مايكروسوفت تختبر بيع الألعاب على متجرهم الاكتروني بسعر منخفض

عرضت مايكروسوفت لعبتهم رايز: اسن أوف روم (Ryse: Son of Rome) على اكس بوكس لايف بسعر 40 دولار. يبدأ العرض هذا اليوم وبيستمر الى 26 فبراير، يعني بيستمر حوالي ثمانية أيام. هذا العرض احتمال يطبقونه مايكروسوفت على ألعابهم الجاية، بحيث يبيعونها على الاكس بوكس لايف بسعر أقل من نسخة قرص البلو راي، أو البلو راي ديسك.

يقول مايك بارا، مدير ستديو اكس بوكس:” كثير من الناس طلبوا مننا اننا نسوي عروض أفضل على المحتويات اللي نبيعها على الاكس بوكس، لذلك بدأنا نسوي بعض الاختبارات على أسعار الألعاب”.

واحد من اللي ردوا على مايك، سأله عن امكانية تحميل الألعاب قبل موعدها الأصلي، عشان اذا جا وقت اطلاقها يبدأ يلعب على طول ولا يحتاج يحمّل اللعبة وينتظر. يقول مايك:” حنا نحب هذي الميزة، وعندنا قائمة طويلة فيها ميزات بيحطونها في اكس بوكس لايف قريباً”.

هذي العروض أنتظرها من زمان، ومن زمان تكلموا عنها سوني ومايكروسوفت وقالوا انهم بيخلون أسعار الألعاب في المتاجر الالكترونية أرخص من الأسعار اللي في المحلات، لكن ماحد منهم سواها الى الآن. مطالبتي بتخفيض الأسعار طبيعي، وهو انه طالما ان الشركات استغنت عن تكلفة صناعة القرص أو الديسك، واستغنت عن مبلغ المحل اللي يبيع لك اللعبة، فهو معناته ان سعر اللعبة المفروض ينباع بسعر أقل.

السبب الوحيد اللي لقيته لهذا هو ان الشركات مثل مايكروسوفت وسوني بالعاني ما خفضوا أسعار الألعاب على متاجرهم، لان خطوة مثل هذي راح تنهي محلات الألعاب للأبد وتسبب زحمة ومشاكل مالها نهاية. لذلك تقدر تقول ان محلات الألعاب عايشة تحت رحمة سوني ومايكروسوفت في الوقت الحالي.