اربح 5 العاب بلايستيشن 3 من اختيارك في مسابقة المحترف!

تنويه مهم: وصلتنا مشاركات كثيرة لكن يبدو للأسف انه ما كان فيه التزام بشروط المشاركة من اغلب المشاركين لسبب أو لآخر، والمشاركات المتبقية اللي تنطبق عليها الشروط قليلة جداً للأسف. بالتالي راح نضطر آسفين الى اننا نوقف المسابقة في هذي المرحلة، ونكافيء ابرز المشاركين بجوائز ترضيه مقدّمة من الموقع مقابل جهودهم، ونكافيء افضل مشاركة بجائزة ترضية اكبر بالاضافة الى نشرها في قناتنا على اليوتيوب.

نشكر كل من حاول المشاركة في المسابقة، وان شاءالله مثل ما عودناكم بتكون فيه مسابقات بشكل مستمر، وبنحاول نتلافى اي اشكالية واجهتنا في هالمسابقة ادت الى عدم وضوح بعض الشروط، وبنرجع لكم بمسابقة أخرى ان شاءالله برعاية المحترف في المستقبل القريب.

– مشهور الدبيان

———

مثل ماهو معروف نهاية كل سنة دائماً تكون مزحومة ألعاب تهد ميزانية الواحد، وجائزة هالمسابقة بتفك أزمة لأن فائز واحد فقط بيربح 5 ألعاب بلايستيشن 3 يختارها بنفسه وبنرسلها له الى مدينته! والجوائز مقدّمة من المحل المفضّل لفريق العمل “محترف ألعاب الكمبيوتر” في الرياض (رقم المحل: 0502102109 – مكان المحل – حسابهم في تويتر). المسابقة بتتطّلب بعض القدرات وبيكون فيها تنافس كبير، ما راح تعتمد على السحب.

كيفية المشاركة

كل مشارك بيحتاج يسوي فيديو ينافس فيه على الجائزة. الفيديو لازم يكون احد نوعين:

• فيديو مصوّر له علاقة بالعاب الكمبيوتر. مثلاً مشهد تمثيلي (زي ما سوينا في الطريق الى اي ثري)، أو تمثّل مشهد وكأنه من لعبة، أو تسوي مقابلة، أو غيره .. اللي تبي. أهم شي تطلع فيه انت أو أحد معك، مو تجيب لنا مقاطع من العاب. لازم يكون التصوير مبني على الحياة الحقيقية يعني.
• مونتاج لعدة مشاهد ابداعية أو مضحكة في فيديو واحد (زي ما سوينا في مقطع انتشارتد)

بعد كذا بناخذ أفضل مشاركات ونصفيها ونختار منها فائز واحد حسب التفاصيل في “مراحل المسابقة”. بعد ما تتأكّد ان مشاركتك تنطبق عليها جميع الشروط المذكورة في الأسفل، ارسل لنا مشاركتك بالطريقة التالية:

1. ارفع الفيديو في قناتك على اليوتيوب
2. حط حالة الفيديو Unlisted (عشان ما يطلع للناس)
3. ارسل لنا رابط الفيديو الى contest @ saudigamer.com

مراحل المسابقة

المرحلة الاولى – من 10 سبتمبر الى نهاية يوم 30 سبتمبر: في هالمرحلة بيكون الباب مفتوح لاستقبال جميع المشاركات. أول ما تنتهي هالفترة بنبدأ نقيّم المقاطع اللي وصلتنا ونختار منها 10 مقاطع نرفعهم لقناتنا على اليوتيوب.

المرحلة الثانية – من 7 أكتوبر الى نهاية يوم 13 اكتوبر: بننشر الـ10 مقاطع اللي اخترناها في المرحلة الاولى، وهنا يجي دور المتابعين يرشّحون الفيديو الأفضل في نظرهم عن طريق اللايك. المرحلة الاخيرة –

الاعلان عن الفائز في 14 اكتوبر:  بنعلن عن الفائز من العشر المرشحين بناءاً على تصويت المتابعين وتقييم فريق العمل. تقييمنا بيكون له 50% والتصويت بيكون له الـ50% الثانية من نتيجة التقييم النهائية لكل فيديو. وفي حال طلعت في مشاركات كثيرة رهيبة، بيكون فيه جوائز ترضية ان شاءالله للفائزين الأوائل.

معايير التقييم

مافيه معايير محدّدة للتقييم. لكن كل ما كان عملك مبدع ومميز أكثر، كل ما كانت فرصته بالفوز أكبر. والفيديوهات المصوّرة بيكون لها الأفضلية اذا جينا نقيّم بسبب الجهد المبذول فيها. اذا كنت بتسوي مونتاج لمقاطع من لعبة، فننصحك تتجنّب الالعاب التالية لانها بتخفّض تقييمك بشكل كبير: جميع العاب التصويب الحربية (Battlefield، Call of Duty…الخ)، لعبة Minecraft، جميع اجزاء Fifa و PES، لعبة Happy wheels، لعبة Slender، لعبة Bully. والسبب ان هالالعاب مقاطعها جداً جداً جداً منتشرة ومافيها أي تميّز.

شروط المشاركة

1. تكون مقيم في المملكة العربية السعودية.
2. ما بكون الفيديو اللي بتشارك فيه كومنتري.
3. يحق لك المشاركة بفيديو واحد فقط.
4. يكون محتوى الفيديو اللي تشارك فيه بين 3 و 10 دقايق (مو أقل ولا أكثر).
5. ما يكون الفيديو فيه أي شعارات أو اسماء أشخاص أو مواقع أو قنوات ثانية.
6. ما يكون الفيديو يتضمّن مقاطع مأخوذة من النت أو من قنوات ثانية.
7. يكون المقطع جديد وخاص للمسابقة ومن عملك الخاص.
8. يكون المقطع حصري لقناتنا على اليوتيوب وما ينرفع على قناة ثانية قبل أو بعد المشاركة فيه سواء فاز أو ما فاز.
9. ما يكون المقطع فيه اي شي له علاقة بالسياسة أو الدين أو كلام وصخ والأمور اللي ممكن الواحد يجيب فيها العيد.

وبامكان المشاركين في اي وقت يبلغون عن اي مشاركة تخالف هالشروط على الايميل info @ saudigamer.com وبنستثنيها من المسابقة مباشرة. —- بالتوفيق للجميع! 🙂