وش اللي خلا الالعاب الجديدة تفقد سحر الالعاب القديمة؟

مرت 27 سنة تقريباً على بداية عصر العاب الـ8-bit القديمة مع اصدار جهاز ننتندو (Nintendo Entertainment System) في امريكا. وقتها كانت ثورة تقنية عظيمة في عالم الالعاب، ونزلت العاب ما زالت الى الآن تلهم مطوّرين كثيرين سواءاً من ناحية اللعب أو الموسيقى (خاصة Super Mario Bros).

الشي اللي كان محيرني فترة طويلة هو: ليش ما زالوا اللاعبين (والمطوّرين) الى الآن يستخدمون رسومات وموسيقى عهد الـ8-bit لاضفاء لمسة “جيمريه” لأي شي يسوونه؟ الالعاب تطوّرت بشكل خرافي من جميع النواحي، ومع ذلك ما زالوا يستخدمون “ستايل” العاب نزلت قبل أكثر من 20 سنة! حتى شعار موقعنا حرصنا فيه نستخدم اسلوب الـ8-bit عشان نبيّن انه موقع العاب.

وش المشكلة في التطوّر اللي وصلناه في عالم الالعاب؟ وليش ما نستخدم الستايل المنتشر في الالعاب الحالية (جرافيكس ثري دي متقدّم، موسيقى تصويرية تنافس موسيقى هوليوود…الخ) للاشارة الى عالم الالعاب؟ هل هو مجرّد حنين الى الماضي زي اذا الواحد اشتاق للجالاكسي ابو قصدير (اذا كنت تعرفه) مع انه نفس الطعم؟ او نستخدم الالعاب القديمة (الـ8-bit) كرمز لعالم الالعاب لان هي اللي بدا معها عشق كثير من الناس للالعاب اصلاً؟

شخصياً اعتقد انه لسبب مختلف تماماً..

اجهزة Nintendo Entertainment System (أو NES اختصاراً) و Sega Master System اول ما نزلوا في 1985-1986 كانوا محدودين جداً من الناحية التقنية، وهالشي كان يجبر كل الالعاب على هذي الاجهزة انها تتشارك بخصائص معيّنة:

• الرسوم كانت ثنائية الابعاد (2D) وتحس كل شي عباره عن مربعات صغيره ملونه ملصقه مع بعض بشكل واضح.
• حركات الاشياء والشخصيات (او الانميشن) كانت غالباً مقطّعة وغير انسيابية. شي تقدر تشوفه بوضوح في هالصوره.
• موسيقى بدائية جداً. يستخدمون الاصوات البسيطة جداً اللي يقدر يطلعها الجهاز عشان يكوّنون موسيقى تناسب اللعبة، زي موسيقى سوبر ماريو الشهيرة.

ممكن تتسائل الحين: طيب اذا هي كانت خايسة مره كذا (مقارنة بالحين)، وش اللي يخليها الى الآن تعتبر شي مميّز؟ السبب -باعتقادي- بسيط جداً: الخصائص الثلاثة المذكورة كنا وما زلنا ما نشوفها الا في عالم الالعاب فقط، وهالشي انشأ لها هويتها المستقلة اللي تختلف عن اي شي ثاني، وصارت هي الشي اللي يمثّل عالم الالعاب مهما تطوّرت التقنيات.

مشكلة الالعاب هاليومين انه تحس كثير منها همها الوحيد انها تصير محاكية للواقع، أو للأفلام على الاقل. الرسومات صايره واقعية لدرجة تحسسك انك مرات تتابع فلم تفاعلي مو لعبة.

