مشهور الدبيان
وش سالفة اللعبة
لعبة أكشن سريعة تعتمد على اسلوب المبالغة سواء في الأسلحة أو المشاهد أو الأحداث اللي تصير فيها.
معلومات اللعبة
الايجابيات
- أسلوب قتال سريع جداً وسلس وسهل تتعلم عليه.
- أسلحة مجنونة بحركاتها وتنوّعها. كل سلاح تشيل منه اثنين، وتقدر تستخدم اثنين بيدينك واثنين برجولك بنفس الوقت! مو بس كذا، وتقدر بعد تضبط لك تشكيلتين من الاسلحة تحوّل بينها بضغطة زر وسط القتال!
- مشاهد ملحمية أسطورية تخليك تتنح فيها من ضخامتها.
- الطور التعاوني (أونلاين) مع انه محدود ويخليك تلعب مع لاعب واحد في مراحل صغيرة، الا انه يضيف عمر اضافي للعبة.
- أشياء كثيرة تفكّها في اللعبة من حركات واسلحة وغيرها (منها مفاجآت رهيبة مره!)، بالاضافة لبعض التطويرات اللي ممكن تسويها لشخصيتك.
السلبيات
- الايحاءات الجنسية والتعرّي في اللعبة تخليها لعبة غير مناسبة لصغار السن، علماً بان التعرّي فيها ما يبيّن أي تفاصيل في الجسم (تحس كانك تشوف مانيكان ما عليه ملابس)، بس برضه شي لازم تعرف عنه.
- حرفياً كل وحوش اللعبة (عدا واحد) تقدر تقتلهم بنفس الطريقة: وخر عن ضربته عشان يصير الوقت بطيء، ثم اضربه، ثم كرر الحركة لين ما يموت. حتى رؤساء المراحل مافيه استراتيجيات معيّنة لقتلهم. اللعبة ما تجبرك تفكّر أو تنوّع حركاتك بأي شكل من الأشكال، وهالشي يخلي القتال روتيني بشكل ممل جداً لدرجة ان بعض الرؤساء فزت عليهم وانا سرحان افكر بشي ثاني (من ضمنهم الرئيس الأخير).
- لعبة سهلة نسبياً بسبب النقطة السابقة. من الألعاب القليلة جداً في السنوات الماضية اللي بديت ألعبها على أعلى مستوى صعوبة، ومع ذلك ما توهقت الا في منطقه أو منطقتين فقط في اللعبة، كل المراحل عديتها بشكل سلس جداً.
- العروض في اللعبة مستواها سيء. كثير منها مافيه أي حركة (تتفرج على صور ثابتة للشخصيات وهم يتكلمون) حتى العروض اللي المفروض فيها أكشن! تحس ان المطوّرين ما كان لهم خلق يخرجون كل المشاهد. حتى مستوى الحوارات صار أسوا من الجزء الأول بشكل واضح.
- قائمة اختيار المراحل ما تبيّن لك التقييمات اللي حصلت عليها في كل مرحلة (عشان ترجع تحسّن ادائك فيها)، وهالشي يقلل من عمر اللعبة بشكل كبير.
- زواية الكاميرا (اللي جايه من ورا الشخصية) راح تخرّب عليك الأكشن في أوقات كثير، لأنك بتنضرب من اعداء ما تشوفهم اصلاً. هذي مشكلة تلقاها بألعاب أكشن كثير للأسف.
- تذكر موسيقى الجزء الأول الرهيبة اللي تلصق في المخ؟ لا تتوقع شي بمستواها في هالجزء.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
بايونيتا 2 من الألعاب اللي بتستمع فيها بشكل كبير اذا كنت شخص جديد على ألعاب الأكشن أو تحب ألعاب الأكشن البسيطة. اما اذا تدوّر لعبة فيها تحدّي وعمق أكبر فممكن تخيّب أملك. لكن مع ذلك أعتقد أي محب لألعاب الأكشن لازم يعطيها فرصة.
ألعاب مشابهة
- سلسلة God of War.
- سلسلة Devil may Cry.
فيديو اللعبة
Loading ...
عبد الله محمد
احمد خالد
Saudi Gamer
