أهم ميزات تحديث ٢.٠٠ لنظام بلاي ستيشن ٤

وأخيرا التحديث v2.00 بينزل للبلايستيشن4 بكرة وبيكون فيه ميزات وتطبيقات خرافية  ننتظرها من زمان واللي راح تغير تجربة الجهاز للأفضل إن شاء الله. وهنا قائمة كاملة بأهم مميزات النظام v2.00 لجهاز البلايستيشن4 :

1- خاصية “Share Play”:

هذه الخاصية بتخليك تلعب الالعاب اللي فيها طور تعدد لاعبين محلي  مع خويك عن طريق الاونلاين بحيث تقدر ترسل له دعوة يلعب معك اللعبة الموجودة على جهازك  ويكون هو اللاعب الثاني وكأنه عندك في بيتك حتى لو ما كانت عنده اللعبة يكفي بس إنكم كلكم يكون عندكم إشتراك بلايستيشن بلص.

2- تطبيق “YouTube”: 

وأخيرا تطبيق YouTube بينزل على البلايستيشن4 وبتصير تقدر ترفع مقاطعك  من جهازك الى قناتك في YouTube مباشرة باستخدام زر SHARE على يد التحكم.

3- الخلفيات:

بعد طول إنتظار بيمديك الحين تخصص خلفية الشاشة الرئيسية لجهازك بخلفيات متحركة والوان من إختيارك وكهدية شكر من سوني على دعم عشاقها المتواصل راح توفر لنا خلفيات متحركة للعبتين Destiny و Call of Duty: Advanced Warfare ببلاش.

4- تحسينات على نظام البث المباشر في الجهاز:

الحين بيصير يمديك تخزن البثوثات اللي تسويها على حسابك عن طريق الجهاز وأيضا تحسين خيار البحث وإضافة تصفية للنتائج المعروضة.

5-  منطقة استعراض مكتبة الالعاب:

تم إعادة تصميم المنطقة اللي تشوف فيها الالعاب صارت مرتبة أكثر وتقدر تختار اللعبة اللي تبيها بسرعة وسهولة كبيرتين.

6- تشغيل الموسيقى عن طريق إدخال ذاكرة خارجية في منفذ الUSB:

الحين يمديك تشغل أي موسيقى تبيها على الشاشة الرئيسية أو حتى وانت تلعب من قطعة فلاش خارجية تشبكها في منفذ الUSB.

7 تحسين لصفحة What’s New:

الحين بتقدر تشوف مقترحات وتحديثات وحتى بثوثات من أصدقاء أصدقاءك في مقدمة صفحة What’s New.

8- اللغة العربية:

وأخيرا الجهاز بيدعم اللغة العربية بشكل كامل من حيث عرض القوائم باللغة العربية وإمكانية المراسلة باستخدام لوحة مفاتيح عربية.

9- تحسينات عامة للنظام:

الحين تقدر توقف تحميلات الالعاب الشغالة في الجهاز وترجع تكملها من جديد بعدين. وأيضا تم إضافة أوامر صوتية جديدة للجهاز. وبعض التحسينات الاخرى على واجهة البارتي.

بينزل برضو تحديث خاص بجهاز الفيتا والبلايستيشن تي في ( PS TV ) رقم v3.35 واللي بيسمح للمستخدمين أنهم يستخدمون أربعة أيادي تحكم للجهاز عن طريق خاصية  Remote Play. وأيضا بيتم إضافة تطبيق Live from PlayStation واللي تخليك تتفرج على البثوثات المباشرة من البلايستيشن4 على الجهازين.

وأخيرا وليس أخرا بينزل تحديث لتطبيق البلايستيشن الخاص بالجوالات راح يعيد تصميم الواجهة الرئيسية للتطبيق.

أسبوع عظيم لملاك أجهزة البلايستيشن خصوصا البلايستيشن4 أكثر ميزة متحمس لها هي Share Play بصراحة فكرة مجنونة يعني يمديني العب مع خويي أونلاين حتى لو اللعبة نفسها ما فيها لعب أونلاين أهنئ سوني على هذه الفكرة. وش رأيكم أعزائي وش أكثر ميزة متحمسين لها في هذا التحديث؟ شاركونا أرائكم تحت في التعليقات.