مشهور الدبيان
ما يخفى عليك المنافسة الكبيرة الموجودة بين سوني (بلايستيشن 3) ومايكروسوفت (اكس بوكس 360) في الجيل الحالي. لكن الوضع ما يطمّن بالنسبة لمايكروسوفت في أجهزة الجيل الجاي -خاصة في منطقتنا- لأن البلايستيشن 4 بينزل رسمياً عندنا في المنطقة في 13 ديسمبر، بينما مايكروسوفت حتى ما أعطتنا تاريخ رسمي لاصدار الاكس بوكس ون في منطقتنا، واكتفت بالاعلان عن اطلاق الاكس بوكس ون في 13 دولة فقط في 22 نوفمبر.
هالشي طرح تساؤلات كثيرة في بالنا: ليش مايكروسوفت قررت تدعم 13 دولة فقط؟ وهل هي غير مهتمّة بالشرق الأوسط أصلاً؟ ووش بتسوي في منطقتنا مع وجود البلايستيشن 4 إلى ما ينزل جهازهم رسمياً؟
من حسن حظنا أنه حصل لنا لقاء اليوم “كريس كابيسولا”، نائب رئيس مجموعة قنوات المستهلكين (CCG) في مايكروسوفت، بحيث يجاوبنا على اسئلتنا واسئلة الزملاء الاعلاميين اللي حضروا الاجتماع المغلق.
سبب اطلاق الجهاز في 13 دولة فقط
ذكر كريس ان اطلاق الجهاز في 13 دولة فقط لا يعني انهم غير مهتمّين بالدول الثانية. حسب كلامه أن مايكروسوفت وسوني أنتجت نفس العدد تقريباً من أجهزة الجيل القادم (حوالي 20 مليون جهاز بناءً على تقديره). مايكروسوفت تشوف ان هالرقم ما يكفي لاطلاق الجهاز في جميع الدول المدعومة حالياً دفعة وحدة، بينما سوني تبي توصل لجميع الأسواق حتى لو بكمّيات أقل، ومايكروسوفت ما تبي هالشي. تبي ان اطلاق الجهاز يكون بشكل مثالي، والكمّيات تكفي الطلب في الأسواق اللي راح يتم اطلاق الجهاز فيها.
سبب آخر هو ان مايكروسوفت ماتبي تدخل أي سوق مع الاكس بوكس ون الا بعد ما تتأكد من عدّة عوامل مهمّة:
- أنها تتأكد ان الاكس بوكس ون ما راح ينزل رسمياً في دولة الا وهو مدعوم بتجربة أفضل للمستهلك. هل هذا يعني انهم ناوين يعرّبون الجهاز وأوامر الكنكت؟ أو مثلاً يوفّرون قنوات تلفزيونية وخدمات موسيقى لمنطقتنا؟ إلى الآن مافيه شي مؤكّد (وما قدرنا نجيب تأكيد للأسف)، لكن شخصياً ما أشوف شيء مقنع ثاني غير هالشي، لأنهم فعلياً يدعمون الحسابات السعودية في الاكس بوكس، فيحتاجون الآن إلى خطوة أكبر.
- تحتاج تتابع مبيعات جهازها في الدول الـ13 الأولى، بالاضافة إلى متابعة مبيعات البلايستيشن 4 في جميع الدول اللي بينزل فيها رسمياً، لأن هالشيئين بيكونون عامل كبير في تحديد الدول الإضافية اللي راح تدعمها مايكروسوفت.
باختصار، مايكروسوفت ماتبي تتهوّر وتحاول تدخل جميع الأسواق دفعه وحدة، وما تبي تتخذ قرارات الا بعد ما تحصل على معلومات إضافية.
شخصياً أعتقد أن أحد الأسباب الإضافية اللي خلتهم يتخذون هالقرار ان مخاطرتهم أكبر من سوني، خاصة بعد اهتزاز صورتهم عند اللاعبين بعد اعلاناتهم السابقة اللي اضطروا انهم يصحّحونها. سوني عندها ثقة أكبر في انها تدخل أسواق أضافية لأن سمعتها أفضل. مجرّد وجهة نظر.
كريس أكّد لنا أنهم مهتمّين جداً في منطقتنا، ويعرفون أنه فيه لاعبين كثير يعشقون الاكس بوكس، وعدم دخولهم أو اعلانهم لتاريخ اطلاق الجهاز لا يعني عدم اهتمامهم في اللاعبين، لكنهم يفضّلون انهم “يهدّون اللعب” شوي في البداية ويمشون على خطوات مدروسة بشكل أفضل.
منافسة البلايستيشن 4 بالاكس بوكس 360
سألت كريس عن خطّتهم لمواجهة البلايستيشن 4، هل ببساطة ناوين يخلّون سوني تكتسح المنطقة وهم يتفرجون؟ جاوبني بان الاكس بوكس 360 ما زال باقي فيه عمر طويل، وان ألعاب حصرية قوية مثل Titanfall بتنزل على الجهاز في 2014 وتعطيه دفعه إضافية.
سألته (وكرّر عليه السؤال اعلاميين آخرين) اذا ناوين على الأقل يدعمون خدمات اضافية على الاكس بوكس 360 في منطقتنا (مثل قنوات التلفزيون)، لكن اعطاني جواب دبلوماسي من نوع “نحن دائماً نسعى لتطوير تجربة الاكس بوكس في المنطقة”، وللأسف ماقدرت أحصل على معلومة مؤكّدة رسمياً إلى الآن.
شخصياً أعتقد أنه كان غير واقعي في الإشارة إلى Titanfall كميزة يقدرون يواجهون فيها البلايستيشن 4. صحيح Titanfall لعبة خرافية وننتظرها بحماس كبير، لكن أغلب الناس بيكونون متحمّسين لأجهزة الجيل القادم، مو اجهزة الجيل الحالي. واذا ما دعموا قنوات التلفزيون والاكس بوكس لايف السعودي بشكل عام على الاكس بوكس، فاعتقد موقفهم بيكون جداً ضعيف خلال 2014، ويمكن يضطرون يبدون في سوقنا من الصفر مع الاكس بوكس ون، خاصة أن حتى ملّاك الاكس بوكس وقتها بيكونون ملّوا من الانتظار وقل الدعم ويبدون يتحوّلون تدريجياً إلى البلايستيشن 4.
في نهاية اللقاء
انتهى لقائنا مع كريس وسط جو مليان إحباط. كنا نتوقّع شي اكثر من مايكروسوفت، لكن للأسف ما طلعنا بمعلومة ممكن تصبّرنا أو تحمّسنا للاطلاق الرسمي للاكس بوكس ون. لكن لو بننظر للجانب المشرق من الموضوع: على الأقل اكتشفنا ان مايكروسوفت جادّة في دعمها للمنطقة، وان عدم دخولها حالياً هو قرار استراتيجي بحت، ماهو عدم اهتمام أو عدم معرفة بالمنطقة، واخذنا هالمعلومة منشخص يشتغل في الشركة الأم.
وش رأيك انت؟ هل تشوف مايكروسوفت لها أي أمل في العودة للمنافسة من جديد؟ شاركنا برأيك في التعليقات!
بارعة
