يزيد السويري
إعتذر إستوديو 343 Industries المسؤول عن تطوير لعبة halo the master chief collection بلسان مؤسسته السيدة بوني روز وطلبوا من جماهيرهم أن يقبلوا إعتذارهم عن المشاكل اللي صاحبت اللعبة وخاصة طور الأونلاين. إعترفت بوني بأنهم ما قدموا التجربة اللي يستحقها جمهور اللعبة المخلص، وقالت:
” أعتذر شخصيا بالنيابة عن الإستوديو وفريقنا ملزم بأنه يشتغل ليل نهار لين ما تنحل هذه المشاكل. مشاكل الإتصال هذه ما كانت ظاهرة لنا يوم إختبرنا اللعبة داخل الأستوديو وهذا سبب ربكة وتجربة سيئة لللاعبين زي مشكلة الإنتظار طويلا لين ما تلقى مباراة تلعب فيها ومشاكل التقطيع. راح نقول لكم بالتطورات اللي تصير معنا ومتى راح يصدر التحديث بالضبط بمجرد ما يكون عندنا رؤيا واضحة لجدول مواعيد التحديث. حنا حاليا شغالين على تحديثات إضافية خاصة بطور القصة والواجهة الرئيسية ومشاكل ثانية عشان نحسن التجربة العامة للعبة. حنا نحلل بعناية فائقة كل تحديث نبي ننزله عشان نتأكد أن التحسينات اللي نشوفها داخل أروقة الإستوديو توصل لجمهورنا لما يلعبون اللعبة في بيوتهم. حطو في بالكم أننا نحاول نكون سريعين قد ما نقدر عشان نصلح هذه المشاكل حنا مخططين كذا تحديث نسويه لسيرفرات اللعبة ومحتويات إضافية خلال الأسابيع الجاية وراح أعلمكم بجديد التطورات اللي تصير معنا في الأيام الجاية”.
على كلام الأخت بوني أن تصليح مشاكل الإتصال في اللعبة بيكون هو تركيز الإستوديو حاليا على أمل أن اللعبة تتصلح في أقرب وقت.
وش رأيكم أعزائي وش أكثر مشكلة واجهتكم في اللعبة سواء في طور الأونلاين أو القصة؟ شاركونا تجاربكم في التعليقات.
بارعة
احمد خالد
