محمد الدوسري
مع أصدار الاجهزه الجديده بنهاية سنة “2013” PS4 & XBOX ONE ودخلنا بسنة “2015” صارت مشكلة شبه عادية ان سيرفرات سوني ومايكروسوفت تطيح بالشهر مره..وكثير من الاعبين اشوفهم متضايقين وماهم راضين ابد عن الي جالس يصير..وما ألومهم ابد الصراحه بالنهايه دافعين مبلغ وقدره عشان يلعبون اونلاين ويحصلون على مزايا الاونلاين بدون اي مشاكل وانا من الناس الي اعشق اني العب اونلاين مثلي مثل غيري..لكن بنفس الوقت من الناس الي ما يضرني ابدا ان الاونلاين يتعطل بأي جهاز كان..لأني بالنهايه الاقي نفسي تلقائيا ارجع لاسلوب لعبي قبل 10 سنين..؟!!
العب بكل بساطه وخذها بسهاله !
قبل ما ندخل بعالم الاونلاين كنا نلعب ومستانسين للأخر..لأن الدنيا كانت بسيطة تنزل لعبه جديدة تشتريها وتحطها بالجهاز والعب بروقان وسهاله، ما تحتاج تنزل اخر تحديث للجهاز او اللعبة، ما تحتاج تسوي لها تثبيت، ورغم هذا كله ما تحصل في اللعبة مشاكل بنسبة 1% من الالعاب الي جالسه تنزل بوقتنا الحالي مثل “Assassin’s Creed Unity” و “Halo Master Chief Collection”..هذا ان دل يدللك ان المطورين قبل يشتغلون بذمة وضمير وبراحتهم مافيه ناشر يجبرهم انهم ينزلون اللعبه سنويا او بوقت معين او انهم ينزلونها بمحتويات مالها اي اهميه بعالم الالعاب زي الي جالس يصير مع خدمة ال “Uplay” مع العاب “Ubisoft” وغيرها من العاب ثانيه..وهذا دليل ان مو شرط اي شي يكون متطور عن الاجيال الي قبله معناها متفوق..اعرف ناس ينتظرون “Far Cry 4” من سنتين عشان عجبهم الجزء الثالث من السلسله وبالنهاية يطلع الجزء الرابع عباره عن مشاكل تقنيه كبيره وخاصه بمنصة الـ PC ونقله جدا ضعيقه كجزء اساسي من السلسلة !
ارجع العب وأستكشف كأن السيرفرات ما طاحت !
كثير مننا يشتري لعبه ويلعب فيها كم ساعة او يخلصها بوقت قياسي ويتركها..او يحول لطور الاونلاين..هذا وقت انك ترجع تكمل الالعاب الي ما خلصتها او تستكشف عالمها او تخلص المهام الجانبيه باللعبه..في النهايه عالم الفيديو جيمز عمره ما كان عباره عن العاب اونلاين فقط , عندك عنصر القصه الاساسي , المهام الجانبيه , التحديات باللعبه وكيف تقدر تخلصها , التروفيز او الاتشيفمنت..غير كذا فيه العاب كثيره بعد ما تخلصها تستمتع بعالمها المفتوح مثل “Dragon Age Inquisition” او “Far Cry 4” وغيرها من الالعاب الثانيه..غير انك تقدر ترجع تلعب اللعبه بصعوبه أعلى عشان تستمتع بالتحدي فيها ومنها تطلع التروفيز او الاتشيفمنت باللعبه وبنفس الوقت تكون عندك خبرهـ كبيره باللعبه وتلاقي نفسك بالنهايه اخذت تجربه كامله باللعبه وعندك معلومات ما تحصلها ابد للشخص الي خلصها بوقت قياسي..وبكذا تكون حللت سعرها وبنفس الوقت تكون تعلقة فيها او حتى بالسلسله بشكل عام !
العاب الطور التعاوني بشكلها الاصلي ترجع متعتها بهالوقت !
