أحمد قربان
شركة بنجي (Bungie) المطورة للعبة ديستني (Destiny) مازالت مهتمة جدا بديستني وبتحسنها لدرجة الكمال. اليوم اعلنت ان التحديث الجديد اللي المفترض ينزل نهاية الشهر الحالي ورقمه 1.1.1 راح يبحث لك عن لاعبين معك تلقائيا اذا جيت تدخل المهمات الاسبوعية اللي اسمها ويكلي هيرويك سترايك (Weekly heroic strike). مثل مهمات الاسترايك العادية اذا عندكم خبرة باللعبة، وهذا الشي بيحل مشاكل كثيرة لنا و ينهي مشكلة ارسالنا للدعوات لاي احد في الفريندز بيلعب ديستني.
طبعا الى الان ماصار التحديث و لكي تنهي المهمات الاسبوعية وخصوصا اللي اسمها نايتفول (Nightfall) راح تحتاج لاعبين لفلهم عالي وصعب تخلصها لحالك. واللعبة ماتبحث لك عن لاعبين لازم انت ترسل دعوات وتجيب بنفسك لاعبين لفلهم عالي.
صرح تشنق (Chung) رئيس التصميم في اللعبة وقال: “احنا نبغا المهمات الاسبوعية تكون مثل التحدي اللي يحفرك للعب ويحفز جسدك معاك. لكن لاحظنا ان هذي المهمات ماتحتاج الى عمل جماعي عالي مثل المهمات اللي تحتاج انك تخطط من قبل تلعبها مع فريقك الخاص. وبناء على ضغط الطلبات من اللاعبين بحيث قالوا انهم ماعندهم العدد الكافي من الاصدقاء في قائمتهم لكي يعيشوا هذي التجربة بشكل اسبوعي قررنا نسوي هذا التحديث”
التحديث راح يبحث لك عن لاعبين فقط في المهمات الاسبوعية ويكلي هيرويك سترايك، اما اللي اسمها نايتفول و معاها الريد (Raid) ماراح يضيفوا خاصية البحث لهم بسبب ان صعوبتهم عالية و تحتاج الى تفاهم عالي بين اللاعبين.
المشكلة الوحيدة اللي بتواجه بنجي حاليا هي ان اللاعبين عددهم قل للعبة واللاعبين الجدد مو ملاقين احد يلعب معاهم الريد او النايتفول. قال تشنق عن هذي المشكلة: “احنا واعين عن المشكلة هذي بشكل كبير. نعتقد ان مهمات الريد الممتازة تحتاج الى لاعبين ممتازين ومتواصلين مع بعض و يقدروا يعتمدوا على بعض. لكن في نفس الوقت احنا عارفين ان بالنسبة لكثير من اللاعبين يعتبر شي صعب انك تلقى فرق جاهزة للريد و النايتفول و يرحبوا بك في هذي الايام. احنا بنفكر بكل قوتنا عن طرق مساعدة هذول اللاعبين و نساعدهم في تسهيل هذي العملية في المستقبل”
مثل ماذكرت فوق ان التحديث المفترض ينزل نهاية شهر فبراير الحالي، وراح يكون فيه بالاضافة للتحديثات اللي ذركتها فوق تحديث للاسلحة. واذا لسة مااقتنعت بديستني او ماجربتها كتبت مقالة ممكن تغير لك رايك عن اللعبة.
مع ان اللعبة سوقها نزل بشكل كبير في الاسابيع اللي راحت، لكن هذا التحديث راح يرجع شوي من اللاعبين للعبة والباقين اغلبهم بينتظر الاضافة الجديدة اللي لسه مانعرف متى راح تنزل بالضبط. اتمنى ان الاضافة تكون قريبة وماتتاخر لانها لو تاخرت اللعبة راح يتركها اغلب اللاعبين وصعب يرجعوا لها ثاني في وجهة نظري.
اش رايكم بالتحديث وهل مازلتم تلعبوا اللعبة؟
بارعة
احمد خالد
