هل كانت بداية الجيل الجديد بداية قويّة؟

بدأ الجيل الجديد، والآن باقي شوي ويكمل سنة، وأعتقد جاء الوقت المناسب لنتسائل؛ هل كانت بداية هذا الجيل قوية؟

قبل ما نجاوب على هذا السؤال؛ خلونا نرجع شوي بالسنين على بداية الجيل الماضي، وخلونا نشوف بداية (PS3)، بدأ الجيل عام 2006 وكان بالنسبة للاعبين عصر ذهبي لنهضة الألعاب، ولكن لما نشوف الألعاب اللي نزلت في بداية الجيل نلقاها معدودة على الأصابع، أنا من الناس اللي شرو جهاز (PS3) على بدايته، وفي الحقيقة كنت أواجه أزمة في قلة الألعاب، أو خلونا نقول الألعاب الممتازة، لدرجة أني كملت سنة ونص مع الجهاز وما عندي ألا 4 أو 5 ألعاب!

لكن كان يميز الجيل السابق في بدايته؛ النقلة الكبيرة والتطور الملحوظ، وممكن يرجع السبب إلى ظهور ميزة الأونلاين وما يصاحبها من مزايا كبيرة من قوائم وغيرها، كقوة الجرافيكس وغيره. وفي الحقيقة أقدر أقول أن الفارق في الجرافيكس بين أول لعبة نزلت على الجيل اللي راح وآخر لعبة من الجيل اللي قبله؛ ما كان ذاك الفرق الكبير جدًا، ولكن مع هذا يعتبر نقلة نوعية كبيرة بين الجيلين، وأقدر أقول أنها تقريبًا مساوية للنقلة اللي صارت حالياً للجيل الجديد إذا ما كانت أفضل.

البداية الفعلية للألعاب في الجيل اللي راح أعتبره كان من عام 2008، ومن أقوى السنين اللي واجهها الجيل اللي راح كانت في عام 2011 ومحد يقدر ينكر هذا الشيء، يعني نقدر نختصر الكلام ونقول أن الجيل اللي راح أستغرق تقريبًا ثلاث سنين لين بدت قوته الحقيقية تظهر.

الآن لما نشوف الجيل الجديد؛ البعض يقول أن بدايته كانت ضعيفة وأن ما عليه ألعاب كثير ووو إلخ، أنا أحب أوضح شغلة واللي هي من الصعب جدًا يبدا جيل جديد ومعه فوق 40 لعبة!

الأن الجيل الجديد ما بيكمل سنة ونص الا وعندك قائمة مليانة بالألعاب القوية وتخليك تندهش من قوة الجرافيكس والتفاصيل وجودة الألعاب بشكل عام، وبعد شهر بتبدأ تنزل ألعاب أقوى، ولا ننسى سنة 2015 اللي فيها فوق 25 لعبة، كل وحدة أقوى من الثانية، وغير الألعاب اللي ما أعلنوا عنها وغير العاب الإندي اللي بتنزل، وكثير من الناس يتوقع أن سنة 2015 بتتخطى سنة 2011 من ناحية كثرة الألعاب القوية – يعني بتكون سنة تطفير اللاعبين -.

هذا يعني أن قوة الجيل الجديد بتبدأ في أقل من سنتين من نزوله، وإذا هذا كله والجيل توه في بدايته فما بالك بالسنين الجاية!، وهذا الشيء يدل على قوة هذا الجيل، ولا ننسى أن قوة (PS4) تساوي ضعف قوة (PS3) بـ 15 مرة تقريبًا من حيث الرام!، وهذا شيء يخلينا نتشوق أكثر لمستقبل هذا الجيل.

ختامًا: أحب أوجه سؤال لك أخي القارئ، وش رايك في بداية هذا الجيل من ألعاب وغيرها؟ وهل تفوقت على الأجيال السابقة؟ شاركونا بتعليقاتكم الرهيبة!