مشهور الدبيان
مصمّم أسمه سامويل ماتسون صمّم اكسسوار شاطح شوي: قطعة تشبك باذنك (زي السماعات) وتقيس نبضات القلب عشان تعرف وش كثر أنت متحمّس مع اللعبة، وبالتالي تتغيّر اللعبة بناءً على حماسك! على كلامه ان نبضات القلب تعتبر مؤشّر فعّال لقياس مدى توتّر (ونرفزة) اللاعب خلال اللعبة.
طبعاً ما راح تشتغل الا في حال كانت اللعبة متوافقة معه، وحالياً مافيه الا اللعبة البسيطة اللي صمّمها هو بحيث تزيد مستوى الصعوبة كل ما زاد توتّر اللاعب (أحس المفروض العكس!). والأكيد انه حتى لو دعمت الألعاب هذي التقنية، فما راح تضبط في الأونلاين لأن أغلب اللاعبين ما راح يكونون لابسينها أصلاً. بتقعد اللعبة تراعي مشاعرك لحالك وتسحب على الباقين؟ معصي. (معصي = مستحيل)
القطعة ما زالت مجرّد نموذج للفكرة، وشخصياً أشوف أفضل لو حط القطعه في اليد نفسها (مدري اذا تقدر تقيس النبضات من الكف) عشان يصير أي أحد يستخدمه بسهوله. وش ذنبي اذا اخوي يعرّق مثلاً؟
هل تشوف ان قطعة زي كذا ممكن تفيدنا وتطوّر تجربتنا في الألعاب؟ شاركنا برأيك في التعليقات
