هل تتوقع راح تنجح فكرة نظام تشغيل SteamOS؟

أعلنت اليوم شركة “فالف” (مالكة متجر ستيم) عن أول اعلان من اعلانتها الثلاث وهو نظام جديد باسم SteamOS اللي بيكون مبني على نسخة معدّلة من نظام لينكس.

نظام لينكس ماعليه عدد كبير من الألعاب زي وندوز (أو حتى ماك)، لكن الشركة قالت أنه فيه مطوّرين كثيرين بيطوّرون ألعابهم للنظام في 2014. وبحكم علاقات الشركة القويّة مع المطوّرين، فما استبعد انها تضبّط لها عدد كبير من الألعاب خلال السنة الجاية.

بس الى ذاك الوقت بيكون فيه طريقه انك تشغّل الألعاب اللي شريتها على وندوز أو ماك: تبث اللعبة مباشرة من جهازك الى جهاز بنظام SteamOS مشبوك بالتلفزيون بحيث تلعب اللعبة على التلفزيون مباشرة. تقريباً ترقيع للنقص الى ما يصير فيه ألعاب كثيرة تشتغل عليه. وبيكون فيه بعد بث لخدمات موسيقى وفيديو، بس أستبعد بتكون مدعومة رسمياً عندنا (مثل ماهو الحال مع باقي الخدمات في بلايستيشن واكس بوكس وغيرها).

شركة فالف -مثل ما ذكرت- تفضّل أنها تتحكّم بالنظام بشكل كامل (بدال ما تسوي شي مبني على وندوز مثلاً) عشان تطوّر كل نقطة تحتاج لها لدعم الألعاب، وعشان يكون جهاز ترفيهي بحت. وبيكون فيه أيضاً مزايا مشاركة الألعاب والأشياء اللي موجودة في ستيم.

الحلو في الموضوع أنه بيكون نظام مجّاني تقدر أي شركة تصنّع له جهاز خاص فيها. بيصير الوضع تقريباً زي نظام الاندرويد، يعني أتوقع نشوف عدّة اجهزة بمواصفات متفاوتة للنظام.

أول ما طلعت إشاعات جهاز خاص بستيم كنت أتمنى ان شركة فالف تحتكر النظام وتقدّم ثلاث اجهزة بمستويات متفاوته مثلاً، بحيث تكون تجربتك مضمونة حسب الجهاز اللي شريته، زي البلايستيشن مثلاً حط اللعبة ولا تشيل هم انها بتشتغل زين أو لا. وجود عدد كبير من الأجهزة أخاف يصعّب الموضوع على المطوّرين (زي ماهو صاير مع الأندرويد)، وتصير شايل هم هل اللعبة بتشتغل زين (أو بتشتغل أصلاً) على جهازك أو لا، ونرجع لنفس حوسة الPC اللي موجودة حالياً.

باقي للشركة اعلانين هالأسبوع، هل بيعلنون عن جهاز قوي ينافس البلايستيشن 4 والاكس بوكس ون بسعر منافس لهم بعد؟ ما أدري، لكن أتمنى هالشي صراحة. زيادة المنافسة بتخدمنا كثير كلاعبين، وشركة فالف أثبتت من فترة طويلة أنها أكثر شركة فاهمة للاعبين وتدعمهم بمزايا رهيبة.

نبي نعرف رأيك بالنظام: بشكله الحالي، هل تتوقّع له النجاح ومنافسة أجهزة الجيل القادم؟ شاركنا بتصويتك ورأيك في التعليقات!