال التطبيق، بحيث صرت تقدر تختار أي صورة موجودة في جوالك.

تقريباً هذا أكبر تحديث نزل لنظام بلاي ستيشن 4، وأول مرة أشوف سوني تسوي تحديث لكل أنظمتها معها. وش رأيكم بهذي الخطوة الكبيرة؟ ووش الأشياء اللي تبغون تشوفونها من سوني في التحديثات الجاية؟