تذكرون كيف كنا نستمتع بالالعاب التعاونيه قبل ما تطور العاب الاونلاين وتكون بنفس الشكل الي هي عليه الأن..كانت الالعاب تدعم طور تعاوني للاعبين او 4 لاعبين او بعضها يوصل لـ 8 لاعبين..كنا نشتري العاب مثل “Mario Kart” و “Mario Party” و Mortal Kombat , او اللعبة الي بتكلم عنها الي “Super Smash Bros” للـ Wii U..اللعبه نزلة الشهر الماضي وما كان عندي الوقت الكافي اني العبها بطور الاونلاين..وشفت كم واحد من اخوياي ماهو عاجبهم وضع السيرفرات..الي يبي يكمل التلفيل بلعبة ديستني , الي يبي يلعب فيفا اونلاين , والثاني كاسر خاطري من جد محمل “Far Cry 4” ووقفت ببداية التحميل..قلت لهم ليش هالزعل كله..تلقائيا جبت جهازي الـ Wii U مع كم كنترولر للجيم كيوب والبرو كنترولر وقلت لهم يالله كل واحد يختار له كنترولر تناسبه..تلقائيا كلهم جلسوا يحنون للايام الي كنا نلعب اجزاء سماش وماريو كارت مع بعض مثل اجهزت الـ 64 ونسخة الجيم كيوب وبعدها نسخة الوي..جلسنا نلعب بدون مبالغه فوق 3 ساعات متواصله لدرجة ثنين منهم قرروا يشترون الجهاز بأقرب وقت عشان سماش وماريو كارت فقط..هنا نلاحظ ان عمر الالعاب التعاونيه او التنافسيه ما تختص بالاونلاين ابد..وبرائيي اشوف متعتها انكم تكونون جمب بعض وتلعبونها بنفس المكان..اشوفها خلطه سريه من المتعه بالجيمنج !
انت جيمر بالنهايه..ما اتوقع كم سيرفر يطيح بتوقف متعتك باللعب ؟!
نعم..انت جيمر بالنهايه..اذا طفشت من طور القصه تقدر تروح للمهام الجانبيه , تقدر تحول لطور الاونلاين , تقدر تلعب التحديات باللعبه , تقدر تلعب لعبه ثانيه سواء لعبة مطور مستقل او لعبة معروفه او حتى لعبه قديمه او بجهاز قديم..بالنهايه متعة الالعاب عمرها ما انحصرت على نوع معين..لعبنا الالعاب بدون سيديات كانت بشكل كارتريدج , لعبنا الالعاب بأول اصدار الديسكات , لعبنا الالعاب برسوم الـ 8Bit والـ 16Bit والـ 32Bit وطالعين..لعبنا الالعاب بانواع واشكال الدقات من اقل دقه لحد 1080 وبعضنا 4K , لعبنا الالعاب من اجهزت SONY او Microsoft او Nintendo وغيرها من اجهزه , لعبنا الالعاب بالاجهزه المحموله ساعات تحصل لعبه ما يكون عندك اي علم فيها وتكون من افضل الالعاب الي لعبتها والسبب الي خلاك تتجاهلها هي انها بجهاز محمول مثل أفضل لعبة للسنه الماضيه لفريق عمل سعودي جيمر “Tearaway” , لعبناها بأنواع الكنترولات بأشكالها..ما يعوقنا اي شي لاننا بالنهايه ندور عن عنصر الـ “المتعه” باللعب وعمره ما انحصر على نوع او جهاز او لعبه معينه !
في الختام
أتمنى اني اعطيتكم بعض الحلول كيف تقدرون تسلون انفسكم باللعب ومو شرط يكون بطور الاونلاين..وكيف قبل كنا نستمتع بالالعاب ومتعتنا واصله السماء وولا عمرنا تمنينا الاونلاين يكون موجود لان عنصر المتعه ما ينحصر على نوع معين..بالنهايه لا ننسى اننا احنا كـ جمير حاربنا عشان تكون اجهزت الجيل الجديد ما تشتغل بالاونلاين فقط..عشان اوقات زي هذي نستمتع بالالعاب الي ما تحتاج اونلاين ومنها نريح من الطور التعاوني ونشوف وش الالعاب الي ممكن تعجبنا وما حصلنا وقت اننا نلعبها !
أيمن اليغشي
احمد خالد