حتى العناصر الموجودة في الالعاب تكون غالباً موجودة في عالمنا أو شفتها في مكان ثاني غير الالعاب. قليل الالعاب الحين اللي تاخذك في تجارب بعيدة جداً عن واقعنا وعن الافلام وحتى “افلام الكرتون” اللي ممكن نشوفها.  خذ لعبة Pacman كمثال، لو تفكّر فيها اللعبة كلها مالها أي معنى (شي أصفر عنده فم ولازم ياكل حبوب وفيه اشباح يطاردونه؟)، بس هالشي هو اللي يخليها ترسخ في المخ وتتميّز عن اي شي ثاني، وما أثّر على متعة اللعب. نفس الشي ممكن نقوله عن ماريو. فكّر فيها.

الموسيقى أيضاً صايرة متطوّرة ويخصص لها ميزانيات عشان تصير شي فاخر. ومع انه فيه مقطوعات موسيقى رهيبة كثيرة في العاب هالجيل، الا انها موسيقى تحس ممكن تسمعها في اي مكان. ماهي شي ما تسمعه الا في الالعاب.

يعني مثلاً لو تسمّع واحد ماله في الالعاب موسيقى لعبة 2 Assassin’s Creed و موسيقى فلم Gladiator، غالباً بيعتقد ان كلها موسيقى أفلام، لان مافيه شي يوحي في موسيقى Assassin’s Creed 2 انها موسيقى تابعة للعبة.

عشان كذا انبسط شخصياً لما تنزل لعبة جديدة تستفيد من خصائص الالعاب القديمة اللي ميّزتها عن غيرها. خذ Super Meat Boy كمثال. انت تلعب بقطعة لحم ولازم تنقذ حبيبتك (المكوّنه من لصقات طبيّة) من شرير عباره عن جنين أو شي مدري وش سالفته بالضبط. القصة بسيطة مرة (زي ماريو)، والمطوّر ركّز على اللعب نفسه بحيث يصير ممتع ومليان تحديات (برضه زي الالعاب القديمة)، وما ننسى الموسيقى اللي فيها لمسة واضحة من موسيقى الالعاب القديمة المميزة، اللي ممكن تخليك تميّز انها موسيقى لعبة حتى لو سمعتها وانت ما تعرف شي عن اللعبة.

هل ضرها بساطتها ومحاكاتها للألعاب القديمة بشكل كبير؟ ابداً. حتى فازت بعدة جوائز كأفضل لعبة قابلة للتحميل في 2010، وحتى الموسيقى حقتها فازت بجوائز.

لا تفهم كلامي غلط وتحسّبني اتذمر من توجه الالعاب الجديدة. استمتع كثير بالالعاب الجديدة وكل الخصائص الموجودة فيها، بس ما اخفيك اني افتقد للتميّز اللي كان موجود في الالعاب سابقاً. ما احس الالعاب لها هويتها المميزة الحين زي أول (بشكل كافي على الاقل). ولا اعتقد راح نحل شي لو بنخلي المطوّرين مثلاً يطورون كل الالعاب بالستايل القديم، لانه بيكون شي يطفّش بعد ما جربنا كل هالتنويع في الالعاب.

كل اللي اتمنى يسوونه مطورين الالعاب هو انهم ما ينسون انهم جالسين يطورون “العاب”. يعني لا يتحمّسون مره ويخلون العابهم واقعية بزيادة، لان كل ما صارت الالعاب واقعية أكثر، كل ما قربت أكثر من العالم الحقيقي اللي جالسين نحاول نهرب منه عن طريق هالالعاب. شي حلو انك تضغط زر ويتغير لبسك فجأه. شي حلو انك اذا سويت حادث شنيع بسيارتك في وسط سباق تقدر فجأه تكمل ولا كأنه صار شي. شي حلو انه لاعبك يجيه عشر طلقات وما يموت، ويقدر يتخبّى كم ثانيه وفجأه يتعافى ولا كانه صار شي.

اعتقد هذي الاشياء البسيطة هي كل اللي بقى من هوية الالعاب. لو راحت مع الوقت فما اعتقد بنستمتع بالالعاب زي ما نستمتع فيها الحين.

واخيراً، اتركك مع موسيقى رهيبه من فلم Wreck-it Ralph، الفلم اللي الهمني اكتب هالمقال..