Saudi Gamer
السنة الجاية بتنزل ألعاب كثيرة، وكثير منها متحمسين له بشكل غير طبيعي. كل الأجهزة بتنزل عليها ألعاب قويّة، سواءً أجهزة الجيل الجديد أو الجيل القديم، أو جيل البلاي ستيشن 3 والاكس بوكس 360.
Destiny من أكثر الألعاب اللي متحمسين لها، واللي بتكون لعبة أونلاين تعاونية من تطوير استديو Bungie اللي سوّا لنا ألعاب Halo. عالم اللعبة رهيب، وسالفة انك تلعب هالعالم المفتوح كامل مع أخوياك بتكون تجربة ممتازة، خصوصاً وان المطوّر وعد انها راح يدعم اللعبة لسنوات طويلة.
Quantum Break اللعبة الحصرية للاكس بوكس ون واللي من تطوير الاستديو الخرافي Remedy واللي سوا سلسلة Max Payne ولعبة Alan Wake الرائعة، متحمسين نشوف وش بيقدمون لنا في كوانتوم بريك. اللعبة شكلها غريب وماله مثيل، وهذا شي نبحث عنه دائماً في ألعاب الفيديو.
The Division من يوبيسوفت بكل تأكيد تبهرنا في كل عرض جديد ينزل للعبة، شفنا الرسومات الخرافية، وشفنا ديمو للعبة في E3 وGamesCom وجلسنا مع مطورينهم وشفنا كيف طموح اللعبة العالي. اللعبة بتكون تعاونية وعالم مفتوح، وهذا بكل تأكيد شي رائع، ويبدو ان هذا توجّه الألعاب في الجيل الجديد!
TitanFall لعبة التصويب الخرافية واللي جربناها في GamesCom وشفنا بنفسنا قد ايش شكلها خرافي، تخيّل أسلوب لعب Call of Duty السريع والرهيب في عالم مستقبلي شبيه بلعبة Halo، بحيث تلقى فيه آليات تستخدمها في القتال، بالاضافة الى ان الجنود اللي بتلعب فيهم راح يصير عندهم قدرة انتقال جديدة، وهي النقزات -أو القفزات- الطويلة بحيث يمديك تنقز بين الجدران الين ما توصل لأمكنه غير متوقعة وتفاجئ فيها خصومك.
Metal Gear Solid V تغيّرت تغيّر شبه جذري في الجزء الخامس، شفنا كيف اللعبة تحوّلت من لعبة أشبه بالخطّية الى لعبة عالم مفتوح بشكل كامل. شفنا برضو في عروض اللعبة ان طريقة اللعب برضو تغيرت بشكل كبير وجريء، بحيث صار العالم مفتوح ويطلب من اللاعب انه يكون منتبه أكثر، وان الجنود بيتم توزيعهم بشكل عشوائي وان لهم سلوكهم الخاص.
كوجيما قال في مقابلة انّه ما قد سوّا تغييرات في لعبة ميتال جير سوليد مثل ما سوّا مع ميتال جير سوليد 5، وانه حتى هو أصبح قلق وماهو قادر الين يشوف ردّة فعل الجمهور على لعبته الجديدة، واللي قال انه أكبر تغيير في السلسلة من ميتال جير سوليد الأولى!
أخيراً، من الأشياء اللي أثارت اهتمامنا ان اللعبة بيتم قسمها الى نصفين، النصف الأول بيكون تحت اسم Ground Zeroes واللي بيكون مثل “المدخل” الى ميتال جير سوليد 5، والنصف الثاني بيكون تحت اسم The Phantom Pain واللي بيكون الجزء الفعلي للعبة، واللي بيكون فيها العالم مفتوح بشكل كامل.
كل هالأسباب، بالاضافة الى أسباب ثانية، خلّتنا نختار لعبة ميتال جير سوليد 5 كأكثر لعبة ننتظرها السنة الجاية. نبي نشوف وش عندك ياكوجيما!
وش أكثر لعبة متحمس لها في 2014؟ شاركنا رأيك في التعليقات!
صالح بازرعة
