أفضل لعبة في سنة 2014

الفائز في جائزة لعبة السنة في عام 2014 هي لعبة Far Cry 4. نزلت اللعبة على بلايستيشن 4، بلايستيشن 3، اكس بوكس ون، اكس بوكس 360، بي سي.

أخيرًا جا وقتها! أفضل لعبة في السنة، أو لعبة السنة لعام 2014. استمتعنا كثير بهذي السنة، خصوصاً مع الأجهزة المنزلية الجديدة واللي ننتظرها من سنوات.

احترنا كثير في اختيارنا للعبة السنة، لأن السنة هذي نزلت ألعاب كثيرة ممتازة، هذي كانت اختياراتنا للمرشحين للجائزة:

• Dragon Age: Inquisition
• Far Cry 4
• Super Smash Bros.
• Dark Souls II
• Middle-Earth: Shadow of Mordor

جميع الألعاب المرشحة فعلاً استمتعنا فيها، وطال النقاش بيننا كثير، ولكن في الأخير اخترنا لعبة Far Cry 4 كأفضل لعبة في السنة.

أولاً، اللعبة ممكن تكون مشابهة بشكل كبير للجزء اللي قبل من ناحية المظهر، وهذا شي سمعناه وشفناه برضه في تجربتنا. لكن من بعد ما تلعب اللعبة وتتعمّق فيها، تكتشف ان اللعبة مختلفة ومتطوّرة بشكل كبير.

من أهم الاختلافات اللي لاحظناها تنويع طريقة اللعب، بحيث تحس بحريّة نادرًا ما تلقاها في الألعاب. مثلاً اذا كنت تبغى تحتل قاعدة، بامكانك تحتلها بطرق كثيرة: تقدر تاخذ سيارة وتحط فيها متفجرات وتفجرها عندهم، تقدر تاخذ فيل وتهاجمهم فيها، تقدر تحاول تذبحهم بطرق تخفّي، تقدر تحاربهم بالطريقة العادية باستخدام أسلحة. هذا الشي نادر تلقاه في الألعاب، وهذا عنصر مهم جدًا بالنسبة لنا.

شفتوا مشهور وهو يطقطق في اللعبة؟

أضف الى هذا كله العالم الكبير في اللعبة وطرق التنقل السهلة فيه، تقدر تستخدم التنقل السريع (fast travel)، تقدر تاخذ هليكوبتر وتطير فيها، تقدر تاخذ سيارة وحتى تشغل فيها القيادة التلقائية (auto-drive).

في خلال تجربتنا، أكثر من مره نكون طالعين ننفذ مهمة معيّنة، لكن نكتشف بعدها اننا صرنا نصيد أو طلعنا نسوّي مهمات جانبية أو نسوي شي ثاني، وهذا دليل على كثرة الأشياء اللي تسويها في اللعبة وانها كلها ممتعة.

أما من ناحية المحتوى، فاللعبة فيها محتوى هائل، فيه عندك مهمات كثيرة وممتعة. اذا ما لقيت شي تسويه، تقدر بكل بساطة تطلع وتستمتع بالصيد في اللعبة، وحتى الصيد تقدر تستفيد منه بحيث تطوّر شخصيتك وتصير تقدر تنفذ المهمات الرئيسية والفرعية بشكل أفضل.

بعد كل هاللي قلناه، نذكر أخيرًا الأطوار التعاونية والتنافسية اللي في اللعبة، واللي بكل تأكيد بتضيف لك اضافة كبيرة على تجربتك واللي غالباً بتكون رائعة مع اللعبة.

من المصادفات الغريبة ان لعبة Far Cry 3 هي أيضاً الفائز في جائزة لعبة السنة في 2012 🙂

كانت سنة ممتازة من ناحية الألعاب، ولو انها ماهي مثل السنة اللي قبل. نتمنى ان السنة الجايه بكون أفضل.

باقي دورك أنت تشاركنا، وش لعبة السنة بالنسبة لك، وليش؟