محمد الشريف
تحديث: سوني اليابان أعلنت عن تاريخ نزول التحديث، وبيكون في 30 ابريل. سوني أمريكا وأوروبا ما أعلنوا عن التاريخ الى الآن.
أعلنت سوني اليوم عن تفاصيل أكثر عن التحديث الجاي لنظام بلاي ستيشن 4، واللي أعلنوا عنه قبل فترة لكن ما كانت التفاصيل واضحة، بالاضافة الى ان بعض المميزات ما تم تأكيدها من سوني. تقدر تقول ان الأمور الحين صارت واضحة وجا الوقت المناسب للنقاش عنها.
أعتقد ان هذا التحديث هو من أفضل التحديثات للنظام من اطلاق الجهاز، وبتشوفون الميزات والتعديلات والتصليحات الكثيرة اللي حطتها سوني في هذا التحديث.
تطبيق لتعديل الفيديوات اللي تسجلها
تطبيق ضخم باسم SHAREfactory تقدر تعدل فيه الفيديوات حقتك بطريقة سهلة وبسيطة. هذا فيديو يشرح لك كل شي في البرنامج:
تحميل الألعاب اللي سويت لها طلب مسبق
هذي الميزة كانت موجودة في بلاي ستيشن 3 ولكن غابت بشكل غريب عن بلاي ستيشن 4، والحين رجعت. فكرة الميزة الرهيبه -واللي صارت ضرورية- انك الآن تقدر تحمّل الألعاب اللي سويت عليها طلب مسبق وتصير جاهزة للعب، بحيث تقدر تلعب اللعبة في لحظة الاطلاق حقتها.
بامكانك ترسل الصور والفيديوات اللي تسويها الى قطعة تخزين خارجية (USB drive)
هذي برضه من الأشياء اللي طالب فيها الناس لفترة طويلة، وانا واحد منهم برضه. بعض الأحيان أسجل لقطات فيديو لكن ما أبغى أرفعها على فيسبوك، الآن بامكانك ترسل هذا المقطع الى هارد ديسك وتحطه على اللاب توب وتعدّل عليها اذا تبي، وترفعها على يوتيوب.
تقدر تسوي بث عن طريق قطعتك الخاصة
سوني بتحط امكانية اطفاء HDCP واللي بتخليك تقدر تسوي بث باستخدام قطعتك الخاصة، بعد ما كنت ما تقدر تسوي بث الا من خلال البلاي ستيشن 4 نفسه.
قبل فترة أعلنت سوني برضه عن التحديث هذا وقالت ان بيكون فيه امكانية البث على موقع Twitch بجودة 720p وتحفظ الفيديوات حقتك هناك، لكن ما ذكروها اليوم في اعلانهم عن تحديث 1.7. احتمال انها تأجلت واحتمال انها موجودة لكن ما ذكروها.
عموماً ذكرت سوني في نهاية المقالة ان فيه ميزات ثانية ما تكلموا عنها، واحتمال ان ميزة البث هذي بتكون منها.
أخيراً، قالت سوني ان التحديث بينزل “قريباً” لكن ما أعطوا تاريخ محدد للآن.
وش رأيكم بالتحديث؟ رهيب صح؟ عطونا آراءكم بالتعليقات 🙂
Saudi Gamer
