حياكم الله في متجرنا الالكتروني!

تحديث: أنهينا الشراكة مع المتجر ومالنا أي علاقة فيه حالياً وغير مسؤولين عن متابعة الطلبات أو حل المشاكل الخاصة فيها.

بعد شهور طويلة من العمل، يسعدني أخيراً الاعلان عن متجرنا الالكتروني الجديد: متجر ترفيه!

أحد أبرز الأقتراحات اللي تجينا دائماً هو “ليش ما تفتحون محل خاص فيكم”، وكنت شخصياً أقول ان هالخطوه ما جا وقتها، لاننا نحتاج نحط كامل تركيزنا على محتوى سعودي جيمر. الحين أخيراً جا وقته – هذا وقته!

هذا وقته لأننا -بفضل الله ثم بفضل دعمكم الكبير- كبرنا ووصلنا لمرحلة نعتقد اننا لازم مو بس نلبي احتياجات الجيمرز من ناحية المحتوى، نحتاج نلبيها بعد من ناحية توفير الالعاب والمنتجات اللي يحتاجها بأفضل أسعار ممكنة خاصة للناس اللي خارج الرياض اللي يعانون معاناة كبيرة في الحصول على الألعاب باسعار معقولة. طفشنا من كثر ما نتذمّر من غلاء أسعار الألعاب خاصة خارج الرياض، وقررنا أنه بدال ما نستمر نشتكي من هالمشكله، اننا نحاول نصير جزء من الحل. وبدال ما نفتح محل في الرياض، فضّلنا يكون عندنا متجر الكتروني يخدم جميع انحاء المملكة!

الجدير بالذكر ان سعودي جيمر هو أول موقع سعودي متخّصص في الألعاب الالكترونية يمتلك متجر خاص فيه لبيع الألعاب والمنتجات الترفيهية.

اذا دخلت موقع متجر ترفيه بتلقى أنه جاهز وفيه العديد من الألعاب والمنتجات بأسعار منافسة، فقط أطلب المنتجات والألعاب اللي تبيها وبتوصلك الى بيتك بعيداً عن الزحمه والمشاوير، وبعيداً عن حب الخشوم اللي نضطر له عشان نخلي محلنا المفضل يحجز لنا نسخه من لعبة نبيها، وما تحتاج الا حساب بنكي فقط للدفع.

حياكم في متجرنا!

اسئلة وأجوبة

س: متجر ترفيه موجود من فتره، وش اللي تغير؟
فعلاً،و لكن عقدنا اتفاقية الآن بحيث يصير متجرنا الرسمي وتحت ادارتنا.

س: ليش ما بديتوا متجر جديد من انفسكم؟
لان هدفنا نقدّم أفضل تجربة ممكنة للاعبين، وفريق ترفيه عنده خبرة كبيره في مجال التجارة والتجارة الالكترونية، فالأفضل هم يتولون خدمة عملاء المنتجر وادارة المنتجات، وفريقنا يركّز على شغله المعتاد عشان ما تتأثر جودته. ما نبي نشتّت أنفسنا.

س: ليش ما يصير المتجر داخل موقع سعودي جيمر؟ ليش خليتوه زي ما هو في موقع مستقل؟
عشان نبتعد عن أي لخبطه أو مشاكل تقنية ممكن تصير في البداية، ما نبي المتجر يأثر على سعودي جيمر أو العكس. بالاضافة الى اننا نفضّل اذا الواحد عنده اي استفسارات انه يرسلها للايميل (او حساب تويتر) المناسب، بدال ما يرسل شي يخص طلبات المتجر لايميل الموقع، أو شي يخص الموقع لايميل المتجر مثلاً.

س: وش احتاج عشان اشتري من المتجر؟
حساب بنكي فقط (الراجحي، الاهلي، الرياض، سامبا). مجرد ما تنتهي من طلب الشيء اللي تبيه بتوصلك بيانات التحويل. تحوّل قيمة المنتجات اللي شريتها (بالاضافة الى 25 ريال قيمة الشحن)، وبيوصلك طلبك الى باب بيتك خلال فترة من 24 ساعة الى 4 أيام عمل حسب مدينتك (المدن الرئيسية والمدن الكبيرة توصل لها الطلبات بشكل أسرع).

س: ليش اشتري من متجر ترفيه وانتظرها بدال ما اروح المحل واشتريها اليوم؟
لعدة أسباب منها:

• أسعار الألعاب واضحه للجميع ماهي من راس عامل المحل اللي ممكن يغيّر في السعر حسب الزبون.
• تضمن ان نسخة من اللعبة اللي تبيها موجودة بدال ما تطق مشوار وما تلقاها.
• تختصر ساعات ممكن تقضيها في الزحمه او الدوران بين المحلات عشان تشتري لعبه وحده جديدة.

يعني بتوفر وقت طويل جداً على المدى البعيد. ولا تنسى انك تدعمنا بهالطريقه بعد وتتيح لنا نقدّم أشياء أفضل وأفضل سواءاً في المتجر أو الأشياء اللي نسويها للموقع.

س: هل وجود المتجر راح يأثر على حيادية المحتوى أو التقييمات بأي شكل من الأشكال؟
علاقتنا مع الموزّعين والمعلنين ما أثرت في حياديتنا ومصداقيتنا من يوم بدينا الموقع، وبالتالي نستبعد تماماً ان المتجر بيكون له أي تأثير من هالناحية. ما نستمتع بشغلنا أصلاً الا وحنا نحس اننا نقدر نعبّر عن رأينا بكل أريحية عن الألعاب والمنتجات بدون تأثير من أي شيء أو أي أحد. بتشوف هالشي بنفسك من خلال متابعتك للموقع.

س: ليش مافيه منتجات خاصة بسعودي جيمر في المتجر؟
لان همنا الأساسي في البداية هو حل مشكلة توفّر الألعاب ومحاولة توفيرها للجيمرز في جميع انحاء المملكة بأسعار مناسبة، مو بس نفتح متجر هدفه الترويج لموقعنا عن طريق منتجات خاصة فيه (زي ما تسوي بعض المواقع الاجنبية). بالاضافة الى اننا نبي نوفّر منتجات جودتها عالية تليق بمتابعينا، وهالشي مرات ياخذ وقت. لكن فيه منتجات جميلة جايه في المستقبل القريب نبي نعلن عنها في وقتها ان شاءالله.

س: هل ناوين تطوّرون شي في المتجر؟
أكيد! مخطّطين لتطويرات كثيرة للمتجر بننفذها تدريجياً ان شاءالله. نبي نخليه التجربة المثالية المصّممة من الجيمرز، إلى الجيمرز.

—–

ختاماً، نتمنى تعجبكم تجربة التسوّق في المتجر، واذا عندكم أي ملاحظة خاصة بتطوير المتجر، فنتمنى ترسلونها لنا على الايميل store@saudigamer.com